டிட்வா புயல் தாக்கம்: கொழும்பு விமான நிலையத்தில் 150 தமிழர்கள் உட்பட 300 இந்தியர்கள் சிக்கல் – உணவு, குடிநீர் இல்லாமல் தவிப்பு
டிட்வா புயல் காரணமாக இலங்கையில் விமான சேவைகள் பாதிக்கப்பட்டுள்ள நிலையில், கொழும்பு விமான நிலையத்தில் 150 தமிழர்கள் உட்பட 300 இந்தியர்கள் கடந்த மூன்று நாட்களாக சிக்கித் தவித்து வருகின்றனர். சென்னை உள்ளிட்ட நகரங்களை நோக்கிப் புறப்பட இருந்த விமானங்கள் அனைத்தும் ரத்து செய்யப்பட்டதால், பயணிகள் அடிப்படை வசதிகளின்றி அவதிப்பட்டு வருவதாக தெரிவித்துள்ளனர்.
துபாயில் இருந்து இலங்கை வழியாக இந்தியா திரும்பிய பயணிகள் முதலில் மத்தளை விமான நிலையம் வந்தபோது அங்கும் புயல் காரணமாக விமானங்கள் நிறுத்தப்பட்டதால் முழு நாளும் அங்கு தங்க வேண்டிய நிலை ஏற்பட்டது. அங்கிருந்து கொழும்பு விமான நிலையத்துக்கு மாற்றப்பட்ட பிறகும், டிட்வா புயலால் விமானங்கள் மீண்டும் ரத்து செய்யப்பட்டதால் அவர்கள் கடும் சிரமத்தில் உள்ளனர்.
பயணிகள் உணவு மற்றும் குடிநீர் கூட கிடைக்காமல் தவிக்கும் சூழலில், விமான நிலைய அதிகாரிகளுடன் பலர் வாக்குவாதத்திலும் ஈடுபட்டுள்ளனர். “எங்களிடம் இருந்த இந்திய ரூபாய் மற்றும் குவைத் பணம் எங்கும் ஏற்கப்படவில்லை. மத்தளையிலும் உணவு வாங்க முடியவில்லை. இங்கேயும் விமானங்கள் ரத்து செய்யப்பட்டதால் பல மணி நேரங்களாக உணவு இன்றி இருக்கிறோம்,” என ஒரு பெண் பயணி வேதனையுடன் கூறினார்.
இதேநேரத்தில், இலங்கையில் டிட்வா புயல் தாக்கம் தீவிரமாக உள்ளது. ஆழ்ந்த காற்றழுத்த தாழ்வு மண்டலம் புயலாக உருவானதும், கிழக்கு கடற்கரை பகுதிகளில் கனமழை தொடர்ச்சியாக பெய்து வருகிறது. பல மாவட்டங்களில் வீடுகள் வெள்ளத்தில் அடித்து செல்லப்பட்டுள்ளன; ரயில் சேவைகள் பெருமளவில் நிறுத்தப்பட்டுள்ளன. இதுவரை சுமார் 90 பேர் உயிரிழந்துள்ளதாகவும், 100க்கும் மேற்பட்டோர் காணாமல் போயுள்ளதாகவும் தகவல் வெளியாகியுள்ளது.
பாதிக்கப்பட்ட மக்களை மீட்கவும், உதவிகளையும் வழங்கவும் இலங்கை அரசு 20,500 ராணுவத்தினரை நியமித்துள்ளது. புயல் தாக்கம் மேலும் தீவிரப்படக் கூடும் என எச்சரிக்கை விடுக்கப்பட்டதால், போக்குவரத்து மற்றும் பொதுச்சேவைகள் கடுமையாக பாதிக்கப்பட்டுள்ளன.
