புதுடில்லி:
நீதிமன்றங்களே அரசியலமைப்பின் காவலர்கள் என பெருமிதத்துடன் தெரிவித்தார் உச்சநீதிமன்ற தலைமை நீதிபதி சூர்யகாந்த்.
அரசியலமைப்பு தினத்தை முன்னிட்டு டில்லியில் உச்சநீதிமன்ற பார் கவுன்சில் நடத்திய விழாவில், தலைமை நீதிபதி சூர்யகாந்த் மற்றும் சட்டத்துறை அமைச்சர் அர்ஜூன் ராம் மேக்வால் உள்ளிட்டோர் கலந்து கொண்டனர்.
இந்த நிகழ்ச்சியில் தலைமை நீதிபதி சூர்யகாந்த் பேசியதாவது:
“இன்று இந்த நிகழ்ச்சியில் கலந்து கொள்வதில் பெரும் மகிழ்ச்சி. உச்சநீதிமன்ற தலைமை நீதிபதியாக பொறுப்பேற்ற பின் நான் உரையாற்றும் முதல் பொது நிகழ்ச்சி இதுவாகும். உண்மையாகச் சொல்லப் போனால், இந்த மைல்கல்லை அடைய அரசியலமைப்புத் தினத்தை விட சிறந்த நிகழ்வை நான் கற்பனை செய்ய முடியாது.
சட்டத்தின் ஆட்சியை வலுப்படுத்தவும், அரசியலமைப்பின் புனிதத்தன்மையைப் பாதுகாக்கவும் வழக்கறிஞர்கள் மிக முக்கிய பங்கு வகிக்கின்றனர். நீதிமன்றங்களே அரசியலமைப்பின் காவலர்கள். வழக்கறிஞர்கள் நமது பயணத்தின் ‘விளக்குகள்’ என்பதைச் சொல்ல எனக்கு எந்த தயக்கமும் இல்லை.
ஆரம்ப காலம் முதலே, உச்சநீதிமன்ற வழக்கறிஞர்கள் சங்கம் ஜனநாயகம், சட்டத்தின் ஆட்சி, நீதித்துறையின் சுதந்திரம் ஆகிய அரசியலமைப்புச் சிந்தனைகளை பேணுவதிலும், பராமரிப்பதிலும், ஒருங்கிணைப்பதிலும் முக்கிய பங்காற்றி வருகிறது.”
இவ்வாறு அவர் தெரிவித்துள்ளார்.