சென்னை:
தமிழ்நாடு அரசின் செய்தித் துறை மூலம் “பாரதியார் இல்லம்” என்ற பெயரில் புதிய இன்ஸ்டாகிராம் சமூக வலைதள பக்கம் தொடங்கப்பட்டுள்ளதாக தமிழக அரசு அறிவித்துள்ளது. மகாகவி சுப்பிரமணிய பாரதியாரின் வாழ்க்கை, சிந்தனைகள் மற்றும் படைப்புகளை இன்றைய தலைமுறைக்கு பரப்பும் நோக்கில் இந்த முயற்சி மேற்கொள்ளப்பட்டுள்ளதாக அதிகாரப்பூர்வமாக தெரிவிக்கப்பட்டுள்ளது.
பெண்களின் உரிமை, சமத்துவம் மற்றும் சுதந்திரத்தை வலியுறுத்தும் வகையில் உலகம் முழுவதும் ஆண்டுதோறும் மார்ச் 8 ஆம் தேதி சர்வதேச மகளிர் தினமாகக் கொண்டாடப்படுகிறது. பெண்களின் உரிமைகள் மறுக்கப்பட்ட காலத்திலேயே பெண்ணுரிமை குறித்து வலிமையாகக் குரல் எழுப்பிய கவிஞர்களில் முக்கியமானவர் மகாகவி சுப்பிரமணிய பாரதியார். அவரது கவிதைகள் பெண்களின் சமத்துவம், சுதந்திரம் மற்றும் தன்னம்பிக்கை குறித்து மக்களுக்கு விழிப்புணர்வு ஏற்படுத்தியதாக அரசு குறிப்பிட்டுள்ளது.
1882 ஆம் ஆண்டு டிசம்பர் 11 ஆம் தேதி தூத்துக்குடி மாவட்டம் எட்டயபுரத்தில் பிறந்த பாரதியார், சிறுவயதிலேயே தனது கவித்திறனால் “பாரதி” என்ற பட்டத்தை பெற்றார். தமிழ் இலக்கியத்தில் தனித்துவமான இடத்தைப் பெற்றவர் பாரதியார். அவர் ஒரு கவிஞர் மட்டுமல்லாமல், விடுதலைப் போராட்ட வீரர், சமூகச் சீர்திருத்தவாதி, பெண்கள் விடுதலையின் ஆதரவாளர் மற்றும் தேசிய உணர்வை எழுப்பிய சிந்தனையாளர் என்றும் பாராட்டப்படுகிறார்.
அவரது கவிதைகள் தேசபக்தி, சமத்துவம், சாதி ஒழிப்பு, பெண்மையின் பெருமை மற்றும் மனிதநேயம் போன்ற உயர்ந்த சிந்தனைகளை வெளிப்படுத்துகின்றன. “அச்சமில்லை அச்சமில்லை”, “எண்ணிய முடிதல் வேண்டும்”, “சின்னஞ்சிறு கிளியே”, “வந்தே மாதரம்” போன்ற அவரது பாடல்கள் இன்றும் இளைஞர்களுக்கு உற்சாகம் மற்றும் தன்னம்பிக்கை அளித்து வருகின்றன. தமிழ் மொழியின் இனிமையையும் வீரத்தையும் இணைத்து எழுதிய அவரது படைப்புகள் காலத்தைத் தாண்டி இன்றும் பெரும் தாக்கத்தை ஏற்படுத்துகின்றன.
பாரதியார் தனது வாழ்க்கையின் இறுதி நாட்களில் சென்னை திருவல்லிக்கேணி பகுதியில் பார்த்தசாரதி கோவில் அருகே அமைந்துள்ள வீட்டில் வசித்து வந்தார். அந்த இல்லம் தற்போது “பாரதியார் நினைவு இல்லம்” என தமிழ்நாடு அரசின் செய்தித் துறை மூலம் பராமரிக்கப்பட்டு வருகிறது. இதேபோல் அவர் வாழ்ந்த எட்டயபுரம் மற்றும் வாரணாசி நகரங்களில் உள்ள இல்லங்களும் நினைவு இல்லங்களாக பாதுகாக்கப்பட்டு வருகின்றன.
இந்த நினைவு இல்லங்களில் பாரதியாரின் வாழ்க்கை வரலாறு, முக்கிய நிகழ்வுகள், புகைப்படங்கள் மற்றும் அரிய பொருட்கள் பொதுமக்கள் பார்வைக்கு வைக்கப்பட்டுள்ளன. இதன் மூலம் பாரதியாரின் வாழ்க்கை மற்றும் சிந்தனைகளை இன்றைய தலைமுறையினர் அறிந்து கொள்ளும் வாய்ப்பு ஏற்படுத்தப்பட்டுள்ளது.
இந்நிலையில், பாரதியார் குறித்து மேலும் பல தகவல்களை சமூக ஊடகங்கள் மூலம் இளைஞர்களிடம் கொண்டு சேர்க்கும் நோக்கில் “பாரதியார் இல்லம்” என்ற பெயரில் புதிய இன்ஸ்டாகிராம் பக்கம் தொடங்கப்பட்டுள்ளது. இந்த பக்கத்தில் பாரதியாரின் கவிதைகள், அரிய வரலாற்றுத் தகவல்கள், பழமையான புகைப்படங்கள் மற்றும் காணொளிகள் தொடர்ந்து பதிவேற்றப்பட உள்ளன என்று அரசு தெரிவித்துள்ளது.
எனவே பொதுமக்கள், மாணவர்கள், இளைஞர்கள் உள்ளிட்ட அனைவரும் இந்த இன்ஸ்டாகிராம் பக்கத்தை பின்தொடர்ந்து பயன்பெற வேண்டும் என்றும் தமிழக அரசு கேட்டுக்கொண்டுள்ளது. இந்த முயற்சி பாரதியாரின் சிந்தனைகளை புதிய தலைமுறையினரிடம் கொண்டு செல்லும் ஒரு முக்கியமான முயற்சியாக பார்க்கப்படுகிறது.
