காவிரி நீர் விவகாரம்: தமிழகத்திற்கு கர்நாடகம் வழங்க வேண்டிய நீரில் பெருமளவு நிலுவை – நாடாளுமன்றத்தில் மத்திய அரசு அதிர்ச்சி தகவல்!
புதுடெல்லி:
நாடாளுமன்ற மழைக்காலக் கூட்டத்தொடர் தற்போது நடைபெற்று வருகிறது. இதில் கேள்வி நேரத்தின் போது, காவிரி நதிநீர் பங்கீட்டு ஒப்பந்தத்தின்படி இந்த ஆண்டு கர்நாடக அரசு தமிழகத்திற்கு வழங்கிய நீரின் அளவு குறித்து மக்களவையில் உறுப்பினர்கள் கேள்வி எழுப்பினர்.
இதற்கு மத்திய நீர்வளத்துறை அமைச்சகம் சார்பில் எழுத்துப்பூர்வமாகப் பதிலளிக்கப்பட்டது. அந்தப் பதிலில், காவிரி நீரினைப் பகிர்ந்து கொள்வதில் கர்நாடக அரசு தமிழகத்திற்கு வழங்க வேண்டிய நீரின் அளவிற்கும், உண்மையில் வழங்கப்பட்ட நீரின் அளவிற்கும் இடையே மிகப்பெரிய இடைவெளி இருப்பது அம்பலமாகியுள்ளது.
மத்திய அரசு அளித்த அதிகாரப்பூர்வத் தகவல்கள் வருமாறு:
ஜூன் மாதம்: காவிரி நதிநீர் மேலாண்மை ஆணையத்தின் உத்தரவுப்படி, கர்நாடகம் ஜூன் மாதத்தில் தமிழகத்திற்கு 9.19 டி.எம்.சி. (TMC) தண்ணீரைத் திறந்து விட்டிருக்க வேண்டும். ஆனால், கர்நாடக அரசு வெறும் 2.915 டி.எம்.சி. தண்ணீரை மட்டுமே வழங்கியுள்ளது.
ஜூலை மாதம்: அதேபோல, ஜூலை மாதத்தில் தமிழகத்திற்கு 31.24 டி.எம்.சி. நீர் வழங்கப்பட வேண்டும். ஆனால், ஜூலை மாதத்தில் இதுவரை வெறும் 0.459 டி.எம்.சி. நீர் மட்டுமே கர்நாடகாவால் திறக்கப்பட்டுள்ளது.
இதன் மூலம் ஜூன் மற்றும் ஜூலை ஆகிய இரு மாதங்களிலும் சேர்த்து தமிழகத்திற்குத் தர வேண்டிய உரிய நீரில் மிகச் சிறிய அளவையே கர்நாடக அரசு வழங்கி உள்ளது என்பது தெளிவாகியுள்ளது.
கர்நாடக அணைகளில் நீர் இருப்பு குறைவாக இருப்பதைக் காரணம் காட்டி அம்மாநில அரசு உரிய நீரைத் திறக்க மறுத்து வரும் நிலையில், மேட்டூர் அணையின் நீர்மட்டம் சரிந்து குருவைச் சாகுபடிக்குத் தண்ணீர் தடையின்றி வழங்குவதில் பெரும் சிக்கல் ஏற்பட்டுள்ளது.
காவிரியில் இருந்து உரிய தண்ணீரை உடனே திறந்து விடக் கர்நாடக அரசுக்கு மத்திய அரசும், காவிரி நதிநீர் மேலாண்மை ஆணையமும் உரிய உத்தரவுகளைப் பிறப்பிக்க வேண்டும் எனத் தமிழகத்தைச் சேர்ந்த நாடாளுமன்ற உறுப்பினர்கள் நாடாளுமன்றத்தில் வலியுறுத்தினர்.
