தமிழக சட்டமன்ற தேர்தலுக்கான வாக்கு எண்ணிக்கை பணிகள் தீவிரமாக நடைபெற்று வருகின்றன. மாநிலம் முழுவதும் பதிவான வாக்குகளை எண்ணுவதற்காக மொத்தம் 62 மையங்கள் அமைக்கப்பட்டுள்ளதாக தேர்தல் ஆணையம் தெரிவித்துள்ளது. வரும் மே 4-ஆம் தேதி வாக்குகள் எண்ணப்பட்டு அதே நாளில் தேர்தல் முடிவுகள் அறிவிக்கப்பட உள்ளன.
234 தொகுதிகளை கொண்ட தமிழக சட்டசபைக்கு கடந்த ஏப்ரல் 23-ஆம் தேதி ஒரே கட்டமாக தேர்தல் நடைபெற்றது. இந்த தேர்தலில் மக்கள் உற்சாகமாக கலந்து கொண்டு 85.10 சதவீதம் வாக்குகள் பதிவு செய்துள்ளனர். இது கடந்த தேர்தலை விட அதிகமான வாக்குப்பதிவாக கருதப்படுகிறது.
தேர்தல் முடிந்த உடனேயே அனைத்து தொகுதிகளிலும் பயன்படுத்தப்பட்ட மின்னணு வாக்குப்பதிவு இயந்திரங்கள் மற்றும் விவிபாட் கருவிகள் பலத்த பாதுகாப்புடன் வாக்கு எண்ணும் மையங்களுக்கு கொண்டு செல்லப்பட்டன. தற்போது அவை பாதுகாப்பு அறைகளில் மூன்று அடுக்கு பாதுகாப்புடன் வைக்கப்பட்டுள்ளன.
இந்த தேர்தலில் திமுக, அதிமுக, தமிழக வெற்றிக்கழகம், நாம் தமிழர் கட்சி என நான்கு முனை போட்டி நிலவியது. இதனால் எந்த கட்சி ஆட்சியை கைப்பற்றும் என்ற எதிர்பார்ப்பு மக்கள் மத்தியில் அதிகரித்துள்ளது. தேர்தலுக்கு பிந்தைய கருத்துக்கணிப்புகளும் அரசியல் சூழலை பரபரப்பாக்கியுள்ளன.
வாக்கு எண்ணிக்கைக்காக அமைக்கப்பட்ட 62 மையங்களில் அதிகபட்சமாக மதுரையில் 5 மையங்கள் அமைக்கப்பட்டுள்ளன. சேலம் மற்றும் கடலூரில் தலா 4 மையங்கள் அமைக்கப்பட்டுள்ளன. மற்ற மாவட்டங்களிலும் தேவைக்கேற்ப எண்ணிக்கை மையங்கள் தயார் செய்யப்பட்டுள்ளன.
ஒவ்வொரு மையத்திலும் தேர்தல் அதிகாரிகள், கண்காணிப்பாளர்கள், காவல்துறை, மத்திய பாதுகாப்பு படையினர் உள்ளிட்டோர் பணியில் ஈடுபட உள்ளனர். வாக்கு எண்ணிக்கை முழுமையாக கண்காணிப்பு கேமரா வசதியுடன் நடைபெறவுள்ளது.
மே 4-ஆம் தேதி காலை தொடங்கும் வாக்கு எண்ணிக்கை தமிழகத்தின் அடுத்த அரசை தீர்மானிக்க உள்ளதால், அரசியல் கட்சிகள் மட்டுமின்றி மக்கள் மத்தியிலும் பெரும் எதிர்பார்ப்பு நிலவுகிறது.
