சென்னை:
சென்னை வள்ளுவர் கோட்டத்தில் இன்று பரபரப்பான சூழல் நிலவியது. நாம் தமிழர் கட்சியின் தலைமை ஒருங்கிணைப்பாளர் சீமான், காவல்துறையினரால் கைது செய்யப்பட்டு பின்னர் விடுவிக்கப்பட்டார்.
இன்று தமிழ்நாடு மாநில ஊரக வாழ்வாதார இயக்கம் மற்றும் அனைத்து பணியாளர்கள் நலச்சங்கம் சார்பில் முற்றுகைப் போராட்டம் நடத்தப்பட்டது. 10 ஆண்டுகளுக்கும் மேலாக பணியாற்றி வரும் ஊரக மற்றும் நகர்ப்புற மகளிர் திட்ட பணியாளர்களுக்கு ஊதிய உயர்வு வழங்குதல், நிரந்தரப் பணியாளர் அந்தஸ்து வழங்குதல், மேலும் மகளிர் மேம்பாட்டு நிறுவனத்தில் தேர்வில் தேர்ச்சி பெற்றவர்களை நிரந்தரமாக நியமித்தல் ஆகிய கோரிக்கைகளை வலியுறுத்தி இந்த போராட்டம் நடைபெற்றது.
போராட்டத்தில் மாநிலம் முழுவதும் இருந்து நூற்றுக்கணக்கான பணியாளர்கள் பங்கேற்றனர். இப்போராட்டத்துக்கு பல்வேறு அரசியல் கட்சிகள் ஆதரவு தெரிவித்துள்ளன. அந்த வரிசையில், நாம் தமிழர் கட்சியின் ஒருங்கிணைப்பாளர் சீமான் போராட்ட இடத்துக்கு நேரில் சென்று பங்கேற்ற பணியாளர்களைச் சந்தித்து, அவர்களது கோரிக்கைகளுக்கு ஆதரவு தெரிவித்தார்.
அப்போது, போராட்டம் நடைபெறும் இடத்தில் சீமான் மற்றும் காவல்துறையினருக்கிடையே வாக்குவாதம் ஏற்பட்டது. போராட்டக்காரர்களை கைது செய்யும் நடவடிக்கையில் இருந்த போலீசாரிடம் சீமான்,
“நான் இந்த நாட்டின் குடிமகன் தான்; இங்கே இருக்க எனக்கு உரிமை இல்லையா?”
என்று கேள்வி எழுப்பியதாக தகவல்கள் தெரிவிக்கின்றன.
இதையடுத்து, காவல்துறையினர் போராட்டக்காரர்களை கைது செய்து வாகனத்தில் ஏற்றினர். அதைப் பார்த்த சீமான், “அவர்களுடன் என்னையும் கைது செய்யுங்கள்” என்று கூறி, போராட்டக்காரர்களுடன் சேர்ந்து வேனில் ஏறினார். இதையடுத்து காவல்துறையினர் அவரையும் கைது செய்தனர்.
சில மணிநேர விசாரணைக்குப் பிறகு, சீமான் விடுவிக்கப்பட்டார். அவரது கைது காரணமாக வள்ளுவர் கோட்டம் மற்றும் சுற்றுவட்டாரங்களில் சிறிது நேரம் பரபரப்பு நிலவியது.
பின்னர் செய்தியாளர்களிடம் பேசிய சீமான்,
“போராட்டத்தில் ஈடுபட்ட மக்களைச் சந்திக்க கூட அனுமதி இல்லையா?
ஜனநாயக நாட்டில் இது போன்ற கட்டுப்பாடுகள் ஏன்?”
என்று கேள்வி எழுப்பினார்.
சீமான் கைது மற்றும் விடுதலை சம்பவம் அரசியல் வட்டாரங்களில் பரபரப்பை ஏற்படுத்தியுள்ளது. பல கட்சித் தலைவர்கள் இந்த நடவடிக்கையை கண்டித்துள்ளனர்.
