பெண்கள் ஆக்கி இந்தியா லீக்: ஷிராச்சி பெங்கால் டைகர்ஸை 5–0 என வீழ்த்தி ராஞ்சி ராயல்ஸ் அபார வெற்றி
ராஞ்சி:
பெண்கள் ஆக்கி இந்தியா லீக் போட்டியின் 2-வது சீசன், ஜார்கண்ட் மாநிலத் தலைநகர் ராஞ்சியில் விறுவிறுப்பாக நடைபெற்று வருகிறது. நான்கு அணிகள் பங்கேற்றுள்ள இந்த லீக் போட்டியில், நேற்று இரவு நடைபெற்ற 3-வது லீக் ஆட்டத்தில், உள்ளூர் அணியான ராஞ்சி ராயல்ஸ், ஷிராச்சி பெங்கால் டைகர்ஸ் அணியை எதிர்கொண்டது.
ஆட்டத்தின் தொடக்கம் முதலே ராஞ்சி ராயல்ஸ் அணி முழுமையான ஆதிக்கம் செலுத்தியது. வேகமான பந்தாட்டம், துல்லியமான பாஸிங் மற்றும் உறுதியான பாதுகாப்பு ஆகியவற்றால் எதிரணியை கட்டுக்குள் வைத்த ராஞ்சி அணி, ஆட்டம் முழுவதும் கோல் வாய்ப்புகளை உருவாக்கி ரசிகர்களை உற்சாகப்படுத்தியது. அதன் விளைவாக, பெங்கால் டைகர்ஸ் அணிக்கு எந்த வாய்ப்பும் வழங்காமல் 5–0 என்ற கோல் கணக்கில் அபார வெற்றியைப் பதிவு செய்தது.
ராஞ்சி அணியின் கோல் வேட்டை 10-வது நிமிடத்தில் தொடங்கியது. ஹன்னா காட்டர் அபாரமான புல் மூலம் முதல் கோலை அடித்து அணிக்கு முன்னிலை அளித்தார். அதனைத் தொடர்ந்து 14-வது நிமிடத்தில் பியூட்டி டங்டங் சிறப்பான முயற்சியுடன் கோல் அடித்து முன்னிலையை அதிகரித்தார். முதல் பாதியிலேயே ராஞ்சி அணி ஆட்டத்தை தன் கட்டுப்பாட்டில் கொண்டு வந்தது.
இரண்டாம் பாதியிலும் அதே வேகத்தை தொடர்ந்த ராஞ்சி ராயல்ஸ், 33 மற்றும் 57-வது நிமிடங்களில் வான் டெர் ஹேடே மூலம் இரண்டு கோல்களைப் பெற்றது. இடையே 44-வது நிமிடத்தில் சங்கிதா குமாரி அழகான கோலை அடித்து அணியின் வெற்றியை உறுதி செய்தார். பெங்கால் டைகர்ஸ் அணியின் பாதுகாப்பு வரிசை ராஞ்சி அணியின் தாக்குதலை சமாளிக்க முடியாமல் திணறியது.
இந்தப் போட்டி, லீக்கில் ராஞ்சி ராயல்ஸ் அணியின் இரண்டாவது ஆட்டமாகும். இந்த வெற்றியின் மூலம், அந்த அணிக்கு இது முதலாவது வெற்றி என்பதும் குறிப்பிடத்தக்கது. இவ்வெற்றி ராஞ்சி அணியின் புள்ளிப்பட்டியலில் முன்னேற்றத்திற்கு உதவியுள்ளதுடன், அடுத்தடுத்த போட்டிகளுக்கான நம்பிக்கையையும் அதிகரித்துள்ளது.
இந்நிலையில், லீக்கின் அடுத்த ஆட்டமாக இன்று இரவு 7.30 மணிக்கு, எஸ்.ஜி. பைப்பர்ஸ் மற்றும் சூர்மா ஆக்கி கிளப் அணிகள் மோதுகின்றன. இந்த ஆட்டமும் ரசிகர்களிடையே பெரும் எதிர்பார்ப்பை ஏற்படுத்தியுள்ளது.
