சென்னை:
பெண்களின் நலன் மற்றும் பாதுகாப்பை மேம்படுத்தும் நோக்கில் தமிழக அரசு செயல்படுத்தி வரும் மகளிர் விடியல் பயண திட்டத்தின் ஒரு பகுதியாக, சென்னையில் புதிதாக 5 வழித்தடங்களில் 10 ‘மகளிர் மட்டும் – பிங்க் பேருந்துகள்’ இயக்கப்பட உள்ளன. இதற்கான அறிவிப்பை Chennai Metropolitan Transport Corporation (சென்னை மாநகர போக்குவரத்து கழகம்) வெளியிட்டுள்ளது.
தமிழக அரசு பெண்களின் சமூக மற்றும் பொருளாதார வளர்ச்சியை ஊக்குவிக்கும் வகையில், 2021-ஆம் ஆண்டு மகளிர் விடியல் பயண திட்டத்தை அறிமுகப்படுத்தியது. இந்த திட்டத்தின் கீழ், அரசு மாநகர பேருந்துகளில் பெண்கள் கட்டணமின்றி பயணம் செய்து வருகின்றனர். இந்தத் திட்டம் பெண்களிடையே பெரும் வரவேற்பைப் பெற்றுள்ளதுடன், அரசு பேருந்துகளை பயன்படுத்தும் பெண் பயணிகளின் எண்ணிக்கையும் தொடர்ந்து அதிகரித்து வருகிறது.
இந்த நிலையில், மகளிர் விடியல் பயண திட்டத்தை மேலும் விரிவுபடுத்தும் வகையில், சென்னையில் இன்று முதல் ‘மகளிர் மட்டும் – PINK BUS’ சேவை புதிய வழித்தடங்களில் தொடங்கப்பட்டுள்ளது. அதன்படி, எண்ணூரில் இருந்து வள்ளலார் நகர் நோக்கி 56ஏ என்ற வழித்தட எண்ணுடன் பேருந்து இயக்கப்பட உள்ளது.
இதனைத் தவிர,
விவேகானந்தர் இல்லம் பகுதியில் இருந்து கொருக்குப்பேட்டை ரயில் நிலையம் வரை – வழித்தட எண் 32பி,
செங்குன்றம் பகுதியில் இருந்து வள்ளலார் நகர் வரை – வழித்தட எண் 57,
பெரும்பாக்கம் (TNUHDB) பகுதியில் இருந்து தீவுத்திடல் வரை – வழித்தட எண் 102பி,
கண்ணகிநகர் (TNUHDB) பகுதியில் இருந்து தீவுத்திடல் வரை – வழித்தட எண் 102கே
ஆகிய வழித்தடங்களிலும் மகளிர் மட்டும் பிங்க் பேருந்துகள் இயக்கப்படுகின்றன.
ஒவ்வொரு வழித்தடத்திலும் தலா 2 பேருந்துகள் வீதம் இயக்கப்படுவதால், மொத்தமாக 10 பேருந்துகள் சேவையில் ஈடுபடுத்தப்பட்டுள்ளன. இந்த புதிய பேருந்து சேவைகள் மூலம், பெண்கள் பாதுகாப்பாகவும், எளிதாகவும் பயணம் செய்ய முடியும் என போக்குவரத்து கழக அதிகாரிகள் தெரிவித்துள்ளனர்.
இந்த திட்ட விரிவாக்கம், வேலைக்கு செல்லும் பெண்கள், மாணவிகள் மற்றும் தினசரி பயணிகள் மத்தியில் பெரும் வரவேற்பை பெறும் என எதிர்பார்க்கப்படுகிறது.
