நேபாளத்தில் கனமழை, நிலச்சரிவு
நேபாளத்தில் கடந்த சில நாட்களாக பெய்து வரும் கனமழையால் பல பகுதிகளில் வெள்ளம் மற்றும் நிலச்சரிவு ஏற்பட்டுள்ளது. தற்போதைய அதிகாரப்பூர்வ தகவலின்படி, நிலச்சரிவுகளில் மட்டும் 14 பேர் உயிரிழந்துள்ளனர். வெள்ளம் மற்றும் தொடர் மழை தொடர்பான பிற சம்பவங்களையும் சேர்த்து மொத்த உயிரிழப்பு எண்ணிக்கை 21 ஆக உயர்ந்துள்ளது. மேலும் 5 பேர் காணாமல் போயுள்ளதாக தெரிவிக்கப்பட்டுள்ளது.
பல மாவட்டங்களில் கடும் பாதிப்பு
செப்டம்பர் 24 முதல் 27 வரை தொடர்ச்சியாக பெய்த கனமழையால் நேபாளத்தின் பல மாவட்டங்களில் சாலைகள் துண்டிக்கப்பட்டுள்ளன. வீடுகள் சேதமடைந்துள்ளன. மலைப்பகுதிகளில் நிலச்சரிவுகள் ஏற்பட்டு போக்குவரத்து பாதிக்கப்பட்டுள்ளதுடன், மீட்பு குழுக்களின் பணிகளும் சிரமமடைந்துள்ளன.
Baglung பகுதியில் 4 பேர் பலி
Baglung மாவட்டத்தின் Nishikhola பகுதியில் ஏற்பட்ட நிலச்சரிவில் ஒரு வீடு மண்ணுக்குள் புதைந்ததில் 4 பேர் உயிரிழந்துள்ளனர். பல இடங்களில் நிலச்சரிவு ஏற்பட்டுள்ளதால் சாலைகளில் மண் மற்றும் பாறைகள் சரிந்து விழுந்து போக்குவரத்து நிறுத்தப்பட்டுள்ளது.
ஆறுகளில் நீர்மட்டம் உயர்வு
Narayani உள்ளிட்ட முக்கிய ஆறுகளில் நீர்மட்டம் அபாய அளவை எட்டியுள்ளது. தாழ்வான பகுதிகளில் வசிக்கும் மக்கள் பாதுகாப்பான இடங்களுக்கு செல்ல அறிவுறுத்தப்பட்டுள்ளனர். வெள்ள அபாயம் அதிகம் உள்ள பல மாவட்டங்களில் அதிகாரிகள் எச்சரிக்கை விடுத்துள்ளனர்.
3,000 பேர் பாதுகாப்பான இடங்களுக்கு மாற்றம்
கனமழை மற்றும் நிலச்சரிவால் பாதிப்பு அதிகம் உள்ள பகுதிகளில் இருந்து சுமார் 3,000 பேர் பாதுகாப்பான இடங்களுக்கு மாற்றப்பட்டுள்ளனர். 260 வீடுகள் முழுமையாக சேதமடைந்துள்ளதுடன், மேலும் பல வீடுகள் பகுதியளவில் பாதிக்கப்பட்டுள்ளதாக தகவல் வெளியாகியுள்ளது.
மீட்பு பணிகள் தீவிரம்
பாதிக்கப்பட்ட பகுதிகளில் பாதுகாப்புப் படையினர் மற்றும் உள்ளூர் நிர்வாகம் இணைந்து மீட்பு மற்றும் நிவாரண பணிகளை மேற்கொண்டு வருகின்றனர். மோசமான வானிலை மற்றும் நிலச்சரிவுகள் காரணமாக சில இடங்களில் மீட்பு பணிகள் தாமதமாகி வருகின்றன. தொடர்ந்து மழை பெய்ய வாய்ப்பு இருப்பதால் மக்கள் எச்சரிக்கையாக இருக்குமாறு அறிவுறுத்தப்பட்டுள்ளது.
