முகேஷ் அம்பானி ரிலையன்ஸ் நிறுவனத்துடன் கைக்கோர்த்த அஜித் – எதிர்பாராத கூட்டணி, வெளியான அறிவிப்பு!

தமிழ் சினிமாவின் முன்னணி நடிகர்களில் ஒருவரான அஜித் குமார், 30 ஆண்டுகளுக்கும் மேலாக பரபரப்பாக வலம் வருகிறார். எப்போதும் தனது வாழ்க்கை முறை, முடிவுகள் மற்றும் எண்ணங்களில் தனித்துவமான முறையில் நடந்து வருகிறார். சினிமாவில் சாதனைகளை நிகழ்த்துவதோடு, கார் பந்தய உலகிலும் தன் தனித்துவத்தை நிலைநாட்டி வருகிறார்.

உலகளவில் அசத்தல்:

கார் ரேசிங்கில் உள்ள தீவிர ஆர்வத்தின் காரணமாக சில ஆண்டுகள் சினிமாவிலிருந்து இடைவெளி எடுத்த அஜித், முழுமையாக மோட்டார் ஸ்போர்ட்ஸில் கவனம் செலுத்தி வருகிறார். இதற்காகவே அவர் “அஜித் குமார் ரேசிங்” என்ற நிறுவனத்தை தொடங்கி, தனது சொந்த ரேசிங் அணியையும் அமைத்துள்ளார்.

இந்த அணி துபாய், பெல்ஜியம் போன்ற பல நாடுகளில் நடைபெற்ற சர்வதேச ரேசிங் போட்டிகளில் பங்கேற்று சிறப்பித்தது. சமீபத்தில் நடைபெற்ற 2025 க்ரெவென்டிக் 24 மணி நேர ஐரோப்பிய எண்டூரன்ஸ் சாம்பியன்ஷிப் போட்டியில், அஜித் குமார் ரேசிங் அணி மூன்றாவது இடத்தை பிடித்து உலகளவில் கவனம் ஈர்த்தது.

பல மணி நேரம் பயிற்சி:

இந்த வெற்றியை தொடர்ந்து, பல்வேறு சர்வதேச ரேசிங் போட்டிகளில் பங்கேற்கும் திட்டங்கள் தீவிரமாக முன்னெடுக்கப்படுகின்றன. இந்தியாவை உலக மோட்டார் ஸ்போர்ட்ஸ் அரங்கில் முக்கிய இடத்தில் நிலைநிறுத்துவது தான் அஜித் குமார் ரேசிங் அணியின் முக்கிய இலக்காகும்.
அஜித் தற்போது வெளிநாடுகளில் தங்கி, தினமும் பல மணி நேரம் பயிற்சியில் ஈடுபட்டு வருகிறார். ஒவ்வொரு பந்தயத்திலும் இந்தியாவின் பெருமையை உயர்த்துவதே அவரது நோக்கம்.

ரிலையன்ஸ் நிறுவனத்துடன் கூட்டணி:

இந்நிலையில், அஜித் குமார் ரேசிங் அணியுடன் ரிலையன்ஸ் கன்ஸ்யூமர் புராடக்ட்ஸ் லிமிடெட் (RCPL) புதிய கூட்டணி ஏற்படுத்தியுள்ளது. முகேஷ் அம்பானி மற்றும் ஈஷா அம்பானி தலைமையில் இயங்கும் இந்த நிறுவனம், தனது பிரபலமான எனர்ஜி டிரிங்க் பிராண்ட் “கேம்பா (Campa Energy)”-வை அஜித் குமார் ரேசிங் அணியின் அதிகாரப்பூர்வ எனர்ஜி பார்ட்னராக அறிவித்துள்ளது.

இந்தியாவில் தயாரிக்கப்படும் பொருட்களை ஊக்குவிப்பது ரிலையன்ஸ் கன்ஸ்யூமர் புராடக்ட்ஸ் நிறுவனத்தின் முக்கிய நோக்கங்களில் ஒன்றாகும். இதன் ஒரு பகுதியாகவே இந்த கூட்டாண்மையில் இணைந்துள்ளதாக நிறுவனம் தெரிவித்துள்ளது.

ரிலையன்ஸ் வெளியிட்டுள்ள அறிக்கையில், “இந்த கூட்டணி இரண்டு பிராண்டுகளுக்கும் உலகளாவிய அளவில் அதிக அங்கீகாரம் கிடைக்க உதவும்,” என குறிப்பிடப்பட்டுள்ளது.

கேம்பா எனர்ஜியின் ஆதரவுடன், அஜித் குமார் ரேசிங் அணி வரும் போட்டிகளில் சர்வதேச அளவில் இந்தியாவுக்கு பெருமை சேர்க்கும் என ரசிகர்களும், மோட்டார் ஸ்போர்ட்ஸ் வட்டாரங்களும் எதிர்பார்த்து வருகின்றனர்.