சென்னை:
“மக்களால் நான்… மக்களுக்காக நான்” என்ற கர்ஜனை குரலால் தமிழ்நாடு முழுவதும் மரியாதையும் மத்தாப்பும் பெற்றவர் ஜெயலலிதா. அவர் மறைந்தது இன்று ஒன்பது ஆண்டுகளாகினும், அ.தி.மு.க தொண்டர்களின் மனங்களில் இன்னும் என்றும் நிலைத்து நிற்கிறார்.
ஆண்கள் ஆதிக்கம் செலுத்திய அரசியல் அரங்கில், பெண்களும் உயர்ந்திட முடியும் என்பதற்குச் சின்னமாக திகழ்ந்தவர் ஜெயலலிதா. கடுமையான சவால்களை எதிர்கொண்டபோதும், அரசியலில் குறுகிய காலத்திலேயே அபாரமான எழுச்சியைப் பெற்றார்.
மற்ற அரசியல் தலைவர்கள் போலவே, அவர் அரசியல் வாழ்க்கையும் எளிதாக அமையவில்லை. குறிப்பாக பெண் தலைவர் என்பதால் அவர் கடந்து வந்த பாதை இன்னும் சிரமமானதாக உருவானது.
திரைத்துறையில் பிரபல நடிகையாக இருந்த ஜெயலலிதா, 1982ஆம் ஆண்டு எம்.ஜி.ஆர் முன்னிலையில் அ.தி.மு.க.வில் சேர்ந்தார். அப்போது அவர் மக்கள் மனங்களில் இருந்த புகழை கருத்தில் கொண்டு, கொள்கை பரப்பு செயலாளர் பொறுப்பு வழங்கப்பட்டது.
1987ஆம் ஆண்டு முதலமைச்சராக இருந்த எம்.ஜி.ஆர் மறைந்ததைத் தொடர்ந்து, அ.தி.மு.க. ஜானகி அணி மற்றும் ஜெயலலிதா அணி என இரண்டாக பிளண்டது. எம்.ஜி.ஆரின் மனைவி ஜானகி முதலமைச்சராகப் பொறுப்பேற்றார்.
1989ஆம் ஆண்டு நடைபெற்ற சட்டப்பேரவை தேர்தலில், ஜெயலலிதா தலைமையிலான அணி ‘சேவல்’ சின்னத்தில் போட்டியிட்டு 27 இடங்களில் வெற்றி பெற்றது; ஜானகி தலைமையிலான அணி ஒரே ஒரு இடத்தில் மட்டுமே வெற்றி பெற்றது.
ஜானகி அரசியலிலிருந்து விலகியதைத் தொடர்ந்து, அ.தி.மு.க. மீண்டும் ஒன்றுபட்டது. அதன் பொதுச் செயலாளராக ஜெயலலிதா பொறுப்பேற்றார். பின்னர் 1991, 2001, 2011, 2016 ஆண்டுகளில் மொத்தம் நான்கு முறை தமிழக முதலமைச்சராக பதவி வகித்தார்.
1991ஆம் ஆண்டு முதன்முறையாக முதலமைச்சராக இருந்தபோது, தனக்குத் தேவையான வருமானம் ஏற்கனவே உள்ளதாகக் கூறி, அரசு சம்பளத்தை வாங்க மறுத்தார். அப்போது அவர் 1 ரூபாய் மட்டும் சம்பளமாக பெற்றது நினைவுகூரத்தக்கது.
தொட்டில் குழந்தை திட்டம், காவல் துறையில் பெண்களுக்கு 30% இடஒதுக்கீடு, அம்மா உணவகம், மாணவர்களுக்கு இலவச லேப்டாப்பு, திருமணத் தாலிக்கு தங்கம், ஏழை மக்களுக்கு ஆடு–மாடு வழங்கும் திட்டம், கோவில்களில் அன்னதானம், திருநங்கைகளுக்கு மாத உதவித்தொகை போன்ற பல பொதுத்திட்டங்களை அறிமுகப்படுத்தி மக்கள் மனதில் ஆழமாக பதிந்தார்.
அரசியலில் உச்சத்தை தொட்ட ஜெயலலிதா, பிறந்தபோது ‘கோமளவள்ளி’ என்று பெயரிடப்பட்டவர். பின்னர் அது ‘ஜெயலலிதா’ என மாற்றப்பட்டது. பள்ளி நண்பர்கள் அவரை ஜெயா, ஜெய், லில்லி என்று அழைத்தனர்; அவரது தாய் ‘அம்மு’ என்று பாசத்துடன் அழைத்தார். ஆனால் அ.தி.மு.க தொண்டர்கள் மட்டுமே அவரை என்றும் அன்போடு ‘அம்மா’ என அழைத்தனர்.
ஜெயலலிதா தனது தொடக்கக் கல்வியை மாம்பலம் ஹோலி ஏஞ்சல்ஸ் பள்ளியில் முடித்தார். 5ஆம் வகுப்பிற்கு பின், மேல்நிலைக் கல்வியை சர்ச்சு பார்க் பள்ளியில் தொடர்ந்து படித்தார்.
திரைத்துறையில் மொத்தம் 115 திரைப்படங்களில் நடித்த அவர், எம்.ஜி.ஆருடன் மட்டும் 28 படங்களில் இணைந்து நடித்துள்ளார். இருவரும் இணைந்து நடித்த முதல் படம் ஆயிரத்தில் ஒருவன். திரை உலகில் இருந்து அரசியலுக்கு உயர்ந்து வந்த அரிதான ஆளுமை இவர்.
2016ஆம் ஆண்டு மீண்டும் முதலமைச்சராகப் பொறுப்பேற்ற சில மாதங்களிலேயே, செப்டம்பர் 22ஆம் தேதி உடல்நலக் குறைவு காரணமாக சென்னை அப்பல்லோ மருத்துவமனையில் சேர்க்கப்பட்டார். 70 நாட்களுக்கு மேல் தீவிர சிகிச்சை அளிக்கப்பட்டபோதும், டிசம்பர் 5ஆம் தேதி சிகிச்சை பலனளிக்காமல் காலமானார்.
“எனக்குப் பிறகும் பல நூற்றாண்டுகள் கடந்தாலும் அ.தி.மு.க இயங்கிக் கொண்டே இருக்கும்” என்பது அவர் அடிக்கடி கூறும் உற்சாகமான வரிகள். ஆனால், அவர் மறைந்து இன்று ஒன்பது ஆண்டுகளே ஆன நிலையில், அவர் கட்டிக்காத்த அ.தி.மு.க.வின் தற்போதைய நிலை பற்றி தனியாகச் சொல்லத் தேவையில்லை.
