சென்னை:
சூப்பர் ஸ்டார் ரஜினிகாந்த் நடிப்பில் உருவாகி வரும் “ஜெயிலர் 2” திரைப்படம் குறித்து நடிகை மிர்னா மேனன் சமீபத்தில் சுவாரஸ்யமான தகவல்களை பகிர்ந்துள்ளார். முதல் பாகத்தில் நடித்திருந்த அவர், இரண்டாம் பாகத்திலும் முக்கிய கதாபாத்திரத்தில் நடித்துவருகிறார்.
ஒரு கல்லூரி நிகழ்ச்சியில் கலந்து கொண்டு பேசிய மிர்னா மேனன், “ஜெயிலர்” திரைப்படத்தின் முதல் பாகம் குறித்து நினைவுகளை பகிர்ந்தார். அவர் கூறுகையில், அந்த படத்தில் நடித்துக் கொண்டிருந்த காலத்தில் மற்றொரு படத்தின் விளம்பர நிகழ்ச்சிக்காக சென்றபோது, “ஜெயிலர்” படம் எப்படி உருவாகி வருகிறது என்று கேட்டதாக தெரிவித்தார்.
அப்போது, “இடைவெளி காட்சி தற்போது தான் படமாக்கி முடித்தோம். தமிழ் திரைப்பட வரலாற்றிலேயே இதுபோன்ற ஒரு இடைவெளி காட்சி இதுவரை வரவில்லை. இனிமேலும் வருமா என்பது தெரியவில்லை” என்று கூறியதாக அவர் நினைவுகூர்ந்தார். அந்த இடைவெளி காட்சி ரசிகர்களிடையே பெரும் வரவேற்பைப் பெற்றது என்பதும் குறிப்பிடத்தக்கது.
இதைத் தொடர்ந்து, “ஜெயிலர் 2” படம் குறித்து அவர் கூறியபோது, “முதல் பாகத்தின் இடைவெளி காட்சி இப்படியாக இருந்தால், இந்த இரண்டாம் பாகம் எப்படி இருக்கும் என்பதை நீங்கள் யோசித்து பாருங்கள்” என்று கூறி ரசிகர்களின் எதிர்பார்ப்பை மேலும் உயர்த்தினார்.
மேலும், ரஜினிகாந்த் குறித்து பேசிய அவர், பல ஆண்டுகளுக்கு முன்பு பார்த்த “படையப்பா” திரைப்படத்தை நினைவுகூர்ந்தார். அந்த படத்தில் நடிகை ரம்யா கிருஷ்ணன் கூறும் வசனத்தை குறிப்பிட்ட அவர், “வயது அதிகமானாலும் அழகும் நடையும் அவரை விட்டு போகவில்லை” என்ற அந்த வசனம் தற்போது ரஜினிகாந்தை பார்த்தபோது நினைவுக்கு வந்ததாக தெரிவித்தார்.
இன்றும் அதே உற்சாகம், நடை, ஆற்றல் ஆகியவற்றுடன் அவர் செயல்படுவது அனைவரையும் ஆச்சரியப்படுத்துகிறது என்றும், அவர் ஒரு சிறந்த நடிகர் மட்டுமின்றி நல்ல மனிதர் என்றும் மிர்னா மேனன் பாராட்டினார். அவரிடம் இருந்து பல விஷயங்களை கற்றுக்கொள்ள முடியும் என்றும் அவர் கூறினார்.
“ஜெயிலர் 2” படம் குறித்த இந்த தகவல்கள் ரசிகர்களிடையே பெரும் எதிர்பார்ப்பை ஏற்படுத்தியுள்ளன. முதல் பாகம் பெற்ற வெற்றியை தொடர்ந்து, இரண்டாம் பாகமும் பெரிய வரவேற்பைப் பெறும் என எதிர்பார்க்கப்படுகிறது.
