பாகிஸ்தான் ஆக்கிரமிப்பு காஷ்மீர் ஒடுக்குமுறை: ஐக்கிய நாடுகள் சபையின் விசாரணைக்கு ஃபரூக் அப்துல்லா கோரிக்கை
பாகிஸ்தான் ஆக்கிரமிப்பில் உள்ள காஷ்மீர் பகுதியில் தற்போது நிலவி வரும் பதற்றமான சூழல், பொதுமக்கள் மீதான ஒடுக்குமுறைகள் மற்றும் வன்முறைச் சம்பவங்கள் குறித்து ஐக்கிய நாடுகள் சபையின் மனித உரிமைகள் ஆணையம் நேரில் சென்று விசாரணை நடத்த வேண்டும் என்று தேசிய மாநாட்டுக் கட்சித் தலைவர் ஃபரூக் அப்துல்லா வலியுறுத்தியுள்ளார்.
போராட்டமும் வன்முறையும்
பாகிஸ்தான் ஆக்கிரமிப்பு காஷ்மீரில் செயல்பட்டு வந்த ‘ஜேஏஏசி’ என்ற அமைப்பை, சட்டம்-ஒழுங்கு மற்றும் பாதுகாப்பு காரணங்களைக் கூறி அந்நாட்டு அதிகாரிகள் கடந்த வெள்ளிக்கிழமை திடீரென தடை செய்தனர். அரசின் இந்த அடக்குமுறை நடவடிக்கைக்கு எதிர்ப்பு தெரிவித்து, அப்பகுதியின் பல்வேறு இடங்களில் பொதுமக்கள் வீதிகளில் இறங்கிப் போராட்டம் நடத்தினர். இந்தப் போராட்டத்தை ஒடுக்குவதற்குப் பாதுகாப்புப் படையினர் மேற்கொண்ட நடவடிக்கைகளால் மோதல் வெடித்தது.
இந்த மோதலில், ராவலக்கோட் நகரில் வணிகர் ஒருவர் உயிரிழந்தார். தொடர்ந்து நடைபெற்ற வன்முறைகளில் பல பொதுமக்கள் உயிரிழந்துள்ளனர் என்றும், சுமார் இருநூறுக்கும் மேற்பட்டோர் பலத்த காயங்களுடன் மருத்துவமனைகளில் சிகிச்சை பெற்று வருவதாகவும் தகவல்கள் தெரிவிக்கின்றன. பாகிஸ்தான் அரசின் இத்தகைய அடக்குமுறை மற்றும் மக்கள் மீதான தாக்குதல் சர்வதேச அளவில் பெரும் அதிர்ச்சியை ஏற்படுத்தியுள்ளது.
ஃபரூக் அப்துல்லாவின் வேண்டுகோள்
ஸ்ரீநகரில் செய்தியாளர்களிடம் பேசிய ஃபரூக் அப்துல்லா, இந்தப் பகுதியைச் சூழ்ந்துள்ள கடினமான சூழல் குறித்து வேதனை தெரிவித்தார். “பாகிஸ்தானின் கட்டுப்பாட்டில் உள்ள காஷ்மீர் பகுதியில் இன்று ஒடுக்குமுறை உச்சத்தில் உள்ளது. அப்பாவி மக்கள் பலர் உயிரிழந்துள்ளனர். அங்கு நடக்கும் உண்மையான நிகழ்வுகள் வெளியே தெரியாமல் மறைக்கப்படுகின்றன. எனவே, ஐக்கிய நாடுகள் சபையும் அதன் மனித உரிமைகள் ஆணையமும் உடனடியாகத் தலையிட்டு, அங்குள்ள கள நிலவரத்தை நேரில் ஆய்வு செய்ய வேண்டும். அந்த மக்கள் அனுபவிக்கும் துன்பங்களையும், அவர்கள் எதிர்கொள்ளும் அடக்குமுறைகளையும் உலகிற்கு வெளிச்சம் போட்டுக் காட்ட வேண்டும்,” என்று அவர் கேட்டுக்கொண்டார்.
மாநில அந்தஸ்து மற்றும் அதிகாரப் பகிர்வு
ஜம்மு காஷ்மீருக்கு மீண்டும் மாநில அந்தஸ்து வழங்கப்படாதது குறித்த கேள்விகளுக்குப் பதிலளித்த ஃபரூக் அப்துல்லா, தற்போதைய ஆட்சி முறையை விமர்சித்தார். “ஜம்மு காஷ்மீரில் தற்போதைய நிலைமை சீராக இல்லை. இந்தியாவுடன் நாங்கள் இணையும்போது சில குறிப்பிட்ட நிபந்தனைகள் இருந்தன. நாங்கள் மனிதர்கள் என்பதையும், எங்களின் கண்ணியம் முக்கியமானத என்பதையும் அரசு உணர வேண்டும். அந்த நிபந்தனைகள் மறுஆய்வு செய்யப்பட்டு, எங்களின் உரிமைகள் மீட்கப்பட வேண்டும்,” என்று கூறினார்.
தொடர்ந்து பேசிய அவர், மக்களால் தேர்ந்தெடுக்கப்பட்ட அரசு இருந்தாலும், பெரும்பாலான அதிகாரங்கள் டெல்லியால் நியமிக்கப்பட்ட ஆளுநரின் வசமே இருப்பதைச் சுட்டிக்காட்டினார். “மக்களால் தேர்ந்தெடுக்கப்பட்ட பிரதிநிதிகள் பணியாற்ற வேண்டிய சூழல் மிகவும் கடினமாக உள்ளது. ஆளுநரின் கட்டுப்பாட்டில் அதிகாரம் இருப்பது ஜனநாயகத்திற்கு உகந்தது அல்ல. எங்களின் சிரமங்களை மத்திய அரசு உணர்ந்து செயல்பட வேண்டும்,” என அவர் தனது ஆதங்கத்தைப் பதிவு செய்தார்.
பாகிஸ்தான் ஆக்கிரமிப்பு காஷ்மீரில் நடக்கும் வன்முறைகள் ஒருபுறம் இருக்க, ஜம்மு காஷ்மீரின் அரசியல் உரிமைகள் மற்றும் அதிகாரப் பகிர்வு குறித்த ஃபரூக் அப்துல்லாவின் கருத்துகள், தற்போதைய சூழலில் முக்கிய விவாதமாக மாறியுள்ளன.
