வெளிநாட்டு தமிழர்கள் வாக்களிக்க ஊருக்கு திரும்புகின்றனர்!
தமிழக சட்டப்பேரவைத் தேர்தலில் பங்கேற்க வெளிநாடுகளில் வேலை செய்யும் தமிழக மக்கள் திரளாகத் திரும்புகின்றனர். நாளை ஏப்ரல் 23 அன்று 234 தொகுதிகளிலும் வாக்குப்பதிவு நடைபெற உள்ளது. 5 கோடி 73 லட்சம் வாக்காளர்கள் 75 ஆயிரம் வாக்குச் சாவடிகளில் வாக்களிக்கின்றனர்.
ஐக்கிய அரபு அமீரகம், சவுதி அரேபியா, குவைத், ஓமன், பக்ரைன், பிரான்ஸ், ஜெர்மனி, அமெரிக்கா, சிங்கப்பூர், மலேசியா, தாய்லாந்து நாடுகளில் வேலை செய்யும் தமிழர்கள் குழுவாகவும், தனியாகவும் விமானங்கள் மூலம் சென்னை, திருச்சி, கோவை, திருவனந்தபுரம் விமான நிலையங்களுக்கு வந்து சொந்த ஊர்களுக்கு செல்கின்றனர். குறைந்த செலவு விமானங்களைத் தேர்ந்தெடுத்து பயணித்து, வாக்குச் சாவடிகளுக்கு செல்கின்றனர்.
குடியுரிமையைத் தக்கவைத்து வாக்காளர் பட்டியலில் பெயர் உள்ளவர்கள் மட்டுமே வாக்களிக்க முடியும். தபால் வாக்கு வசதி இல்லாததால் நேரில் வர வேண்டியுள்ளது. வாக்காளர் அடையாள அட்டை இல்லாதவர்கள் ஆதார், பாஸ்போர்ட், ஓட்டுநர் உரிமம் உள்ளிட்ட 12 அடையாள ஆவணங்களில் ஒன்றை எடுத்துச் செல்லலாம்.
தங்கள் வாக்குச் சாவடி, பாகம் எண், வரிசை எண்ணை electorssearch.eci.gov.in, ECINET, Votershelpline, Sweetha ஆப்கள் மூலம் அறிந்து கொள்ளலாம். பூத் ஸ்லிப் கியூ ஆர் கோடு ஸ்கேன் செய்தும் தெரிந்து கொள்ளலாம்.
சமூக ஊடகங்களில் விஜய், ஸ்டாலின், பழனிசாமி உள்ளிட்ட தலைவர்களுக்கு ஆதரவாக உற்சாகம் தெரிவிக்கும் வெளிநாட்டு தமிழர்கள், “வாக்களித்து தேர்தல் முடிவுகளைப் பார்த்து திரும்புவோம்” எனக் கூறுகின்றனர். இவர்களது வருகை வாக்கு சதவீதத்தை 85 சதவீதத்திற்கும் மேல் உயர்த்தும் என எதிர்பார்க்கப்படுகிறது.
