சென்னை: தமிழக பாஜகவின் முன்னாள் தலைவர் அண்ணாமலை டெல்லியில் பாஜக மூத்த தலைவர்களுடன் நடத்திய சந்திப்புகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. குறிப்பாக மத்திய உள்துறை அமைச்சர் அமித் ஷாவை நேரில் சந்தித்து பேசிய அண்ணாமலை, பாஜகவிலிருந்து விலகும் முடிவை நேரடியாகவே தெரிவித்து விட்டார் எனத் தகவல் வெளியாகியுள்ளது.
இந்த சந்திப்பின் போது இரு பெண் தலைவர்கள், ஒரு முன்னாள் தலைவர், ஒரு முன்னாள் சட்டமன்ற உறுப்பினர் உள்ளிட்ட ஐந்து பேர் மீது அடுக்கடுக்கான குற்றச்சாட்டுகளை முன்வைத்ததாக அண்ணாமலையின் ஆதரவாளர்கள் கூறுகின்றனர். கடந்த பல தேர்தல்களில் தன்னையும் மீறி வேட்பாளர்கள் தேர்வில் அவர்கள் தலையிட்டதாகவும், அதனால் தான் பல தேர்தல்களில் பாஜக தோல்வியடைந்தது என குற்றம் சாட்டியுள்ளார் அண்ணாமலை.
கடந்த சில வாரங்களாக அண்ணாமலை புதிய அரசியல் கட்சி தொடங்கப் போகிறார் என்ற தகவல்கள் அரசியல் களத்தில் பரவி வருகின்றன. இதுகுறித்து நேரடியாக விளக்கம் அளிக்காமல் இருந்து வந்தார் அண்ணாமலை. சமீபத்தில் செய்தியாளர்களிடம் பேசும்போது, இரண்டு நாட்கள் பொறுத்திருங்கள். விரிவாக பேசுகிறேன் என்று கூறியிருந்தார். அந்த பதில் அரசியல் ஆர்வலர்களிடையே மேலும் எதிர்பார்ப்பை ஏற்படுத்தியது.
இந்த நிலையில் டெல்லி சென்ற அண்ணாமலை, முதலில் பாஜக தேசிய தலைவர் நிதின் பட்டியலினத்தை சந்தித்தார். அதன்பின்னர் மத்திய உள்துறை அமைச்சர் அமித் ஷாவையும் சந்தித்து ஆலோசனை நடத்தியுள்ளார். இதோடு பாஜக அமைப்பு பொதுச்செயலாளர் மற்றும் ஆர்.எஸ்.எஸ். இயக்கத்தின் முக்கிய நிர்வாகிகளையும் சந்தித்ததாக தகவல்கள் வெளியாகியுள்ளன.
கட்சியில் தன்னை புறக்கணித்ததாக அவர் தனது அதிருப்தியை வெளிப்படுத்தியதாகவும் தகவல்கள் வெளியாகியுள்ளன. கர்நாடகாவில் இயக்கப் பணியாளராக பணியாற்றிய அண்ணாமலை, தனது அரசு பணியை ராஜினாமா செய்துவிட்டு அரசியலில் குதித்தார். பாஜகவில் இணைந்த குறுகிய காலத்திலேயே தமிழக பாஜக தலைவராக உயர்ந்த அவர், கட்சியின் முகமாக மாறினார்.
என் மண் என் மக்கள் நடைபயணம், திமுக அரசுக்கு எதிரான தொடர் விமர்சனங்கள், சட்டம் ஒழுங்கு பிரச்சினைகள் குறித்து எழுப்பிய கேள்விகள் என பல்வேறு நடவடிக்கைகள் மூலம் அவர் மாநிலம் முழுவதும் கவனம் பெற்றார். குறிப்பாக இளைஞர்கள் மத்தியில் அண்ணாமலைக்கு தனித்த ஆதரவு உருவானது.
இரண்டு பெண் தலைவர்கள், ஒரு முன்னாள் தலைவர் மற்றும் முன்னாள் சட்டமன்ற உறுப்பினர் உள்ளிட்ட ஐந்து பேர் பாஜகவின் முக்கிய முடிவுகளை எடுப்பதாகவும், அதே நேரத்தில் திமுக அதிமுகவுடன் ரகசிய கூட்டணி வைத்துக்கொண்டு தமிழக பாஜகவை வளர விடாமல் செய்வதாக குற்றம் சாட்டியிருக்கிறார் அண்ணாமலை.
இதையெல்லாம் பொறுமையாக கேட்ட அமித் ஷா சற்று பொறுங்கள் எதுவாக இருந்தாலும் பேசிக் கொள்ளலாம் என அண்ணாமலையை சமாதானப்படுத்தி அனுப்பி வைத்துள்ளதாக சொல்கின்றனர். வரும் நாட்களில் அண்ணாமலையின் அறிவிப்பு தமிழக அரசியலில் அடுத்த பெரிய திருப்பமாக அமையலாம்.
