புதுடெல்லி: மூடிஸ் நிறுவனம் வெளியிட்டுள்ள ‘குளோபல் மேக்ரோ அவுட்லுக் 2026-27’ அறிக்கையில் கூறியிருப்பதாவது:
“வலுவான உட்கட்டமைப்பு மேம்பாடு, பல்துறை ஏற்றுமதி வளர்ச்சி மற்றும் உறுதியான உள்நாட்டு தேவை ஆகியவை இந்தியாவின் பொருளாதார மீள்தன்மைக்கு முக்கிய ஆதாரங்களாக உள்ளன.
இவற்றின் பலனாக, இந்தியாவின் பொருளாதார வளர்ச்சி 2027 வரை 6.5 சதவீதமாக நிலைத்திருக்கும் என எதிர்பார்க்கப்படுகிறது. உலகளவில் நிலவும் அசாதாரண சூழ்நிலைகள், வர்த்தகத் தடைகள், குறிப்பாக சில இந்திய ஏற்றுமதிகளுக்கு அமெரிக்கா விதித்த அதிக வரி போன்ற சவால்கள் இருந்தபோதிலும், இந்தியாவின் வளர்ச்சி மிக வலுவான மீள்தன்மையைக் காட்டியுள்ளது.”
சில பொருட்களுக்கு அமெரிக்கா விதித்த 50% வரிகளை எதிர்கொள்வதில் இந்திய ஏற்றுமதியாளர்கள் வெற்றி பெற்றுள்ளனர். அவர்கள் அந்த ஏற்றுமதிகளை பல்வேறு புதிய சந்தைகளுக்கு மாற்றி விற்பதில் சாதனை எட்டியுள்ளனர். செப்டம்பர் மாதத்தில் அமெரிக்காவுக்கான இந்திய ஏற்றுமதி 11.9% குறைந்த போதிலும், ஒட்டுமொத்த ஏற்றுமதி செப்டம்பரில் 6.75% உயர்ந்துள்ளதாக அறிக்கையில் கூறப்பட்டுள்ளது.
