டிட்வா புயல் தாக்கம்: சென்னையில் நாளை 54 விமானங்கள் ரத்து – பயணிகளுக்கு அவசர அறிவிப்பு
டிட்வா புயல் இலங்கையை கடந்து தமிழக கடலோர பகுதிகளை வேகமாக நெருங்கிக் கொண்டிருப்பதால், சென்னை உள்ளிட்ட பல இடங்களில் பலத்த காற்று வீசத் தொடங்கியுள்ளது. இதன் விளைவாக, முன்னெச்சரிக்கை நடவடிக்கையாக சென்னையிலிருந்து நாளை புறப்பட வேண்டிய பல விமான சேவைகள் ரத்து செய்யப்பட்டுள்ளன.
சென்னையிலிருந்து திருச்சி, மதுரை, தூத்துக்குடி உள்ளிட்ட உள்நாட்டு நகரங்களுக்கு செல்லும் அனைத்து ATR வகை விமானங்களும் ரத்து செய்யப்பட்டிருப்பதாக விமான நிலைய அதிகாரிகள் தெரிவித்துள்ளனர். மேலும் சென்னைக்கு வரும் மற்றும் புறப்படும் மொத்தம் 54 விமான சேவைகள் நாளைய தினம் நிறுத்தப்பட்டுள்ளன.
இந்த ரத்துபட்ட சேவைகளில் பெரும்பாலானவை மதுரை, திருச்சிராப்பள்ளி, தூத்துக்குடி, சேலம், பெங்களூரு, ஹைதராபாத் மற்றும் இலங்கையின் யாழ்ப்பாணம் நோக்கி செல்லும் விமானங்களாகும். காலை முதல் இரவு வரை ஷெட்யூல் செய்யப்பட்டிருந்த இந்த விமானங்கள் கடுமையான புயல் காற்று, இடி–மின்னல், பலத்த மழை போன்ற மோசமான வானிலை காரணமாக நிறுத்தப்பட்டுள்ளன.
ATR வகை விமானங்கள் பொதுவாக 25,000 அடி உயரத்திற்கும் கீழே பறப்பதால், புயல் மற்றும் கனமழை நேரங்களில் அதன் செயல்திறன் பாதிக்கப்படும் வாய்ப்பு அதிகம். இதனால் பயணிகள் பாதுகாப்பை முன்னிட்டே சேவைகள் ரத்து செய்யப்பட்டதாக அதிகாரிகள் கூறியுள்ளனர்.
வானிலை மேலும் மோசமாவிட்டால் கூடுதலான விமானங்களும் ரத்து செய்யப்படும் சாத்தியம் இருப்பதாகவும், பயணிகள் விமான நிலையத்திற்குப் புறப்படுவதற்கு முன் தங்கள் விமான நிலையை சம்பந்தப்பட்ட விமான நிறுவனங்களிடம் உறுதி செய்து கொள்ள வேண்டுமெனவும் அறிவுறுத்தப்பட்டுள்ளது.
