புதுடெல்லி:
நாடாளுமன்ற பட்ஜெட் கூட்டத்தொடரின் இரண்டாவது கட்ட அமர்வு நேற்று தொடங்கிய நிலையில், இன்று நடைபெற்ற மக்களவை கூட்டத்தில் கடும் அரசியல் மோதல் ஏற்பட்டது. சபாநாயகர் ஓம் பிர்லாவுக்கு எதிராக எதிர்க்கட்சிகள் கொண்டு வந்த நம்பிக்கையில்லா தீர்மானம், சமையல் எரிவாயு சிலிண்டர் தட்டுப்பாடு குறித்த விவாதம் உள்ளிட்ட பல்வேறு விவகாரங்களை முன்னிட்டு அவையில் பரபரப்பான சூழல் நிலவியது.
முன்னதாக நடைபெற்ற முதல் கட்ட கூட்டத்தொடரில் ஏற்பட்ட அமளி காரணமாக எதிர்க்கட்சியைச் சேர்ந்த 8 எம்.பி.க்கள் இடைநீக்கம் செய்யப்பட்டிருந்தனர். மேலும் சபாநாயகர் ஓம் பிர்லா ஒருதலைப்பட்சமாக செயல்படுகிறார் என்று குற்றம் சாட்டிய எதிர்க்கட்சிகள், அவரை பதவி நீக்கம் செய்யும் நோட்டீசையும் அளித்திருந்தனர். இதன் அடிப்படையில், இரண்டாவது கட்ட கூட்டத்தொடரில் சபாநாயகருக்கு எதிரான தீர்மானம் குறித்து விவாதிக்க திட்டமிடப்பட்டது.
இன்று காலை 11 மணிக்கு மக்களவை கூட்டம் தொடங்கியதும் மத்திய வேளாண்துறை அமைச்சர் சிவராஜ் சிங் பல்வேறு கேள்விகளுக்கு பதில் அளித்தார். அப்போது மேற்கு வங்கத்தில் திரிணாமுல் காங்கிரஸ் அரசு விவசாயிகளுக்கான நலத்திட்டங்களை முறையாக செயல்படுத்தவில்லை என்று அவர் குற்றம் சாட்டினார். இதற்கு திரிணாமுல் காங்கிரஸ் எம்.பி.க்கள் கடும் எதிர்ப்பு தெரிவித்தனர். அவர்கள் தலைமை தேர்தல் ஆணையர் ஞானேஷ் குமார் மற்றும் தேர்தல் ஆணையத்துக்கு எதிராக முழக்கமிட்டனர். இதனால் அவையில் அமளி ஏற்பட்டதால் சபை முதலில் 12 மணி வரை ஒத்திவைக்கப்பட்டது.
பின்னர் மீண்டும் கூடிய அவையில் சபாநாயகர் ஓம் பிர்லாவுக்கு எதிரான நம்பிக்கையில்லா தீர்மானம் குறித்து விவாதம் தொடங்கியது. காங்கிரஸ் கட்சியைச் சேர்ந்த கவுரவ் கோகோய், மணிஷ் திவாரி உள்ளிட்ட 118 எம்.பி.க்கள் கையெழுத்திட்ட இந்த தீர்மானத்தில், சபாநாயகர் பாரபட்சமாக செயல்படுகிறார் என்று குற்றம் சாட்டப்பட்டுள்ளது.
இந்த தீர்மானம் குறித்து விவாதிக்கும்போது அவையை யார் நடத்த வேண்டும் என்ற கேள்வியும் எழுந்தது. இதற்கு பதிலளித்த காங்கிரஸ் எம்.பி. கே.சி. வேணுகோபால், பல ஆண்டுகளாக துணை சபாநாயகரை நியமிக்காமல் அரசு அரசியலமைப்புச் சட்டத்தில் வெற்றிடம் ஏற்படுத்தியுள்ளது என்று கூறினார். இதற்கு மத்திய அமைச்சர் கிரண் ரிஜ்ஜு பதிலளித்து, தலைவர் குழுவில் உள்ள ஜெகதாம்பிகா பால் அவைக்கு தலைமை தாங்குவார் என்று தெரிவித்தார்.
