சென்னை:
தமிழக சட்டமன்றத் தேர்தல் முடிவுகள் தமிழக அரசியலில் பெரும் அதிர்வலைகளை ஏற்படுத்தியுள்ளன. முதல் முறையாகக் களமிறங்கிய தமிழக வெற்றிக் கழகம் 111 தொகுதிகளில் முன்னிலை பெற்று ஆட்சிக் கட்டிலை நெருங்கி நிற்கிறது. ஆளுங்கட்சியான திமுக 54 இடங்களிலும், அதிமுக 69 இடங்களிலும் மட்டுமே முன்னிலையில் இருப்பதாகத் தெரிகிறது. இந்தத் தேர்வு முடிவுகள் திராவிட அரசியலின் பழைய சமன்பாடுகளை சிதைத்துவிட்டதாக அரசியல் வட்டாரங்கள் கூறுகின்றன.
விஜய்யின் கட்சி குறுகிய காலத்தில் இப்படிப் பெரும் முன்னிலை பெறுவது, ஒருபுறம் மாற்றத்தை விரும்பிய வாக்காளர்களின் ஆதரவை காட்டினாலும், மறுபுறம் அந்த வெற்றியின் பின்னணியில் சில கடுமையான கேள்விகளும் எழுந்துள்ளன. வலுவான கொள்கை அமைப்பு, நீண்டகால மக்கள் போராட்ட அனுபவம் ஆகியவை இல்லாத நிலையில், வெறும் மக்கள் செல்வாக்கு மட்டும் இவ்வளவு பெரிய வெற்றியைத் தந்ததா என்ற விவாதம் வலுத்துள்ளது. மிகக் குறைந்த சாலைப் பேரணிகளும் சில மக்கள் சந்திப்புகளுமே இந்த அரசியல் எழுச்சிக்கு காரணமா என்ற சந்தேகமும் முன்வைக்கப்படுகிறது.
தேர்தல் முடிவுகளோடு சேர்ந்து, தவெக வேட்பாளர்களின் பின்னணி குறித்த விமர்சனங்களும் அதிகரித்துள்ளன. பல வேட்பாளர்கள் மீது குற்றவழக்குகள் இருப்பதாகத் தகவல்கள் வெளியாகியுள்ளன. குறிப்பாக சிலர் மீது கொலை, கடத்தல், பெண்களுக்கு எதிரான வன்கொடுமை போன்ற கடுமையான வழக்குகளும் உள்ளதாக கூறப்படுவது கவலையை ஏற்படுத்துகிறது. தங்களைத் தூய்மையான அரசியல் இயக்கமாகக் காட்ட முயலும் கட்சியில் இப்படிப் பட்டவர்கள் இருப்பது, விஜய்யின் அரசியல் நம்பகத்தன்மைக்கு கேள்விக்குறி எழுப்புவதாகப் பார்க்கப்படுகிறது.
அதேபோல், கரூரில் நடந்த தவெக பொதுக்கூட்ட நெரிசல் சம்பவமும் மீண்டும் பேசுபொருளாகியுள்ளது. 2025ஆம் ஆண்டு ஏற்பட்ட அந்த துயர சம்பவத்தில் பலர் உயிரிழந்ததோடு, பாதிக்கப்பட்டவர்களிடம் விஜய் உடனடியாக நின்று ஆறுதல் கூறாதது கடும் விமர்சனத்தை ஏற்படுத்தியது. இக்கட்டான தருணத்தில் பொறுப்பேற்காமல் விலகிச் சென்றதாக எதிர்ப்பாளர்கள் குற்றம்சாட்டுகின்றனர். இந்தச் சம்பவம், விஜய்யின் தலைமைத் தன்மையை சந்தேகத்துக்கு உள்ளாக்கியதாக கூறப்படுகிறது.
இதற்கிடையில், தேர்தல் பிரச்சாரத்தின் போது தவெக செய்த களப்பணியும் குறைவு என்ற விமர்சனமும் எழுந்துள்ளது. மக்கள் பிரச்சினைகளை நேரில் சந்தித்து கேட்காமல், சமூக வலைதளப் பிம்பத்தையே நம்பி அரசியல் செய்வது நீடித்த வெற்றிக்கு போதுமா என்ற கேள்வி அரசியல் ஆய்வாளர்களால் முன்வைக்கப்படுகிறது. மேலும், நீட், காவிரி, விலைவாசி உயர்வு, திருப்பரங்குன்றம் போன்ற மாநில முக்கிய பிரச்சினைகளில் விஜய் மௌனமாக இருந்ததாகவும் குற்றச்சாட்டு உள்ளது.
மக்கள் மாற்றத்தை விரும்பியதால் தவெக முன்னிலையில் இருப்பது உண்மைதான். ஆனால், அந்த வெற்றியை நிலையான ஆட்சியாக மாற்ற விஜய் தலைமையிலான கட்சி எவ்வளவு தயாராக உள்ளது என்பது இப்போது முக்கியமான கேள்வியாகியுள்ளது. வெற்றிக் கொண்டாட்டத்திற்குப் பின்னால் உள்ள இந்த குற்றச்சாட்டுகள், புதிய அரசின் மீது நிழலை ஏற்படுத்தியுள்ளன.
