மேற்காசியாவில் நிலவி வரும் பதற்றம் புதிய கட்டத்தை எட்டியுள்ளது. ஈரான் மீது அமெரிக்கா மற்றும் இஸ்ரேல் இணைந்து நடத்தியதாக கூறப்படும் வான்வழி தாக்குதல்கள் பெரும் உயிரிழப்புகளை ஏற்படுத்தியுள்ளன. இந்த தாக்குதலில் பெண்கள், குழந்தைகள் உள்ளிட்ட நூற்றுக்கணக்கானோர் உயிரிழந்ததாக தகவல்கள் தெரிவிக்கின்றன. மேலும், ஈரானின் பாதுகாப்புத்துறை அமைச்சர் அமீர் நசீர்ஜடே மற்றும் இஸ்லாமிய புரட்சிகர காவல்படை தளபதி முகமது பாக்பூர் ஆகியோர் உயிரிழந்ததாக கூறப்படுகிறது.
ஈரானின் உச்ச தலைவர் அயதுல்லா அலி காமேனி மற்றும் அவரது குடும்பத்தினரும் தாக்குதலில் கொல்லப்பட்டதாக தகவல்கள் வெளியாகியுள்ளன. இதை ஈரான் அதிகாரப்பூர்வமாக உறுதி செய்துள்ளதாக தெரிவிக்கப்படுகிறது. தொடக்க கட்ட தாக்குதலிலேயே 40-க்கும் மேற்பட்ட மூத்த ராணுவ அதிகாரிகள் உயிரிழந்ததாக இஸ்ரேல் பாதுகாப்புப் படை தெரிவித்துள்ளது.
இந்த சூழ்நிலையில், லெபனானில் செயல்படும் ஹிஸ்புல்லா அமைப்பு இஸ்ரேல் மீது பதிலடி நடவடிக்கைகளில் ஈடுபட்டதாக தகவல்கள் வெளியாகியுள்ளன. இதனைத் தொடர்ந்து, ஹிஸ்புல்லாவின் பல்வேறு கட்டுப்பாட்டு மையங்கள், ஏவுதளங்கள் மற்றும் மூத்த அதிகாரிகள் தங்கியிருந்த இடங்களை குறிவைத்து இஸ்ரேல் ராணுவம் தாக்குதல் நடத்தியதாக கூறப்பட்டுள்ளது.
இஸ்ரேல் பாதுகாப்புப் படையின் சர்வதேச செய்தித் தொடர்பாளர் லெப்டினன்ட் கர்னல் நதாவ் ஷோஷானி வெளியிட்ட வீடியோ அறிக்கையில், “வெல்ல முடியாத ஒரு போரில் ஹிஸ்புல்லா தானாகவே நுழைந்துள்ளது. ஈரானுக்கு எதிரான நடவடிக்கையின் போது, ஹிஸ்புல்லாவிடம் இருந்து தாக்குதல் வரும் என்பதற்காக முன்கூட்டியே தயார் நிலையில் இருந்தோம். அதனால் உடனடியாக பதிலடி கொடுத்தோம்” என்று தெரிவித்துள்ளார்.
லெபனானில் உள்ள பல இலக்குகளை குறிவைத்து மேற்கொள்ளப்பட்ட பதிலடி தாக்குதல்கள், மத்திய கிழக்கில் நிலவும் பாதுகாப்பு சூழ்நிலையை மேலும் பதற்றமடையச் செய்துள்ளன. இஸ்ரேல்–ஈரான் மோதல் தற்போது பிராந்திய அளவிலான போருக்கான வாய்ப்பை உருவாக்கியுள்ளது என அரசியல் ஆய்வாளர்கள் கருத்து தெரிவிக்கின்றனர்.
இந்த தாக்குதல் மற்றும் பதிலடி நடவடிக்கைகள் தொடர்ந்தால், மத்திய கிழக்கில் விரிவான போர் வெடிக்கும் அபாயம் அதிகரிக்கும் என சர்வதேச சமூகம் கவலை வெளியிட்டுள்ளது. பல நாடுகள் அமைதிக்கான அழைப்பை விடுத்துள்ளன.
மொத்தத்தில், ஈரான்–இஸ்ரேல் மோதல் மற்றும் அதில் ஹிஸ்புல்லா ஈடுபாடு, பிராந்திய அரசியல் மற்றும் பாதுகாப்பு நிலையை மிகுந்த அசாதாரண நிலைக்கு கொண்டு சென்றுள்ளது. அடுத்த கட்டத்தில் எவ்வாறு முன்னேற்றம் ஏற்படும் என்பது உலக கவனத்தின் மையமாக உள்ளது.
