சென்னை:
தமிழ்நாடு அரசின் பொதுப் போக்குவரத்து சேவையை மேலும் வலுப்படுத்தும் நோக்கில், ரூ.127.21 கோடி மதிப்பீட்டில் கொள்முதல் செய்யப்பட்ட 300 புதிய பஸ்களின் சேவையை தமிழக முதல்வர் ச. ஜோசப் விஜய் இன்று தலைமைச் செயலகத்தில் இருந்து கொடியசைத்து தொடங்கி வைத்தார். இந்த புதிய பஸ்கள் மாநிலம் முழுவதும் பல்வேறு கோட்டங்களுக்கு ஒதுக்கப்பட்டுள்ளன.
தமிழ்நாடு அரசு போக்குவரத்துக் கழகங்கள் மூலம் தினசரி சுமார் 2.05 கோடி பயணிகள் பயணம் செய்து வருகின்றனர். கல்வி, வேலைவாய்ப்பு, மருத்துவம், வணிகம் மற்றும் பிற தேவைகளுக்காக மக்கள் குறைந்த கட்டணத்தில் பயணிக்க அரசு பல்வேறு நடவடிக்கைகளை தொடர்ந்து மேற்கொண்டு வருகிறது.
தற்போது இயக்கப்படும் 21,527 பஸ்களின் சேவையை மேம்படுத்தும் வகையில் புதிய பஸ்கள் சேர்க்கப்பட்டுள்ளன. குறிப்பாக பழைய பஸ்களை மாற்றுதல், புதிய வழித்தடங்களை அறிமுகப்படுத்துதல், நிறுத்தப்பட்ட சேவைகளை மீண்டும் தொடங்குதல் போன்ற நடவடிக்கைகளுக்கு இந்த புதிய பஸ்கள் பெரும் உதவியாக இருக்கும் என அதிகாரிகள் தெரிவித்துள்ளனர்.
முதல்வர் விஜய் தலைமையில் நடைபெற்ற போக்குவரத்துத்துறை ஆய்வுக்கூட்டத்தில், நவீன தொழில்நுட்ப வசதிகளுடன் கூடிய பாதுகாப்பான மற்றும் சுற்றுச்சூழலுக்கு ஏற்ற போக்குவரத்து அமைப்பை உருவாக்க வேண்டும் என வலியுறுத்தப்பட்டது. அதன்படி GPS கண்காணிப்பு, டிஜிட்டல் கட்டண வசதி, ஸ்மார்ட் கார்டு முறை, பயணிகள் தகவல் அமைப்பு மற்றும் 24 மணி நேர உதவி மையங்கள் போன்ற வசதிகளும் படிப்படியாக அறிமுகப்படுத்தப்பட உள்ளன.
300 புதிய பஸ்களில் 164 டீசல் பஸ்களும், 136 சி.என்.ஜி. (CNG) பஸ்களும் அடங்குகின்றன. குறிப்பாக CNG பஸ்கள் சுற்றுச்சூழலுக்கு உகந்ததாகவும், குறைந்த மாசு உமிழ்வை கொண்டதாகவும் இருக்கும்.
கோட்ட வாரியான பஸ் ஒதுக்கீடு பின்வருமாறு:
• மாநகர் போக்குவரத்துக் கழகம் (சென்னை) – 65 பஸ்கள்
• விழுப்புரம் கோட்டம் – 36 பஸ்கள்
• சேலம் கோட்டம் – 39 பஸ்கள்
• கோயம்புத்தூர் கோட்டம் – 25 பஸ்கள்
• கும்பகோணம் கோட்டம் – 49 பஸ்கள்
• மதுரை கோட்டம் – 42 பஸ்கள்
• திருநெல்வேலி கோட்டம் – 44 பஸ்கள்
இந்த புதிய பஸ்கள் நகர மற்றும் புறநகர் சேவைகளில் உடனடியாக இயக்கப்படுகின்றன. குறிப்பாக கிளாம்பாக்கம், கோயம்பேடு மற்றும் முக்கிய பஸ் நிலையங்களிலிருந்து சேவைகள் தொடங்கப்பட்டுள்ளன.
புதிய பஸ்கள் அறிமுகமாகுவதன் மூலம் பயணிகளின் காத்திருப்பு நேரம் குறையும் என்றும், அதிக மக்கள் பயன்பெறும் வழித்தடங்களில் கூடுதல் சேவைகள் வழங்கப்படும் என்றும் போக்குவரத்துத்துறை தெரிவித்துள்ளது.
மாநிலத்தின் போக்குவரத்து கட்டமைப்பை மேம்படுத்தும் வகையில் மேற்கொள்ளப்பட்டுள்ள இந்த நடவடிக்கை பொதுமக்கள் மத்தியில் வரவேற்பை பெற்றுள்ளது. எதிர்காலத்தில் மேலும் புதிய பஸ்கள் சேர்க்கப்படுவதற்கான நடவடிக்கைகளும் பரிசீலனையில் இருப்பதாக அதிகாரிகள் தெரிவித்துள்ளனர்.
