சென்னை:
தமிழகத்தில் கோடைகாலம் தொடங்கியுள்ள நிலையில், அதிக வெப்பநிலை மற்றும் வறட்சி நிலை பல்வேறு அபாயங்களை உருவாக்கும் சூழல் நிலவுகிறது. இதனை முன்னிட்டு, பொதுமக்கள் மற்றும் அரசுத் துறைகள் விழிப்புணர்வுடன் செயல்பட வேண்டும் என தமிழக காங்கிரஸ் தலைவர் செல்வப்பெருந்தகை வலியுறுத்தியுள்ளார்.
அவர் வெளியிட்டுள்ள அறிக்கையில், கோடைகாலத்தில் வெப்பஅலை தாக்கம் அதிகரிப்பதால் மனித உயிர்களுக்கு ஆபத்து ஏற்படும் வாய்ப்பு அதிகம் இருப்பதாகக் குறிப்பிட்டுள்ளார். அதேபோல், வறட்சியால் தீ விபத்துகள் ஏற்படும் அபாயமும் அதிகரிக்கிறது. எனவே, பொதுமக்கள் தங்கள் வீடுகள் மற்றும் வணிக நிறுவனங்களில் பாதுகாப்பு நடவடிக்கைகளை கடைப்பிடிக்க வேண்டியது அவசியம் என அவர் தெரிவித்துள்ளார்.
மின்கம்பிகள் மற்றும் மின்சாதனங்கள் பாதுகாப்பாக உள்ளனவா என்பதை சீராய்வு செய்ய வேண்டும். அதிக மின்சார பயன்பாட்டை தவிர்க்க வேண்டும். குழந்தைகள் தீப்பெட்டி மற்றும் பட்டாசு போன்ற பொருட்களுடன் விளையாடுவதை கண்காணிக்க வேண்டும். மேலும், வெளிப்புற பகுதிகளில் சிகரெட் போன்றவற்றை கவனக்குறைவாக எறிவது தீ விபத்துகளுக்கு காரணமாகும் என்பதால் அதனை தவிர்க்க வேண்டும் என அறிவுறுத்தப்பட்டுள்ளது.
வீடுகளில் சிறிய அளவிலான தீயணைப்பு கருவிகளை வைத்திருப்பது பாதுகாப்பு நடவடிக்கையாக இருக்கும் என்றும் அவர் கூறியுள்ளார். இதன் மூலம் தீ விபத்துகளை ஆரம்ப கட்டத்திலேயே கட்டுப்படுத்த முடியும்.
மேலும், தீயணைப்பு மற்றும் மீட்பு பணிகள் மேற்கொள்ளும் துறைகள் கோடைகால சிறப்பு கண்காணிப்பு நடவடிக்கைகளை தீவிரப்படுத்த வேண்டும். தீயணைப்பு வாகனங்கள், நீர்த் தொட்டிகள் மற்றும் அவசர உபகரணங்கள் அனைத்தும் முழுமையாக செயல்பாட்டில் உள்ளனவா என்பதை உறுதி செய்ய வேண்டும். பொதுமக்களுக்கான விழிப்புணர்வு முகாம்கள் நடத்தி அவசர சேவைகள் பற்றிய தகவல்களை பரப்ப வேண்டும்.
வெடி பொருட்கள் தயாரிக்கும் நிறுவனங்கள் பாதுகாப்பு விதிமுறைகளை கண்டிப்பாக பின்பற்ற வேண்டும். குறிப்பாக வெப்பநிலை கட்டுப்பாடு, பொருட்களின் பாதுகாப்பான சேமிப்பு மற்றும் மின்சார பாதுகாப்பு நடவடிக்கைகள் கடைப்பிடிக்கப்பட வேண்டும். தொழிலாளர்களுக்கு உரிய பாதுகாப்பு பயிற்சிகள் வழங்கப்பட வேண்டும் என்றும் அவர் தெரிவித்துள்ளார்.
அரசு மற்றும் உள்ளாட்சி அமைப்புகள் வெப்பஅலை குறித்து முன்னெச்சரிக்கை அறிவிப்புகளை வெளியிட வேண்டும். மேலும், பொதுமக்களுக்கு தேவையான குடிநீர் வசதிகள் மற்றும் மருத்துவ முகாம்கள் ஏற்பாடு செய்யப்பட வேண்டும். காடுகளில் தீ தடுப்பு நடவடிக்கைகளும் தீவிரப்படுத்தப்பட வேண்டும்.
கோடைகாலத்தில் அலட்சியம் காட்டுவது பெரிய பாதிப்புகளை ஏற்படுத்தும் என்பதால், ஒவ்வொருவரும் பொறுப்புணர்வுடன் செயல்பட்டால் தீ விபத்துகள் மற்றும் உயிரிழப்புகளை தவிர்க்க முடியும் என அவர் வலியுறுத்தியுள்ளார்.
