பாட்னா: “பீஹார் என்றால் நிதிஷ்குமார்தான்”, “புலி இன்னும் உயிரோடுதான் இருக்கிறது” என்ற வாசகங்களுடன் கூடிய வாழ்த்து போஸ்டர்கள் பாட்னாவில் ஒட்டப்பட்டுள்ளன.
பீஹார் சட்டசபை தேர்தலில் பாஜக தலைமையிலான தேசிய ஜனநாயக கூட்டணி மிகப்பெரிய வெற்றியை பெற்றுள்ளது. இந்த தேர்தலில் எதிர்க்கட்சிகளை முற்றிலும் பின்னுக்கு தள்ளிய தேசிய ஜனநாயக கூட்டணிக்கு அனைத்து தரப்பிலும் இருந்து வாழ்த்துகள் குவிந்து வருகின்றன.
19 ஆண்டுகளாக முதல்வராக உள்ள நிதிஷ் குமாரை, தொண்டர்கள், கூட்டணிக் கட்சித் தலைவர்கள், பொதுமக்கள் உள்ளிட்ட பலரும் பாராட்டி வருகின்றனர். மாநிலம் முழுவதும் பாஜகவும், ஐக்கிய ஜனதா தளமும் மட்டுமல்லாமல், அவர்களுக்கு ஆதரவளிக்கும் பலரும் கொண்டாட்டங்களில் ஈடுபட்டு வருகின்றனர்.
கொண்டாட்டத்தின் நடுவே, தலைநகர் பாட்னாவில் ஒட்டப்பட்டுள்ள வாழ்த்து போஸ்டர்கள் பலரின் கவனத்தை ஈர்த்து வருகின்றன. குறிப்பாக பாட்னாவின் முக்கிய இடங்களில் தொண்டர்கள் அமைத்துள்ள வெற்றி பதாகைகளைப் பாதசாரிகள் மற்றும் பயணிகள் தவறாமல் கவனித்து வருகின்றனர்.
“பீஹார் என்றாலே நிதிஷ்குமார்தான்; பீஹாரின் அர்த்தமே நிதிஷ்குமார்” என்ற வாசகங்களே இந்த போஸ்டர்களுக்கு முக்கிய ஈர்ப்பாக உள்ளன. இன்னொரு போஸ்டரில் இடம்பெற்றிருக்கும் வாசகம் சினிமா வசனத்தை கூட மிஞ்சும் விதமாக இருக்கிறது.
“இப்போது டிரெண்ட் மட்டும் வந்துள்ளது; பீஹார் அரசியலில் நிதிஷ்தான் உண்மையான புலி” என்ற வாசகங்கள் போஸ்டர்களில் பளிச்சென்று காட்சியளிக்கின்றன. மேலும், இன்னொரு வாழ்த்து போஸ்டர் நிதிஷ்குமார் இல்லத்தின் வெளியிலும் ஒட்டப்பட்டுள்ளது.
“புலி” — என்கிறார் நிதிஷ்குமாரைச் சுட்டிக்காட்டி — “இன்னமும் உயிரோடு தான் இருக்கிறது” என்ற வாசகங்களும் அந்த போஸ்டர்களில் இடம்பெற்றுள்ளன. இந்த வித்தியாசமான போஸ்டர்களில், நிதிஷ்குமாரின் பக்கத்தில் ஒரு புலி நிற்கும் புகைப்படங்களும் சேர்க்கப்பட்டுள்ளன.
இவ்விதமாக ஒட்டப்பட்டுள்ள வித்தியாசமான போஸ்டர்கள், பதாகைகளைப் பார்த்து அவ்வழியே செல்லும் பலர் உற்சாகமாக ஆரவாரம் செய்கிறனர். சிலர் அந்தப் போஸ்டர்களுக்கு அருகில் சென்று செல்ஃபி, வீடியோ எடுத்து கொண்டாடுகின்றனர்.
