டிட்வா புயல் பேரழிவு: இலங்கையில் அவசரநிலை அறிவிப்பு – உயிரிழப்பு 123 ஆக உயர்வு
டிட்வா புயல் இலங்கையில் ஏற்படுத்திய பேரழிவால் பல்வேறு மாகாணங்களில் கடும் சேதாரம் ஏற்பட்டுள்ளது. வெள்ளம், நிலச்சரிவு மற்றும் பலத்த காற்றால் லட்சக்கணக்கான மக்கள் பாதிக்கப்பட்டுள்ளனர். புயலுக்கு பலியானவர்களின் எண்ணிக்கை தற்போது 123 ஆக உயர்ந்துள்ளது.
மேலும் 130-க்கும் மேற்பட்டோர் காணாமல் போயுள்ளனர். அவர்களைத் தேடும் மீட்பு பணிகள் ராணுவம், பேரிடர் மேலாண்மை குழுக்கள் மற்றும் உள்ளூர் நிர்வாகத்தின் உதவியுடன் தீவிரமாக நடைபெற்று வருகின்றன.
புயல் தாக்கம் கடுமையாக உள்ளதால், நாடு முழுவதும் அவசரநிலை பிரகடனப்படுத்தப்பட்டுள்ளது. குடிநீர், மின்சாரம், போக்குவரத்து வசதிகள் உள்ளிட்ட பல பொதுசேவைகள் செயலிழந்துள்ளன.
விமான சேவைகளில் பாதிப்பு
வானிலை மோசமடைந்ததால், துபாயில் இருந்து இந்தியாவுக்கு புறப்பட்ட ஒரு சர்வதேச விமானம், பாதுகாப்பு காரணமாக கொழும்பில் அவசர தரையிறக்கம் செய்யப்பட்டது. அந்த விமானத்தில் இருந்த 300-க்கும் மேற்பட்ட பயணிகள் விமான நிலையத்திலேயே தங்க வைக்கப்பட்டுள்ளனர்.
மீட்பு நடவடிக்கைகள்
கலாயோ பகுதியில் வெள்ளத்தில் சிக்கிய பஸ் ஒன்றில் இருந்த 68 பேரை இலங்கை ராணுவம் பாதுகாப்பாக மீட்டுள்ளது.
டிட்வா புயல் வடக்கு மற்றும் வடமேற்கு திசையில் நகர்ந்து கொண்டிருக்கிறது என இலங்கை வானிலை ஆய்வு மையம் தெரிவித்துள்ளது.
இந்திய தூதரகத்தின் அவசர உதவி மையம்
இலங்கையில் உள்ள இந்தியர்களுக்கு உதவ, கொழும்பில் உள்ள பண்டாரநாயக்கே சர்வதேச விமான நிலையத்தில் இந்திய தூதரகம் அவசர உதவி மையத்தை அமைத்துள்ளது.
அங்கு உணவு, குடிநீர், மருத்துவ உதவி உள்ளிட்ட அனைத்து ஆதரவுகளும் வழங்கப்படுகின்றன.
அவசர உதவி எண் (இந்தியர்களுக்காக): +94 773727832
உதவி தேவைப்படுபவர்கள் உடனடியாக இந்த எண்ணை தொடர்புகொள்ளலாம்.
