சென்னை:
தமிழக அரசியலில் அதிமுக மற்றும் தமிழக வெற்றிக் கழகம் (தவெக) இடையிலான அரசியல் நகர்வுகள் தொடர்ந்து பரபரப்பை ஏற்படுத்தி வரும் நிலையில், முன்னாள் அமைச்சர் எஸ்.வளர்மதி கட்சி பொறுப்பிலிருந்து நீக்கப்பட்டிருப்பது அரசியல் வட்டாரங்களில் பெரும் கவனத்தை ஈர்த்துள்ளது.
தமிழ்நாட்டில் ஆட்சி மாற்றத்திற்குப் பிறகு அதிமுகவில் இருந்து பல முக்கிய நிர்வாகிகள், முன்னாள் அமைச்சர்கள் மற்றும் முன்னாள் மக்கள் பிரதிநிதிகள் தமிழக வெற்றிக் கழகத்தில் இணைந்து வருகின்றனர். இந்த சூழலில் மேலும் சில முக்கிய தலைவர்கள் தவெகவில் இணைய உள்ளதாக தகவல்கள் வெளியாகி வருகின்றன.
மாமல்லபுரத்தில் உள்ள தனியார் விடுதியில் நாளை நடைபெறவுள்ள பிரம்மாண்ட இணைப்பு விழாவில் பல முன்னாள் அமைச்சர்கள் மற்றும் நிர்வாகிகள் தவெகவில் இணைய உள்ளதாக கூறப்படுகிறது. இந்த நிகழ்ச்சிக்கு தவெக பொதுச்செயலாளர் புஸ்ஸி ஆனந்த் மற்றும் அமைச்சர் ஆதவ் அர்ஜுனா தலைமையேற்க உள்ளனர்.
ஏற்கனவே அதிமுகவைச் சேர்ந்த நான்கு சிட்டிங் எம்எல்ஏக்கள் தங்களது சட்டப்பேரவை உறுப்பினர் பதவியை ராஜினாமா செய்து தவெகவில் இணைந்துள்ளனர். இதையடுத்து முன்னாள் அமைச்சர்களான சி.விஜயபாஸ்கர் மற்றும் எம்.ஆர்.விஜயபாஸ்கர் ஆகியோரும் விரைவில் தவெகவில் இணைய உள்ளதாக அரசியல் வட்டாரங்களில் தகவல்கள் பரவி வருகின்றன.
இந்த நிலையில் முன்னாள் அமைச்சர் எஸ்.வளர்மதியும் தவெகவில் இணையவுள்ளதாக தகவல்கள் வெளியாகின. இதனால் அதிமுக தலைமையகம் அதிரடி நடவடிக்கையில் இறங்கியுள்ளதாக கூறப்படுகிறது.
எஸ்.வளர்மதி கடந்த 2016 முதல் 2021 வரை செயல்பட்ட அதிமுக ஆட்சியில் பிற்படுத்தப்பட்டோர், மிகவும் பிற்படுத்தப்பட்டோர் மற்றும் சீர்மரபினர் நலத்துறை அமைச்சராக பதவி வகித்தவர். திருச்சி புறநகர் தெற்கு மாவட்டத்தைச் சேர்ந்த அவர், கட்சியின் அமைப்பு செயலாளராகவும் இருந்து வந்தார்.
இந்நிலையில், அதிமுக பொதுச்செயலாளர் எடப்பாடி கே.பழனிசாமி வெளியிட்டுள்ள அறிவிப்பில், “அனைத்திந்திய அண்ணா திராவிட முன்னேற்றக் கழகத்தின் அமைப்பு செயலாளர் பொறுப்பில் இருந்து எஸ்.வளர்மதி இன்று முதல் விடுவிக்கப்படுகிறார்” என தெரிவிக்கப்பட்டுள்ளது.
இந்த அறிவிப்பு வெளியானதையடுத்து அதிமுகவின் உள்கட்சி அரசியல் மீண்டும் பரபரப்பாகியுள்ளது. குறிப்பாக சமீப காலமாக கட்சியில் இருந்து பல முக்கிய நிர்வாகிகள் விலகி வரும் நிலையில், இந்த நடவடிக்கை முக்கியத்துவம் பெறுகிறது.
வரவிருக்கும் தவெக இணைப்பு விழாவில் எஸ்.வளர்மதி அதிகாரப்பூர்வமாக இணைவாரா என்பது குறித்து அரசியல் வட்டாரங்களில் பெரும் எதிர்பார்ப்பு நிலவி வருகிறது. அதேசமயம் அதிமுக தலைமையகம் கட்சியின் கட்டுப்பாட்டை உறுதிப்படுத்தும் நடவடிக்கையாக இந்த முடிவை எடுத்துள்ளதாக அரசியல் நோக்கர்கள் கருத்து தெரிவித்து வருகின்றனர்.
தமிழக அரசியலில் நாளுக்கு நாள் அதிகரித்து வரும் இந்த கட்சி மாறுதல் அரசியல், எதிர்காலத்தில் மேலும் பல முக்கிய மாற்றங்களுக்கு வழிவகுக்கும் என எதிர்பார்க்கப்படுகிறது.
