“அமெரிக்கா முன்வைக்கும் போர்நிறுத்தத்தை ஏற்க வேண்டும் — ஜெலன்ஸ்கியிடம் டிரம்ப் வலியுறுத்தல்”

வாஷிங்டன்:
ரஷ்யாவுடன் பேச்சுவார்த்தை நடத்துவதற்கான அமெரிக்க சமாதானத் திட்டத்தை உக்ரைன் ஏற்க வேண்டும் என்று உக்ரைன் அதிபர் ஜெலென்ஸ்கியிடம் அமெரிக்க அதிபர் டொனால்ட் டிரம்ப் வலியுறுத்தியுள்ளார்.

உக்ரைன்–ரஷ்யா போரை முடிவுக்குக் கொண்டு வர அமெரிக்கா 28 அம்சங்களைக் கொண்ட விரிவான சமாதானத் திட்டத்தை முன்மொழிந்துள்ளது. இந்த திட்டத்திற்கு டிரம்ப் ஒப்புதல் அளித்துள்ளார்.

இதுகுறித்து டிரம்ப் கூறியதாவது:

“சமாதானத்தை ஏற்படுத்துவதற்கான ஒரு வழி எங்களிடம் உள்ளது. ரஷ்யாவுடன் பேசுவதற்கான இந்த அமெரிக்க திட்டத்தை உக்ரைன் அங்கீகரிக்க வேண்டும். அவர்கள் நியாயமான நிலைக்கு நெருங்கி வருகிறார்கள் என்று நினைக்கிறேன்.”

ஜெலன்ஸ்கி பதில்

உக்ரைன் அதிபர் ஜெலென்ஸ்கி தனது அலுவலகத்திற்கு வெளியே நடந்த பொதுக் கூட்டத்தில் பேசியதாவது:

“இது நமது வரலாற்றின் மிகவும் கடினமான தருணங்களில் ஒன்றாகும். உக்ரைன் கடுமையான சூழ்நிலையைக் சந்திக்கிறது. கண்ணியத்தை இழக்கக்கூடும்; ஒரு முக்கிய கூட்டாளியை இழக்கும் அபாயமும் உள்ளது. ஆனால் உக்ரைனின் முக்கிய நலன்களை நான் பாதுகாப்பேன். அதற்காக 24 மணி நேரமும் போராடுவேன்.”