தமிழக சட்டசபை தேர்தலுக்கான வாக்கு எண்ணிக்கை இன்று காலை முதல் மாநிலம் முழுவதும் பரபரப்பாக நடைபெற்று வருகிறது. நாகை மாவட்டத்திலும் நாகப்பட்டினம், கீழ்வேளூர் மற்றும் வேதாரண்யம் உள்ளிட்ட தொகுதிகளுக்கான வாக்குகள் எண்ணப்பட்டு வருகின்றன. இந்த நிலையில், வாக்கு எண்ணிக்கை மையத்தில் கட்சித் தலைவர் விஜய்யின் முகம் பொறித்த சட்டை அணிந்து வந்த தமிழக வெற்றிக் கழக (தவெக) முகவர் வெளியேற்றப்பட்ட சம்பவம் பரபரப்பை ஏற்படுத்தியது.
நாகை மாவட்டம் புத்தூர் பகுதியில் அமைக்கப்பட்டுள்ள வாக்கு எண்ணிக்கை மையத்திற்கு இன்று காலை பல்வேறு கட்சிகளின் முகவர்கள் மற்றும் தேர்தல் அதிகாரிகள் வந்தனர். அப்போது, தவெக சார்பில் வந்த முகவர் ஒருவர் கட்சித் தலைவர் விஜய்யின் புகைப்படம் அச்சிடப்பட்ட சட்டை அணிந்து உள்ளே செல்ல முயன்றார். இதை கவனித்த பாதுகாப்பு பணியில் இருந்த போலீசார் மற்றும் தேர்தல் அதிகாரிகள் உடனடியாக அவரை தடுத்து நிறுத்தினர்.
வாக்கு எண்ணிக்கை மையங்களில் எந்தவித அரசியல் சின்னம், கட்சி கொடி, தலைவர்களின் புகைப்படம் அல்லது பிரச்சார வாசகங்கள் கொண்ட உடைகள் அணிந்து செல்லக்கூடாது என்பது தேர்தல் ஆணைய விதிமுறையாகும். இதன்படி, சம்பந்தப்பட்ட முகவரிடம் உடையை மாற்றிவிட்டு வருமாறு போலீசார் அறிவுறுத்தினர். பின்னர் அவர் மையத்திலிருந்து வெளியேற்றப்பட்டதாக கூறப்படுகிறது.
இந்த சம்பவத்தால் வாக்கு எண்ணிக்கை மையம் அருகே சில நிமிடங்கள் பரபரப்பு நிலவியது. பின்னர் பாதுகாப்பு அதிகாரிகள் நிலைமையை சீர்செய்து வழக்கமான பணிகளைத் தொடர்ந்தனர். தேர்தல் நடைமுறைகள் முறையாக பின்பற்றப்பட வேண்டும் என்பதில் அதிகாரிகள் கடுமையாக செயல்பட்டு வருவதாக தகவல் வெளியாகியுள்ளது.
தமிழகத்தின் பல்வேறு வாக்கு எண்ணிக்கை மையங்களிலும் பாதுகாப்பு மற்றும் ஒழுங்கு விதிகள் தீவிரமாக அமல்படுத்தப்பட்டுள்ள நிலையில், நாகையில் நடந்த இந்த சம்பவம் அரசியல் வட்டாரங்களில் பேசுபொருளாகியுள்ளது.
