‘ஸ்பைடர்மேன் – பிராண்ட் நியூ டே’ படப்பிடிப்பு நிறைவு – டாம் ஹாலண்ட் மீண்டும் கதாநாயகன்
வாஷிங்டன்: ஹாலிவுட் திரைப்படங்களுக்கு இந்தியாவில் தனி ரசிகர் பட்டாளமே உள்ளது. குறிப்பாக, மார்வெல் ஸ்டுடியோஸ் தயாரிக்கும் சூப்பர் ஹீரோ படங்களுக்கு ரசிகர்கள் அதிகம். அந்த வகையில், உலகம் முழுவதும் பெரும் வரவேற்பைப் பெற்ற படைப்புகளில் ஒன்றாக ஸ்பைடர்மேன் தொடரும் திகழ்கிறது.
மார்வெல் சினிமாட்டிக் யூனிவர்ஸில் (MCU) ஸ்பைடர்மேன் கதாபாத்திரத்தை டாம் ஹாலண்ட் முதன்முதலாக ஸ்பைடர்மேன்: ஹோம் கம்மிங் படத்தில் நடித்தார். அந்த படம் ரசிகர்களிடையே பெரும் வரவேற்பைப் பெற்றது. பின்னர், ஸ்பைடர்மேன்: பார் பிரம் ஹோம் மற்றும் ஸ்பைடர்மேன்: நோ வே ஹோம் ஆகிய படங்களும் வெளியாகின. இந்த மூன்று படங்களிலும் ஜெண்டயா கதாநாயகியாக நடித்தார். மூன்றையும் இயக்குனர் ஜான் வாட்ஸ் இயக்கினார்.
இந்த மூன்று படங்களும் உலகளவில் வசூல் சாதனைகளை படைத்ததோடு, டாம் ஹாலண்ட் ஸ்பைடர்மேன் கதாபாத்திரத்தில் ரசிகர்களின் மனதில் நிலைத்த இடத்தைப் பெற்றார். நோ வே ஹோம் படத்திற்குப் பிறகு, ரசிகர்கள் அடுத்த பாகம் குறித்து ஆவலுடன் காத்திருந்தனர்.
அந்த எதிர்பார்ப்புக்கு விடையாக, தற்போது 4-வது பாகமாக ஸ்பைடர்மேன் – பிராண்ட் நியூ டே உருவாகி வருகிறது. இந்த படத்தை ஷாங்க்-சி அண்ட் த லெஜண்ட் ஆஃப் டென் ரிங்ஸ் படத்தை இயக்கிய டெஸ்டின் டேனியல் க்ரெட்டன் இயக்குகிறார். புதிய கதை, புதிய திருப்பங்களுடன், ரசிகர்களுக்கு வித்தியாசமான அனுபவத்தை அளிக்கும் வகையில் படம் உருவாகி வருகிறது.
இந்நிலையில், ஸ்பைடர்மேன் – பிராண்ட் நியூ டே படத்தின் படப்பிடிப்பு நிறைவடைந்துள்ளதாக இயக்குனர் அதிகாரப்பூர்வமாக தெரிவித்துள்ளார். டாம் ஹாலண்ட் மீண்டும் ஸ்பைடர்மேன் கதாபாத்திரத்தில் நடித்திருப்பது ரசிகர்களிடையே பெரும் உற்சாகத்தை ஏற்படுத்தியுள்ளது.
படப்பிடிப்பு நிறைவடைந்த செய்தி வெளியாகியதும், சமூக ஊடகங்களில் ரசிகர்கள் பெரும் மகிழ்ச்சியை வெளிப்படுத்தினர். “டாம் ஹாலண்ட் மீண்டும் ஸ்பைடர்மேன் வேடத்தில் – காத்திருப்பு இனி குறைந்தது” என ரசிகர்கள் பதிவிட்டுள்ளனர்.
மார்வெல் ரசிகர்கள், இந்த படத்தின் வெளியீட்டு தேதியை ஆவலுடன் எதிர்நோக்கி வருகின்றனர். ஸ்பைடர்மேன் – பிராண்ட் நியூ டே படம், MCU-வின் அடுத்த கட்டத்தை வலுப்படுத்தும் முக்கிய படைப்பாக இருக்கும் என எதிர்பார்க்கப்படுகிறது.
