சென்னை:
பொங்கல் பண்டிகையை முன்னிட்டு, பொங்கல் போனஸ் வழங்கி, பணி நிரந்தரம் செய்ய வேண்டும் என்று தமிழக முதல்வர் மு.க. ஸ்டாலினிடம் பகுதிநேர ஆசிரியர்கள் கோரிக்கை வைத்துள்ளனர்.
பகுதிநேர ஆசிரியர்கள் கூட்டமைப்பின் மாநில ஒருங்கிணைப்பாளர் எஸ்.செந்தில்குமார், திமுக ஆட்சியிலாவது பகுதிநேர ஆசிரியர்களின் நீண்டநாள் கோரிக்கையை நிறைவேற்ற வேண்டும் என்று தெரிவித்துள்ளார்.
தற்போது 12 ஆயிரம் பகுதிநேர ஆசிரியர்கள் உடற்கல்வி, ஓவியம், கணினி அறிவியல், தையல், இசை, தோட்டக்கலை, கட்டிடக்கலை, வாழ்க்கைக் கல்வி போன்ற பாடங்களில் பணிபுரிந்து வருகின்றனர். அவர்கள் மாதம் வெறும் ₹12,500 தொகுப்பூதியம் மட்டுமே பெற்று வருகின்றனர்.
அவர்களுக்கு மே மாத சம்பளம், மருத்துவ காப்பீடு, ஓய்வூதியம், வருங்கால வைப்பு நிதி, பொங்கல் போனஸ் உள்ளிட்ட அரசு சலுகைகள் வழங்கப்படவில்லை. இதனால் வாழ்வாதாரம் கடுமையாக பாதிக்கப்பட்டுள்ளதாக ஆசிரியர்கள் கூறியுள்ளனர்.
செந்தில்குமார் கூறியதாவது:
“நிரந்தர சிறப்பாசிரியர்களுக்கு வழங்கப்படும் சம்பளம் மற்றும் சலுகைகள், உச்ச நீதிமன்ற தீர்ப்பின் அடிப்படையில் ‘சம வேலைக்கு சம ஊதியம்’ என்ற அடிப்படையில் பகுதிநேர ஆசிரியர்களுக்கும் வழங்கப்பட வேண்டும்.”
அவர் மேலும் கூறினார்:
“கலைஞர் மகளிர் உரிமைத் திட்டம், பொங்கல் பரிசு போன்றவற்றிற்கு ஆயிரக்கணக்கான கோடிகள் ஒதுக்கப்பட்டுள்ள நிலையில், சுமார் ₹300 கோடி ரூபாய் ஒதுக்கி பகுதிநேர ஆசிரியர்களை பணி நிரந்தரம் செய்து, பொங்கல் போனஸ் வழங்க வேண்டும். இதை அரசு கொள்கை முடிவாக எடுத்து, திமுக தேர்தல் வாக்குறுதி 181-ஐ அரசாணையாக வெளியிட வேண்டும்.”
பல ஆண்டுகளாக பணியாற்றி வரும் ஆசிரியர்கள், பொங்கல் போனஸ், மே மாத சம்பளம், நிவாரண நிதி மற்றும் ஓய்வூதியம் போன்ற அடிப்படை சலுகைகளை எதிர்பார்த்துள்ளனர்.
அவர்கள் கூறியதாவது:
“முதல்வர் 2021 தேர்தலில் கொடுத்த பணி நிரந்தர வாக்குறுதியை நிறைவேற்றி இருந்தால் இன்று வாழ்வாதாரம் சீராகியிருக்கும். தற்போதைய உயர்ந்த விலைவாசியில் ரூ.12,500 சம்பளத்தில் வாழ முடியவில்லை.”
பணி நிரந்தரம் மட்டுமே நிரந்தர தீர்வு என்று ஆசிரியர்கள் வலியுறுத்தி, அதற்கான நடவடிக்கையை அரசு விரைவில் எடுக்க வேண்டும் என கோரிக்கை விடுத்துள்ளனர்.
