திருச்சி,
தமிழக சட்டமன்றத் தேர்தலை முன்னிட்டு அரசியல் களம் சூடுபிடித்துள்ள நிலையில், தமிழக வெற்றிக் கழக தலைவர் விஜய் திருச்சி கிழக்கு தொகுதியில் இன்று வேட்புமனு தாக்கல் செய்தார். இந்த தேர்தலில் சென்னை பெரம்பூர் மற்றும் திருச்சி கிழக்கு ஆகிய இரு தொகுதிகளில் விஜய் போட்டியிடுவது குறிப்பிடத்தக்கது.
வேட்புமனு தாக்கல் தொடங்கிய முதல் நாளிலேயே பெரம்பூர் தொகுதியில் மனு தாக்கல் செய்த விஜய், அதே நாளில் பெரம்பூர் மற்றும் கொளத்தூர் பகுதிகளில் தீவிர பிரசாரமும் மேற்கொண்டார். பின்னர் வில்லிவாக்கம் மற்றும் அண்ணாநகர் பகுதிகளில் பிரசாரம் மேற்கொள்ள திட்டமிட்டிருந்தாலும், பாதுகாப்பு காரணங்களால் அந்த நிகழ்ச்சிகள் தற்காலிகமாக ஒத்திவைக்கப்பட்டன.
இந்த நிலையில், திருச்சி கிழக்கு தொகுதியில் மனு தாக்கல் செய்வதற்காக விஜய் இன்று காலை சென்னையிலிருந்து தனியார் விமானம் மூலம் திருச்சிக்கு பயணம் மேற்கொண்டார். பின்னர் திருச்சி மாநகராட்சி இரண்டாவது மண்டல அலுவலகத்தில் அமைந்துள்ள தேர்தல் அதிகாரி அலுவலகத்தில் தனது வேட்புமனுவை தாக்கல் செய்தார்.
வேட்புமனு தாக்கலுக்கு பிறகு, திறந்த வாகனத்தில் நின்றபடி மரக்கடை எம்.ஜி.ஆர். சிலை அருகே விஜய் தேர்தல் பிரசாரம் மேற்கொண்டார். அங்கு கூடியிருந்த பொதுமக்கள் மற்றும் ஆதரவாளர்களிடம் வாக்கு சேகரிப்பில் ஈடுபட்டார். தொடர்ந்து காந்தி மார்க்கெட், டி.வி.எஸ். டோல்கேட் வழியாக விமான நிலையத்துக்குச் சென்று, அங்கிருந்து மீண்டும் சென்னை திரும்ப திட்டமிட்டுள்ளார்.
விஜய்யின் வருகையை முன்னிட்டு திருச்சியில் கடுமையான பாதுகாப்பு ஏற்பாடுகள் செய்யப்பட்டிருந்தன. மாநகர போலீஸ் கமிஷனர் காமினி நேரடியாக சம்பவ இடங்களை ஆய்வு செய்து, எந்தவித அசம்பாவிதமும் ஏற்படாத வகையில் பாதுகாப்பு நடவடிக்கைகளை மேற்கொள்ள அதிகாரிகளுக்கு அறிவுறுத்தினார். மேலும், த.வெ.க. கட்சியின் முக்கிய நிர்வாகிகளும் பிரசார இடங்களை முன்கூட்டியே பார்வையிட்டனர்.
திருச்சி கிழக்கு தொகுதி 2008ஆம் ஆண்டு தொகுதி மறுசீரமைப்பின் போது உருவாக்கப்பட்டது. மலைக்கோட்டை தாயுமானவர் கோவில், நத்தர்ஷா பள்ளிவாசல், லூர்து அன்னை ஆலயம் போன்ற முக்கிய ஆன்மிக இடங்கள் உள்ள இந்த தொகுதி முழுக்க நகர்ப்புற பகுதியாகும். திருச்சி மாநகராட்சியின் முக்கிய பகுதிகள் இதில் அடங்குகின்றன.
முந்தைய தேர்தல் வரலாற்றைப் பார்க்கும்போது, 2016ஆம் ஆண்டு அதிமுகவும், 2021ஆம் ஆண்டு திமுகவும் இத்தொகுதியில் வெற்றி பெற்றுள்ளன. தற்போது திமுக சார்பில் மீண்டும் இனிகோ இருதயராஜ் களம் இறக்கப்பட்டுள்ள நிலையில், அதிமுக சார்பில் ராஜேசேகரன் போட்டியிடுகிறார். இந்நிலையில் விஜய்யும் களமிறங்கியுள்ளதால், இங்கு மும்முனை போட்டி நிலவும் சூழல் உருவாகியுள்ளது.
இந்த தொகுதியில் பெண்கள், இளைஞர்கள் மற்றும் கிறித்தவ சமூக வாக்காளர்கள் அதிகமாக உள்ளனர். இந்த வாக்குகள் தேர்தல் முடிவை தீர்மானிக்கும் முக்கிய காரணமாக இருக்கும் என அரசியல் வட்டாரங்கள் கருதுகின்றன.
மொத்தத்தில், விஜய்யின் வேட்புமனு தாக்கலும், பிரசாரமும் திருச்சி கிழக்கு தொகுதியில் தேர்தல் சூழலை மேலும் தீவிரப்படுத்தியுள்ளது.
