டெல்லியில் கடந்த 10ஆம் தேதி நடந்த கார் குண்டுவெடிப்பு சம்பவம் நாடு முழுவதும் அதிர்ச்சியை ஏற்படுத்தியது. இந்த வெடிப்பில் 15 பேர் உயிரிழந்ததுடன், 30க்கும் மேற்பட்டோர் படுகாயம் அடைந்தனர். சம்பவம் நடந்த உடனே டெல்லி போலீசார் விசாரணையில் இறங்கி, பலரை சந்தேகத்தின் பேரில் கைது செய்து ரகசியமாக விசாரித்தனர். பின்னர், வழக்கின் தீவிரத்தைக் கருத்தில் கொண்டு, இது தேசிய புலனாய்வு முகமைக்கு (NIA) மாற்றப்பட்டது.
NIA அதிகாரிகள் சம்பவ இடத்திலிருந்து சேகரிக்கப்பட்ட ஆதாரங்கள், டிஜிட்டல் தடயங்கள் மற்றும் சந்தேக நபர்களின் தொடர்புகளை அடிப்படையாகக் கொண்டு விரிவான விசாரணை மேற்கொண்டனர். இந்த விசாரணையில், டாக்டர் உமர் என்ற நபர் தற்கொலை குண்டாக வெடித்து சிதறியதே இந்த தாக்குதலின் முக்கிய காரணம் என உறுதி செய்யப்பட்டது. உமருடன் தொடர்பில் இருந்த 8 பேரை ஏற்கனவே கைது செய்து விசாரணை நடத்தி வருகின்றனர்.
இந்த நிலையில், வழக்கில் மேலும் ஒரு முக்கிய முன்னேற்றம் ஏற்பட்டுள்ளது. தெற்கு காஷ்மீரின் ஸ்ரீநகர் மாவட்டம், சோபியான் பகுதியைச் சேர்ந்த யாசிர் அகமது தார் என்ற நபரை NIA அதிகாரிகள் கைது செய்துள்ளனர். டெல்லியில் மறைந்து இருந்த அவரை புலனாய்வு அதிகாரிகள் சிறப்பு நடவடிக்கையில் பிடித்ததாக தகவல்கள் தெரிவிக்கின்றன. சட்டவிரோத நடவடிக்கைகள் தடுப்பு சட்டம் (UAPA) மற்றும் பாரதிய நியாய சன்ஹிதா 2023 ஆகிய சட்டங்களின் கீழ் அவருக்கு எதிராக வழக்கு பதிவு செய்யப்பட்டுள்ளது.
யாசிர் தார், இந்த குண்டுவெடிப்பு தாக்குதலை திட்டமிடும் சதியில் முக்கிய பங்கு வகித்ததாகவும், டாக்டர் உமருடன் நெருங்கிய தொடர்பில் இருந்ததாகவும் புலனாய்வு அமைப்புகள் கூறுகின்றன. மேலும், தற்கொலை தாக்குதல் உள்ளிட்ட தீவிர நடவடிக்கைகளில் ஈடுபடத் தயாராக இருப்பதாக அவர் உறுதிமொழி எடுத்திருந்தது விசாரணையில் வெளிவந்துள்ளது. இதனால், இந்த தாக்குதலின் பின்னணியில் செயல்பட்ட குழுவின் பரவலான வலையமைப்பு குறித்து NIA மேலும் தீவிரமாக விசாரித்து வருகிறது.
யாசிர் தார் கைது செய்யப்பட்டதன் மூலம், இந்த வழக்கில் முக்கியமான தகவல்கள் வெளிவரும் வாய்ப்பு இருப்பதாக புலனாய்வு வட்டாரங்கள் எதிர்பார்க்கின்றன. தாக்குதலின் முழு சதி, நிதி ஆதாரம், வெளிநாட்டு தொடர்புகள் உள்ளிட்ட அம்சங்கள் குறித்து விசாரணை தொடர்கிறது.