அதனைத் தொடர்ந்து காங்கிரஸ் எம்.பி. முகமது ஜாவேத் சபாநாயகர் ஓம் பிர்லாவை பதவி நீக்க கோரும் தீர்மானத்தை முன்வைத்தார். இந்த தீர்மானம் குறித்து சுமார் 10 மணி நேரம் விவாதிக்க நேரம் ஒதுக்கப்பட்டது. ஆனால் விவாதம் நடைபெறும் போதே மீண்டும் கடும் அமளி ஏற்பட்டதால் அவை முதலில் 2 மணி வரை ஒத்திவைக்கப்பட்டது. பின்னர் ஏற்பட்ட தொடர்ச்சியான குழப்பத்தால் அவை நாள் முழுவதும் ஒத்திவைக்கப்பட்டது.
இதற்கிடையில், அவை தொடங்கிய உடனே எதிர்க்கட்சிகள் சமையல் எரிவாயு சிலிண்டர் தட்டுப்பாடு குறித்து அவசரமாக விவாதிக்க வேண்டும் என்று நோட்டீஸ் அளித்தனர். பொதுமக்கள் முன்பதிவு செய்தும் பல வாரங்களாக சிலிண்டர் கிடைக்காமல் அவதிப்படுகிறார்கள் என்றும், செயற்கையாக தட்டுப்பாடு உருவாக்கப்பட்டுள்ளதாகவும் எதிர்க்கட்சிகள் குற்றம் சாட்டினர்.
காங்கிரஸ், திமுக மற்றும் இடதுசாரி கட்சிகளைச் சேர்ந்த எம்.பி.க்கள் அவையின் மையப்பகுதிக்கு வந்து பதாகைகளை ஏந்தி மத்திய அரசுக்கு எதிராக முழக்கமிட்டனர். ஏழை மற்றும் நடுத்தர மக்களின் அத்தியாவசிய தேவையான சமையல் எரிவாயுவை தட்டுப்பாடின்றி வழங்கத் தவறிய மத்திய அரசு பதவி விலக வேண்டும் என்றும், பிரதமர் நரேந்திர மோடி இந்த விவகாரத்துக்கு பொறுப்பேற்று ராஜினாமா செய்ய வேண்டும் என்றும் அவர்கள் வலியுறுத்தினர்.
அரசு தரப்பில் பதிலளித்த மத்திய அமைச்சர்கள், சிலிண்டர் தட்டுப்பாடு தொடர்பாக விசாரணை நடத்தப்படும் என்றும், விநியோகத்தில் ஏற்பட்டுள்ள சிக்கல்கள் விரைவில் சரிசெய்யப்படும் என்றும் தெரிவித்தனர். எனினும் அந்த விளக்கத்தில் திருப்தியடையாத எதிர்க்கட்சிகள் வெளிநடப்பு செய்தனர்.
மேலும் மற்றொரு முக்கிய விவகாரமாக தலைமை தேர்தல் ஆணையர் ஞானேஷ் குமாருக்கு எதிராகவும் எதிர்க்கட்சிகள் நடவடிக்கை எடுக்கத் திட்டமிட்டுள்ளன. திரிணாமுல் காங்கிரஸ் தலைமையில் காங்கிரஸ் மற்றும் சமாஜ்வாதி கட்சிகள் இணைந்து அவரை பதவி நீக்கம் செய்யும் தீர்மானத்தை கொண்டு வர முயற்சி செய்து வருகின்றன.
மேற்கு வங்கத்தில் நடைபெற்ற வாக்காளர் பட்டியல் திருத்தத்தில் முறைகேடுகள் நடந்ததாக குற்றம் சாட்டிய எதிர்க்கட்சிகள், தேர்தல் ஆணையத்தின் செயல்பாடு பாரபட்சமாக உள்ளது என்றும் தெரிவித்துள்ளனர். இந்த தீர்மானத்திற்கான நோட்டீஸ் மாநிலங்களவையில் 50 எம்.பி.க்கள் அல்லது மக்களவையில் 100 எம்.பி.க்கள் கையெழுத்துடன் விரைவில் தாக்கல் செய்யப்பட வாய்ப்பு இருப்பதாக தகவல்கள் வெளியாகியுள்ளன.
சபாநாயகர் மற்றும் தலைமை தேர்தல் ஆணையர் உள்ளிட்ட முக்கிய பதவிகளில் உள்ளவர்களுக்கு எதிராக எதிர்க்கட்சிகள் ஒரே நேரத்தில் நடவடிக்கை எடுத்து வருவதால், நாடாளுமன்ற அரசியல் சூழல் மேலும் பரபரப்பாக மாறியுள்ளது.
