தமிழ்நாடு சட்டமன்ற தேர்தலுக்கான வாக்கு எண்ணிக்கை பணிகள் தீவிரமடைந்துள்ள நிலையில், சென்னை மாவட்டத்தில் வாக்கு எண்ணிக்கை மையங்களில் பணிபுரியவுள்ள மேற்பார்வையாளர்கள், உதவியாளர்கள் மற்றும் நுண் பார்வையாளர்கள் கணினி குலுக்கல் முறையில் தேர்வு செய்யப்பட்டுள்ளனர். தேர்தல் பணிகளில் வெளிப்படைத்தன்மை மற்றும் நியாயத்தை உறுதி செய்யும் வகையில் இந்த நடவடிக்கை மேற்கொள்ளப்பட்டுள்ளது.
சென்னை மாவட்ட தேர்தல் அலுவலரும் மாநகராட்சி ஆணையாளருமான ஜெ. குமரகுருபரன் தலைமையில் ரிப்பன் கட்டட வளாக அலுவலகக் கூட்டரங்கில் இந்த தேர்வு நடைபெற்றது. சட்டமன்றத் தொகுதி வாரியாக முதற்கட்டமாக பணியாளர்கள் கணினி மூலம் சீரான முறையில் தேர்வு செய்யப்பட்டனர்.
தமிழக சட்டமன்ற பொதுத்தேர்தல் கடந்த ஏப்ரல் 23-ஆம் தேதி நடைபெற்றது. சென்னை மாவட்டத்தில் உள்ள 16 சட்டமன்ற தொகுதிகளிலும் வாக்குப்பதிவு அமைதியான முறையில் நிறைவு பெற்றது. பதிவான வாக்குகள் தற்போது பலத்த பாதுகாப்புடன் வாக்கு எண்ணும் மையங்களில் வைக்கப்பட்டுள்ளன.
சென்னையில் மூன்று முக்கிய வாக்கு எண்ணிக்கை மையங்கள் அமைக்கப்பட்டுள்ளன. ராணி மேரி கல்லூரி, லயோலா கல்லூரி மற்றும் அண்ணா பல்கலைக்கழகம் ஆகிய இடங்களில் பாதுகாப்பு அறைகளில் மின்னணு வாக்குப்பதிவு இயந்திரங்கள் சீல் வைக்கப்பட்டு மூன்று அடுக்கு பாதுகாப்பில் கண்காணிக்கப்பட்டு வருகின்றன.
டாக்டர் ராதாகிருஷ்ணன் நகர், ராயபுரம், சேப்பாக்கம்-திருவல்லிக்கேணி உள்ளிட்ட தொகுதிகளின் வாக்குகள் ராணி மேரி கல்லூரியில் எண்ணப்படுகின்றன. பெரம்பூர், கொளத்தூர், வில்லிவாக்கம் உள்ளிட்ட தொகுதிகளின் வாக்குகள் லயோலா கல்லூரியில் எண்ணப்படுகின்றன. மயிலாப்பூர், வேளச்சேரி, தியாகராயநகர் உள்ளிட்ட பகுதிகளின் வாக்குகள் அண்ணா பல்கலைக்கழகத்தில் எண்ணப்பட உள்ளன.
மே 4-ஆம் தேதி நடைபெற உள்ள வாக்கு எண்ணிக்கைக்காக மொத்தம் 1,005 பேர் தேர்வு செய்யப்பட்டுள்ளனர். இதில் மேற்பார்வையாளர்கள், உதவியாளர்கள் மற்றும் நுண் பார்வையாளர்கள் அடங்குவர்.
இந்த தேர்வு முறையால் எந்த வித சார்பும் இன்றி நியாயமான முறையில் பணியாளர்கள் நியமிக்கப்படுவார்கள் என்பதால் தேர்தல் ஆணையத்தின் நடவடிக்கை முக்கியத்துவம் பெறுகிறது.
