தூத்துக்குடி:
தூத்துக்குடி மாவட்டத்தில் கல்லூரி படிப்பை தொடருமாறு பெற்றோர் அறிவுறுத்தியதைத் தொடர்ந்து மனமுடைந்ததாக கூறப்படும் 19 வயது பொறியியல் கல்லூரி மாணவர் உயிரிழந்த சம்பவம் பெரும் சோகத்தை ஏற்படுத்தியுள்ளது. இந்த சம்பவம் தொடர்பாக போலீசார் விசாரணை நடத்தி வருகின்றனர்.
தூத்துக்குடி மாவட்டம் எப்போதும்வென்றான் அருகே உள்ள ஆதனூர் நடுத்தெருவை சேர்ந்தவர் ஆதிலிங்கம். விவசாயியான இவரது மனைவி விஜி. இவர்களுக்கு லிங்கதுரை (19), சுரேந்திரர் என்ற இரு மகன்களும், சுமித்ரா என்ற மகளும் உள்ளனர்.
இதில் மூத்த மகனான லிங்கதுரை, திருநெல்வேலியில் உள்ள தனியார் பொறியியல் கல்லூரியில் இரண்டாம் ஆண்டு படித்து வந்தார். விடுதியில் தங்கி கல்வி பயின்று வந்த அவர், சமீபத்தில் மொகரம் பண்டிகை விடுமுறையை முன்னிட்டு சொந்த ஊருக்கு வந்திருந்தார்.
வீட்டில் இருந்தபோது, கல்லூரி படிப்பை தொடர விருப்பமில்லை என்றும், படிப்பை நிறுத்த விரும்புவதாகவும் பெற்றோரிடம் தெரிவித்ததாக கூறப்படுகிறது. இதைக் கேட்டு அதிர்ச்சி அடைந்த பெற்றோர், அவரது எதிர்காலத்தை கருத்தில் கொண்டு படிப்பை தொடர்ந்து முடிக்க வேண்டும் என அறிவுரை வழங்கியுள்ளனர்.
மேலும், அவர் விருப்பப்பட்ட கல்லூரியிலேயே சேர்க்கப்பட்டுள்ளதாகவும், படிப்பை பாதியில் நிறுத்தாமல் தொடர்ந்து கல்லூரிக்கு செல்ல வேண்டும் என்றும் பெற்றோர் வலியுறுத்தியதாக கூறப்படுகிறது. இதனால் லிங்கதுரை மனவேதனையில் இருந்ததாக குடும்பத்தினர் தெரிவித்துள்ளனர்.
இந்த நிலையில், நேற்று அதிகாலை வீட்டை விட்டு வெளியே சென்ற லிங்கதுரை நீண்ட நேரமாகியும் வீடு திரும்பவில்லை. இதனால் பதற்றமடைந்த குடும்பத்தினர் மற்றும் உறவினர்கள் பல்வேறு இடங்களில் தேடியுள்ளனர்.
தேடுதலின் போது, கிராம சுடுகாடு பகுதியில் உள்ள ஒரு வேப்பமரத்தில் லிங்கதுரை உயிரிழந்த நிலையில் காணப்பட்டதாக தகவல் வெளியாகியுள்ளது. இதைக் கண்டு அதிர்ச்சியடைந்த குடும்பத்தினர் உடனடியாக காவல்துறைக்கு தகவல் தெரிவித்தனர்.
சம்பவ இடத்திற்கு விரைந்து சென்ற எப்போதும்வென்றான் போலீசார், உடலை மீட்டு தூத்துக்குடி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் சம்பவம் தொடர்பாக வழக்குப்பதிவு செய்து விசாரணை மேற்கொண்டு வருகின்றனர்.
இளம் வயதிலேயே மாணவர் உயிரிழந்த சம்பவம் குடும்பத்தினரையும், கிராம மக்களையும் பெரும் சோகத்தில் ஆழ்த்தியுள்ளது. மாணவரின் மரணத்திற்கு பின்னால் வேறு ஏதேனும் காரணங்கள் உள்ளனவா என்பது குறித்தும் போலீசார் விசாரணை நடத்தி வருகின்றனர்.
