‘அமரன்’ திரைப்படத்திற்காக சிறந்த இயக்குநருக்கான தேசிய திரைப்பட விருதை பெற்ற இயக்குநர் ராஜ்குமார் பெரியசாமி, அந்த மகிழ்ச்சியான தருணத்தை மறைந்த மேஜர் முகுந்த் வரதராஜனின் பெற்றோருடன் பகிர்ந்து கொண்டுள்ளார். மேஜர் முகுந்த் வரதராஜனின் வாழ்க்கை மற்றும் ராணுவ சேவையை மையமாகக் கொண்டு உருவான ‘அமரன்’ திரைப்படம், ரசிகர்களிடையே பெரும் வரவேற்பைப் பெற்றதுடன் தேசிய அளவிலும் அங்கீகாரம் பெற்றது. 72-வது தேசிய திரைப்பட விருதுகளில் சிறந்த இயக்குநருக்கான விருது ராஜ்குமார் பெரியசாமிக்கு அறிவிக்கப்பட்டு, செப்டம்பர் 22 அன்று குடியரசுத் தலைவர் திரௌபதி முர்முவிடம் இருந்து அவர் விருதைப் பெற்றார்.
தேசிய விருது அறிவிக்கப்பட்டபோதே இந்த அங்கீகாரத்தை மேஜர் முகுந்த் வரதராஜனின் குடும்பத்தினருக்கும் இந்திய ராணுவத்தினருக்கும் அர்ப்பணிப்பதாக ராஜ்குமார் பெரியசாமி தெரிவித்திருந்தார். குறிப்பாக முகுந்தின் பெற்றோருடன் தொடர்ந்து தொடர்பில் இருப்பதாகவும், தேசிய விருது கிடைக்கும் என முகுந்தின் தாய் முன்பே தன்னிடம் நம்பிக்கை தெரிவித்திருந்ததாகவும் அவர் கூறியிருந்தார்.
தற்போது தனக்கு கிடைத்த தேசிய விருதுடன் மேஜர் முகுந்த் வரதராஜனின் பெற்றோரை சந்தித்து புகைப்படம் எடுத்துக்கொண்ட சம்பவம் சமூக வலைதளங்களில் கவனம் பெற்றுள்ளது. ஒரு திரைப்பட இயக்குநருக்குக் கிடைத்த விருதை, அந்த திரைப்படத்திற்கு உயிரும் உணர்வும் அளித்த உண்மை மனிதரின் குடும்பத்துடன் பகிர்ந்த இந்த தருணம் ‘அமரன்’ படத்திற்கும் மேஜர் முகுந்தின் நினைவுக்கும் இடையேயான உணர்வுப்பூர்வமான தொடர்பை மீண்டும் வெளிப்படுத்தியுள்ளது.
