சவுதி இளவரசர் லண்டனில் மர்ம மரணம்: அளவுக்கு அதிகமாக போதைப்பொருள் பயன்படுத்தியதால் உயிரிழந்தது விசாரணையில் அம்பலம்!

லண்டன்: சவுதி அரேபிய நாட்டின் இளவரசர்களில் ஒருவரான அப்துல் பின் அப்துல்சி பின் ஜலாவி அல் சவுத் (29), லண்டனில் உள்ள நட்சத்திர ஹோட்டல் ஒன்றில் உயிரிழந்த சம்பவம் தொடர்பான அதிகாரப்பூர்வ விசாரணை அறிக்கையை இங்கிலாந்து காவல்துறை வெளியிட்டுள்ளது.

சவுதி அரேபியாவில் மன்னராட்சி நடைபெற்று வரும் நிலையில், அந்நாட்டின் பட்டத்து இளவரசராக முகமது பின் சல்மான் செயல்பட்டு வருகிறார். அவரது குடும்பத்தைச் சேர்ந்த பலரும் இளவரசர் அந்தஸ்துடன் பல்வேறு முக்கிய அரசுப் பொறுப்புகளிலும், வணிக அமைப்புகளிலும் இடம்பெற்றுள்ளனர்.

அந்த வகையில், இளவரசர் குடும்பத்தைச் சேர்ந்த 29 வயதான ஜலாவி அல் சவுத், கடந்த ஆண்டு நவம்பர் 19-ஆம் தேதி இங்கிலாந்து நாட்டின் லண்டன் நகரில் உள்ள ஒரு ஆடம்பர நட்சத்திர ஹோட்டல் அறையில் மர்மமான முறையில் சடலமாக மீட்கப்பட்டார். இந்தச் சம்பவம் சர்வதேச அளவில் பெரும் அதிர்ச்சியையும், பல்வேறு சந்தேகங்களையும் ஏற்படுத்தியது.

தீவிர விசாரணை:

இளவரசர் படுகொலை செய்யப்பட்டாரா? அல்லது அவரது மரணத்தின் பின்னணியில் ஏதேனும் அரசியல் சதிச்செயல்கள் உள்ளதா? என்பது குறித்து இங்கிலாந்து காவல்துறை மற்றும் மருத்துவக் குழுவினர் தீவிர விசாரணை நடத்தி வந்தனர்.

விசாரணையில் வெளியான அதிர்ச்சித் தகவல்கள்:

இந்நிலையில், இளவரசரின் உடற்கூறாய்வு மற்றும் நச்சுயியல் (Toxicology) பரிசோதனை அறிக்கைகளின் அடிப்படையில் இங்கிலாந்து போலீசார் தங்களது இறுதி விசாரணை முடிவை வெளியிட்டுள்ளனர்.

அந்த அறிக்கையில் தெரிவிக்கப்பட்டுள்ளதாவது:

“இளவரசர் ஜலாவி அல் சவுத் உயிரிழப்பதற்கு முந்தைய நாள் இரவு, அளவுக்கு அதிகமாக மது அருந்தியுள்ளார். அத்துடன், அனுமதிக்கப்பட்ட அளவை விட மிக அதிக அளவில் வீரியமிக்க போதைப்பொருட்களையும் (Drug Overdose) உட்கொண்டுள்ளார். இதன் காரணமாக அவருக்குக் கடுமையான மாரடைப்பு ஏற்பட்டு உயிரிழப்பு நிகழ்ந்துள்ளது.”

மேலும், இந்தச் சம்பவத்தில் எந்தவொரு வெளிநபர்களின் தலையீடோ, சதிச்செயலோ அல்லது கொலையோ நடைபெறவில்லை என்றும், இது முற்றிலும் அளவுக்கு அதிகமான போதைப்பொருள் பயன்பாட்டினால் ஏற்பட்ட ‘தற்செயலான மரணம்’ (Accidental Death) என்றும் லண்டன் போலீசார் அதிகாரப்பூர்வமாக உறுதிப்படுத்தியுள்ளனர்.

இதன் மூலம் கடந்த சில மாதங்களாகச் சவுதி இளவரசரின் மரணத்தைச் சுற்றி நிலவி வந்த பல்வேறு வதந்திகளுக்கும் சந்தேகங்களுக்கும் இங்கிலாந்து காவல்துறை முற்றுப்புள்ளி வைத்துள்ளது.