சென்னை,
தமிழ்நாடு சட்டமன்றத் தேர்தலை முன்னிட்டு வேட்புமனு தாக்கல் இன்றுடன் நிறைவடைந்துள்ளது. மாநிலம் முழுவதும் அரசியல் கட்சிகள் தீவிரமாக களமிறங்கியுள்ள நிலையில், தேர்தல் களம் பரபரப்பின் உச்சத்தை எட்டியுள்ளது.
வருகிற 23ஆம் தேதி நடைபெற உள்ள தேர்தலில் திமுக கூட்டணி, அதிமுக கூட்டணி, நாம் தமிழர் கட்சி மற்றும் தமிழக வெற்றிக் கழகம் ஆகியவற்றுக்கிடையே நான்கு முனை போட்டி நிலவி வருகிறது. வேட்பாளர்கள் வீடு வீடாக சென்று வாக்கு சேகரிப்பில் ஈடுபட்டு வருவதுடன், கட்சி தலைவர்களும் சூறாவளி பிரசாரத்தில் ஈடுபட்டு வருகின்றனர்.
வேட்புமனு தாக்கல் கடந்த 30ஆம் தேதி தொடங்கியது. முதல் நாளிலேயே முதலமைச்சர் மு.க. ஸ்டாலின், தவெக தலைவர் விஜய், நாம் தமிழர் கட்சி தலைவர் சீமான் ஆகியோர் தங்களது வேட்புமனுக்களை தாக்கல் செய்தனர். இறுதி நாளான இன்று, அதிமுக பொதுச்செயலாளர் எடப்பாடி பழனிசாமி, தேமுதிக பொதுச்செயலாளர் பிரேமலதா, தமிழக காங்கிரஸ் தலைவர் செல்வப் பெருந்தகை உள்ளிட்டோர் மனு தாக்கல் செய்தனர்.
அதேபோல் பல்வேறு முக்கிய தலைவர்களும் தங்களது தொகுதிகளில் வேட்புமனு தாக்கல் செய்தனர். எடப்பாடி தொகுதியில் எடப்பாடி பழனிசாமி, கோவை வடக்கில் வானதி சீனிவாசன், சாத்தூரில் நயினார் நாகேந்திரன், மயிலாப்பூரில் தமிழிசை சவுந்தரராஜன் உள்ளிட்டோர் மனு தாக்கல் செய்தனர்.
மேலும், அவிநாசியில் எல்.முருகன், விருத்தாசலத்தில் பிரேமலதா விஜயகாந்த், தர்மபுரியில் சவுமியா அன்புமணி உள்ளிட்ட பலரும் வேட்புமனு தாக்கல் செய்தனர். பல இடங்களில் கட்சி ஆதரவாளர்கள் பெருமளவில் திரண்டதால், தேர்தல் அலுவலகங்களில் கூட்ட நெரிசல் ஏற்பட்டது. இதனை கட்டுப்படுத்த டோக்கன் முறை நடைமுறைப்படுத்தப்பட்டது.
அடுத்த கட்டமாக, தாக்கல் செய்யப்பட்ட வேட்புமனுக்கள் நாளை பரிசீலனை செய்யப்பட உள்ளன. விதிமுறைகளை பின்பற்றாத மனுக்கள் நிராகரிக்கப்படும். அதன்பின், மனு திரும்ப பெறுவதற்கான கடைசி நாள் 9ஆம் தேதி என அறிவிக்கப்பட்டுள்ளது. அதே நாளில் இறுதி வேட்பாளர் பட்டியல் வெளியிடப்படும்.
மொத்தத்தில், வேட்புமனு தாக்கல் நிறைவடைந்துள்ள நிலையில், தமிழக தேர்தல் களம் இறுதி கட்டத்தை நோக்கி வேகமாக நகர்ந்து வருகிறது.
