டில்லியில் ஹமாஸ் பாணி ட்ரோன் தாக்குதல் சதி: என்ஐஏ விசாரணையில் அதிர்ச்சி தகவல்

ஜம்மு காஷ்மீரின் அனந்த்நாக் மாவட்டம் காசிகுந்தைச் சேர்ந்த ஜஸிர் பிலால் வானி, தற்கொலைப்படை பயங்கரவாதி உமர் நபியுடன் சேர்ந்து தாக்குதல் சதியில் ஈடுபட்டிருந்ததாக என்ஐஏ அதிகாரிகள் தெரிவித்துள்ளனர். டில்லியில் தாக்குதல் நடத்த உமர் நபிக்கு தேவையான தொழில்நுட்ப உதவிகளை ஜஸிர் பிலால் வானி வழங்கியதும் விசாரணையில் வெளிப்பட்டுள்ளது.

கைதான ஜஸிர் பிலால் வானியை விசாரிக்கும் போது, டில்லியில் ஹமாஸ் பாணியில் மக்கள் அதிகம் கூடும் இடங்களை குறிவைத்து ட்ரோன் தாக்குதல் நடத்த திட்டமிட்டிருந்தது அம்பலமானது. இந்த ட்ரோன்களில் கேமரா மற்றும் பேட்டரி பொருத்தப்பட்டு, சக்திவாய்ந்த குண்டுகளை ஏற்றிச் செல்லும் வகையில் மாற்றங்கள் செய்யப்பட்டிருந்தன. நெரிசலான பகுதிகளில் வெடிப்பு ஏற்படுத்தும் நோக்கத்துடன் இந்த நடவடிக்கை திட்டமிடப்பட்டதாக கூறப்படுகிறது.

சிரியா, ஈராக், இஸ்ரேல், ஆப்கானிஸ்தான் போன்ற பகுதிகளில் ஹமாஸ் மற்றும் ஐஎஸ் உள்ளிட்ட பயங்கரவாத குழுக்கள் பயன்படுத்தும் தாக்குதல் முறைபாட்டை அடிப்படையாகக் கொண்டே இந்த சதி வடிவமைக்கப்பட்டிருந்ததாக என்ஐஏ வட்டாரங்கள் தெரிவித்தன. எனினும், இந்த ஆபத்தான திட்டம் முறியடிக்கப்பட்டுள்ளது.