திருச்சி,
திருச்சி பஞ்சப்பூர் பகுதியில் நடைபெற்ற மத்திய அரசின் பிரமாண்ட நிகழ்ச்சியில் பிரதமர் நரேந்திர மோடி கலந்து கொண்டு தமிழ்நாட்டிற்கான பல்வேறு வளர்ச்சி திட்டங்களை தொடங்கி வைத்து அடிக்கல் நாட்டினார். மொத்தம் சுமார் ரூ.5,650 கோடி மதிப்பிலான திட்டங்கள் இந்த நிகழ்ச்சியில் அறிவிக்கப்பட்டு தொடங்கப்பட்டன. பெட்ரோலியம், இயற்கை எரிவாயு, சாலை வசதி, ரெயில்வே உள்ளிட்ட பல்வேறு துறைகளை உள்ளடக்கிய முக்கிய திட்டங்கள் இதில் இடம்பெற்றுள்ளன.
இந்த நிகழ்ச்சியில் முதன்மையாக நீலகிரி மற்றும் ஈரோடு மாவட்டங்களை உள்ளடக்கிய நகர எரிவாயு விநியோக வலையமைப்பு திட்டத்திற்குப் பிரதமர் மோடி அடிக்கல் நாட்டினார். பாரத் பெட்ரோலியம் கார்ப்பரேஷன் லிமிடெட் நிறுவனத்தின் சார்பில் சுமார் ரூ.3,680 கோடி முதலீட்டில் இந்த திட்டம் செயல்படுத்தப்படுகிறது. இந்த திட்டம் நிறைவேறிய பிறகு அந்த பகுதிகளில் வீடுகள், வணிக நிறுவனங்கள் மற்றும் தொழிற்சாலைகளுக்கு இயற்கை எரிவாயு வசதி கிடைக்கும் என தெரிவிக்கப்பட்டுள்ளது. இதன் மூலம் சுற்றுச்சூழலுக்கு உகந்த எரிசக்தி பயன்பாடு அதிகரிக்கும் என்றும் கூறப்படுகிறது.
அதேபோல் சென்னையில் உள்ள மணலி பகுதியில் இந்தியன் ஆயில் கார்ப்பரேஷன் நிறுவனம் அமைத்துள்ள மசகு எண்ணெய் கலவை ஆலையையும் பிரதமர் மோடி நாட்டுக்கு அர்ப்பணித்தார். ஆண்டுக்கு 6 லட்சத்து 72 ஆயிரம் மெட்ரிக் டன் உற்பத்தி திறன் கொண்ட இந்த ஆலை சுமார் ரூ.1,490 கோடி முதலீட்டில் உருவாக்கப்பட்டுள்ளது. இந்த ஆலை செயல்படத் தொடங்குவதன் மூலம் இந்தியாவின் மசகு எண்ணெய் உற்பத்தித் திறன் மேலும் வலுப்பெறும் என அதிகாரிகள் தெரிவித்துள்ளனர்.
இதற்குடன், கிராமப்புற சாலை வசதிகளை மேம்படுத்தும் நோக்கில் பிரதமரின் கிராம சாலைகள் திட்டத்தின் கீழ் தமிழ்நாட்டில் 370 கிலோமீட்டர் நீளமுள்ள 89 கிராமப்புற சாலைகளையும் பிரதமர் மோடி திறந்து வைத்தார். இந்த சாலைகள் மூலம் பல கிராமங்கள் முக்கிய நகரங்களுடன் இணைக்கப்படுவதால் போக்குவரத்து வசதி மேம்படும் என எதிர்பார்க்கப்படுகிறது.
மேலும் தேசிய நெடுஞ்சாலை எண் 81-ல் கங்கைகொண்ட சோழபுரம் அருகே புதிய பசுமை புறவழிச்சாலை அமைக்கும் திட்டத்திற்கும் பிரதமர் மோடி அடிக்கல் நாட்டினார். இந்த திட்டம் செயல்படுத்தப்பட்டால் அந்த பகுதியின் போக்குவரத்து நெரிசல் குறைந்து சாலை வசதி மேம்படும் என தெரிவிக்கப்பட்டுள்ளது.
இதனுடன் பல புதிய ரெயில் சேவைகளையும் பிரதமர் மோடி கொடியசைத்து தொடங்கி வைத்தார். அதன்படி நாகர்கோவில் – சார்லபள்ளி மற்றும் போத்தனூர் – தன்பாத் இடையே அம்ரித் பாரத் விரைவு ரெயில்கள் இயக்கப்படுகின்றன. மேலும் ராமேசுவரம் – மங்களூரு சென்டிரல், திருநெல்வேலி – மங்களூரு எக்ஸ்பிரஸ் ரெயில்கள் மற்றும் மயிலாடுதுறை – திருவாரூர் – காரைக்குடி பயணிகள் ரெயில் சேவையும் தொடங்கப்பட்டுள்ளது.
இந்த புதிய ரெயில் சேவைகள் மற்றும் கட்டமைப்பு வளர்ச்சி திட்டங்கள் தமிழ்நாட்டின் போக்குவரத்து மற்றும் தொழில்துறை வளர்ச்சிக்கு பெரும் உதவியாக இருக்கும் என கூறப்படுகிறது. மொத்தத்தில் ரூ.5,650 கோடி மதிப்பிலான இந்த வளர்ச்சி திட்டங்கள் தமிழகத்தின் பல்வேறு பகுதிகளில் பொருளாதார முன்னேற்றத்தையும் அடிப்படை வசதிகளின் மேம்பாட்டையும் ஏற்படுத்தும் என அதிகாரிகள் தெரிவித்துள்ளனர்.
