இளையராஜா பாடல் வழக்கு முடிவு – ‘குட் பேட் அக்லி’ படத்தில் இனி பாடல்கள் பயன்படுத்தமாட்டோம் என தயாரிப்பு நிறுவனம் உறுதி
சென்னை: அஜித் குமார் நடித்த ‘குட் பேட் அக்லி’ திரைப்படத்தில் இசையமைப்பாளர் இளையராஜாவின் பாடல்கள் அனுமதியின்றி பயன்படுத்தப்பட்டதாக எழுந்த சர்ச்சை தொடர்பான வழக்கு, தயாரிப்பு நிறுவனம் அளித்த உறுதியின் பேரில் சென்னை உயர்நீதிமன்றத்தில் முடிவுக்கு வந்துள்ளது.
கடந்த ஏப்ரல் மாதம் வெளியான இந்த படத்தை ஆதிக் ரவிச்சந்திரன் இயக்கியிருந்தார். ஜி.வி. பிரகாஷ் இசையமைத்த இப்படத்தில், இளையராஜாவின் பிரபலமான ‘ஒத்த ரூபாயும் தாரேன்’, ‘என் ஜோடி மஞ்ச குருவி’, ‘இளமை இதோ இதோ’ உள்ளிட்ட பாடல்கள் இடம்பெற்றிருந்தன. இந்த பாடல்கள் தன்னுடைய அனுமதியின்றி பயன்படுத்தப்பட்டதாகவும், அதற்கான உரிமம் பெறப்படவில்லை என்றும் கூறி, இளையராஜா தரப்பு தயாரிப்பு நிறுவனமான மைத்திரி மூவி மேக்கர்ஸ் மீது வழக்கு தொடர்ந்தது.
வழக்கு விசாரணைக்கு வந்தபோது, இளையராஜா பாடல்களை பயன்படுத்துவதற்கு இடைக்காலத் தடை விதித்து சென்னை உயர்நீதிமன்றம் உத்தரவிட்டது. இதனால் படக்குழு நீதிமன்றத்தில் மேல் முறையீடு செய்தது. மூன்று பாடல்களுக்கும் விதிக்கப்பட்ட தடையால் படம் பெரிதும் பாதிக்கப்படுகிறது, எனவே தடையை நீக்க வேண்டும் என்று தயாரிப்பு நிறுவனம் மனுத்தாக்கல் செய்தது.
ஆனால், இந்த மனுவை நீதிபதி செந்தில்குமார் தள்ளுபடி செய்தார். ஏற்கனவே பிறப்பித்த இடைக்கால உத்தரவை மாற்ற வேண்டிய அவசியம் இல்லை என்றும், பாடல்களை உருமாற்றம் செய்வதைத் தடுக்கவும், அனுமதி இன்றி பயன்படுத்துவதைத் தடுக்கவும் இளையராஜாவுக்கு முழு உரிமை உண்டு என்றும் நீதிமன்றம் தெளிவுபடுத்தியது. இதனிடையே பிரதான வழக்கின் விசாரணை பின்னோக்கி தள்ளப்பட்டது.
இந்த சூழலில், ‘குட் பேட் அக்லி’ படத்திலிருந்து இளையராஜா பாடல்கள் நீக்கப்பட்டதாகவும், இனி அவரது பாடல்களை எந்த வடிவிலும் பயன்படுத்தமாட்டோம் என மைத்திரி மூவி மேக்கர்ஸ் நீதிமன்றத்தில் உறுதி அளித்தது. இதன் பேரில், வழக்கை முடித்து வைக்க உயர்நீதிமன்றம் உத்தரவிட்டது.
இளையராஜாவின் இசை உரிமைகள் தொடர்பான வழக்குகள் கடந்த சில ஆண்டுகளாக திரையுலகில் முக்கிய விவாதமாக இருந்து வருகின்றன. இந்த தீர்ப்பு, இசை உரிமைகள் மற்றும் காப்புரிமை பாதுகாப்பு குறித்து மீண்டும் ஒரு முக்கிய முன்னுதாரணமாக பார்க்கப்படுகிறது.
