தமிழகச் சட்டமன்றத் தேர்தல் முடிவுகள் வெளியான பிறகு, நடிகர் விஜய் தலைமையிலான தமிழக வெற்றி கழகம் 108 இடங்களில் வெற்றி பெற்று தனிப்பெரும் கட்சியாக உருவெடுத்துள்ளது. ஆனால், பெரும்பான்மைக்கு 118 இடங்கள் தேவைப்படும் நிலையில், ஆட்சியை அமைப்பதற்கு மற்ற கட்சிகளின் ஆதரவு அவசியமாகியுள்ளது. இதனால், தவெக அடுத்த கட்டமாக யாருடன் கைகோர்க்கும் என்ற கேள்வி அரசியல் வட்டாரத்தில் பெரும் விவாதமாக மாறியுள்ளது.
தேர்தல் வாக்கு எண்ணிக்கை தொடங்கிய முதலிலிருந்தே தவெக முன்னிலை வகித்தது. தபால் வாக்குகள் எண்ணப்பட்டதும் அந்த முன்னிலை மேலும் உறுதியானது. இறுதியில் 108 இடங்களைப் பெற்ற தவெக, மாநில அரசியல் சமன்பாட்டையே மாற்றியமைத்துள்ளது. இருந்தாலும், 234 தொகுதிகளில் 118 இடங்கள் கிடைத்தால்தான் தனிப்பெரும்பான்மை கிடைக்கும். அந்த இலக்கை தவெக இன்னும் அடையாததால், கூட்டணி ஆதரவு குறித்து தீவிர பேச்சுகள் நடைபெறத் தொடங்கியுள்ளன.
அரசியல் வட்டாரங்களில், திமுக கூட்டணியில் உள்ள காங்கிரஸ், கம்யூனிஸ்ட் கட்சிகள், தேமுதிக மற்றும் அதிமுக கூட்டணியில் உள்ள பாமக போன்ற கட்சிகளின் ஆதரவை தவெக நாடலாம் என்ற கருத்து வலுத்துள்ளது. குறிப்பாக, தவெகவுக்கு வெறும் 10 இடங்கள் குறைவாக இருப்பதால், சிறிய கட்சிகளின் ஆதரவு கிடைத்தாலே ஆட்சி அமைக்க முடியும் என்ற கணக்கு எழுந்துள்ளது.
இந்த சூழலில், கம்யூனிஸ்ட் கட்சிகள் அதாவது சிபிஐ, சிபிஎம் ஆகியவை, தவெக தரப்பிலிருந்து கூட்டணி ஆட்சி அமைக்க அழைப்பு வந்தால், உடனடியாக முடிவு எடுக்காமல் மாநில செயற்குழு மற்றும் மாநில நிர்வாகக் குழுவில் ஆலோசித்து பிறகே முடிவு செய்வோம் என்று தெரிவித்துள்ளன. இந்த இரு கட்சிகளும் சட்டமன்றத் தேர்தலில் தலா ஒரு இடத்தில் வெற்றி பெற்றுள்ளன என்பதும் குறிப்பிடத்தக்கது.
காங்கிரஸ் கட்சியும் தவெகவுக்கு ஆதரவு அளிப்பது குறித்து ஆலோசித்து வருவதாக தகவல் வெளியாகியுள்ளது. இருப்பினும், இதுவரை தவெக தரப்பிலிருந்து அதிகாரப்பூர்வ அழைப்பு எதுவும் வரவில்லை என்று கூறப்படுகிறது. அழைப்பு வந்தால், மாநிலத்தின் அரசியல் சூழ்நிலையை கருத்தில் கொண்டு கூட்டணி ஆதரவு குறித்து முடிவு செய்யப்படும் என கட்சிகளின் வட்டாரங்கள் தெரிவிக்கின்றன.
தனிப்பெரும் கட்சியாக இருந்தாலும், பெரும்பான்மை இல்லாத நிலையில் தவெக ஆட்சியை அமைப்பது சவாலாகவே பார்க்கப்படுகிறது. ஆளுநரிடம் உரிமை கோரி ஆட்சி அமைக்கும் முயற்சியில் விஜய் இறங்கினாலும், சட்டமன்றத்தில் பெரும்பான்மையை நிரூபிக்க வேண்டிய கட்டாயம் ஏற்படும். அந்த நிலையில் பிற கட்சிகளின் ஆதரவு எந்த அளவுக்கு கிடைக்கும் என்பது அடுத்த சில நாட்களில் தெளிவாகும்.
இதனால், தமிழக அரசியல் களத்தில் தவெகவின் அடுத்த நகர்வு மட்டுமல்லாது, காங்கிரஸ் மற்றும் கம்யூனிஸ்ட் கட்சிகளின் நிலைப்பாடும் மிக முக்கியமானதாக மாறியுள்ளது.
