புதுச்சேரி:
30 சட்டமன்றத் தொகுதிகள் கொண்ட புதுச்சேரியில், நான்கு முனை போட்டி நிலவுகிறது. ஆளும் என்.ஆர்.காங்கிரஸ்–பாரதிய ஜனதா கூட்டணிக்கும், காங்கிரஸ்–திமுக கூட்டணிக்கும் இடையே கடும் போட்டி நடைபெறுகிறது. இதில் நாம் தமிழர் கட்சி மற்றும் தவெக–நேயம் மக்கள் கழகம் கூட்டணியும் களத்தில் கலந்து கொண்டுள்ளன. இதன் விளைவாக, மொத்தம் 294 வேட்பாளர்கள் களம் காண்கிறார்கள்.
இந்தச் சூழலில், புதுச்சேரி சட்டமன்றத் தேர்தலுக்கான வாக்குப்பதிவு இன்று காலை 7 மணிக்குத் தொடங்கி நடைபெற்று வருகிறது. வாக்காளர்கள் நீண்ட வரிசையில் காத்து நின்று தங்களது ஜனநாயகக் கடமையை ஆற்றி வருகின்றனர். புதுச்சேரி யூனியன் பிரதேசத்தில் சுமார் 9.5 லட்சம் வாக்காளர்கள் இன்று வாக்களிக்கின்றனர்.
வி.ஓ.சி அரசுப் பள்ளியில் அமைக்கப்பட்டுள்ள வாக்குச்சாவடியில் வாக்காளர்களை வரவேற்கும் விதமாக ஒரு புதுமையான முயற்சி காணப்படுகிறது. ‘நிலா’ என்ற பெயரில் அழகொழுகும் தாவணி அணிந்த ரோபோ, வாக்காளர்களை கையில் பூக்கள் அடங்கிய தட்டுடன் வரவேற்று அனைவரது கவனத்தையும் ஈர்த்துள்ளது. “வாக்குப் பதிவு சாவடிக்கு வரவேற்கிறேன். நீங்கள் எங்கள் ஜனநாயகத்தின் தூண்கள்” என்று பல மொழிகளில் பேசி வாக்காளர்களுக்கு வழிகாட்டும் இந்த ‘நிலா’ ரோபோ பெரும் வரவேற்பை பெற்றுள்ளது.
இந்த நவீன முயற்சி, முதல் முறையாக வாக்களிக்கும் இளைஞர்கள், முதியவர்கள் உள்ளிட்ட அனைத்து தரப்பினருக்கும் ஒரு நேர்மறையான தாக்கத்தை ஏற்படுத்தியுள்ளது. வாக்குப்பதிவு செயல்முறை மிக விறுவிறுப்பாக தொடர்கிறது; பாதுகாப்பு ஏற்பாடுகள் மற்றும் தொழில்நுட்பங்கள் அனைத்தும் சரியாக செயல்படுகின்றன.
