தமிழக வெற்றிக் கழக அரசை கவிழ்க்கும் எண்ணம் இந்திய கம்யூனிஸ்ட் கட்சிக்கு இல்லை என்று அக்கட்சியின் தமிழ்நாடு மாநிலச் செயலாளர் மு. வீரபாண்டியன் தெரிவித்துள்ளார். மதுராந்தகத்தில் இன்று செய்தியாளர்களிடம் பேசிய அவர், தவெக அரசுக்கு வெளியில் இருந்து அளிக்கப்பட்ட ஆதரவு ஜனநாயக சூழலை கருத்தில் கொண்டு கட்சி எடுத்த அரசியல் முடிவு என விளக்கினார்.
மக்கள் வழங்கிய தேர்தல் தீர்ப்பை மதிப்பதும், மாநிலத்தில் ஆளுநர் ஆட்சி ஏற்படும் சூழல் உருவாகாமல் இருப்பதும் வெளிப்புற ஆதரவு வழங்கப்பட்டதற்கான காரணங்களில் ஒன்று என்று அவர் கூறினார். இந்த ஆதரவு தனிநபர் முடிவு அல்ல; கட்சியின் அமைப்புகள் விவாதித்து எடுத்த முடிவு என்றும் அவர் தெரிவித்தார்.
அதேபோல், எதிர்காலத்தில் அரசுக்கான ஆதரவைத் தொடர்வதா அல்லது வாபஸ் பெறுவதா என்பதையும் கட்சிதான் தீர்மானிக்கும் என்று வீரபாண்டியன் குறிப்பிட்டார். மாநிலச் செயலாளராக இருக்கும் தனக்குக் கூட ஒருதலைப்பட்சமாக அத்தகைய முடிவை எடுக்கும் அதிகாரம் இல்லை என்றும் அவர் கூறினார்.
அரசுக்கு ஆதரவு வழங்குவது, அரசின் அனைத்து நடவடிக்கைகளையும் ஆதரிப்பதாக பொருள் கொள்ளக்கூடாது என்றும் அவர் விளக்கினார். CPI உழைக்கும் மக்கள், தொழிலாளர்கள் மற்றும் ஏழைகளின் பிரச்சினைகளின் அடிப்படையிலேயே தனது அரசியல் நிலைப்பாட்டைத் தொடரும் என்றும், தேவையான இடங்களில் அரசை விமர்சிக்கவும் போராட்டம் நடத்தவும் தயங்காது என்றும் தெரிவித்தார்.
குறிப்பாக மதச்சார்பின்மை தொடர்பான நிலைப்பாட்டில் அரசு தெளிவாக இருக்க வேண்டும் என்றும், அதிலிருந்து விலகும் சூழல் ஏற்பட்டால் கம்யூனிஸ்ட் கட்சிகள் எதிர்ப்பு தெரிவிக்கும் என்றும் வீரபாண்டியன் கூறினார். அதே நேரத்தில், அரசை பலவீனப்படுத்துவது அல்லது ஆட்சியை கவிழ்ப்பது தங்களின் நோக்கம் அல்ல என்பதையும் அவர் மீண்டும் வலியுறுத்தினார்.
சமீபத்தில் மதுராந்தகம் மற்றும் தாராபுரம் இடைத்தேர்தல்களில் இடதுசாரிகள் தனித்துப் போட்டியிட முடிவு செய்துள்ள நிலையில், அந்த முடிவு தவெக அரசுக்கான வெளிப்புற ஆதரவு வாபஸ் பெறப்பட்டுவிட்டது என்று பொருள் அல்ல என்ற நிலைப்பாட்டையும் CPI முன்வைத்துள்ளது. இடைத்தேர்தலில் அரசின் செயல்பாடுகளை விமர்சித்து பிரசாரம் செய்வதும், அரசை கவிழ்க்க முயல்வதும் இரண்டு வேறு அரசியல் நிலைப்பாடுகள் என்ற கோட்டில் கட்சி பேசிவருகிறது.
அமைச்சர் ஆதவ் அர்ஜுனா கம்யூனிஸ்ட் கட்சிகளை விமர்சித்திருந்த பின்னணியிலும் வீரபாண்டியன் பதிலளித்தார். கம்யூனிஸ்ட் இயக்கத்தின் வரலாற்றைப் புரிந்துகொண்டு அதன் பின்னரே குற்றச்சாட்டுகளை முன்வைக்க வேண்டும் என அவர் கூறியதுடன், அரசியல் கருத்து வேறுபாடு இருந்தாலும் கம்யூனிஸ்ட் கட்சிகளின் தற்போதைய நோக்கம் ஆட்சி கவிழ்ப்பு அல்ல எனத் தெளிவுபடுத்தினார்.
