தமிழ்நாடு சட்டப்பேரவை தேர்தல் 2026 வாக்கு எண்ணிக்கை சற்று நேரத்தில் தொடங்க உள்ள நிலையில், மாநிலம் முழுவதும் பாதுகாப்பு ஏற்பாடுகள் தீவிரப்படுத்தப்பட்டுள்ளன. 234 தொகுதிகளுக்கான தேர்தல் கடந்த ஏப்ரல் 23ஆம் தேதி ஒரே கட்டமாக நடைபெற்றது. இந்த தேர்தலில் மொத்தம் 4,023 வேட்பாளர்கள் களமிறங்கியிருந்தனர்.
முக்கிய தலைவர்கள் போட்டியிட்ட தொகுதிகள் மீது அதிக கவனம் செலுத்தப்பட்டுள்ளது. முதல்வர் மு.க. ஸ்டாலின் கொளத்தூர் தொகுதியில் போட்டியிட்டுள்ளார். எதிர்க்கட்சித் தலைவர் எடப்பாடி கே. பழனிசாமி எடப்பாடி தொகுதியில் களமிறங்கியுள்ளார். தமிழக வெற்றிக் கழக தலைவர் விஜய் திருச்சி கிழக்கு மற்றும் பெரம்பூர் ஆகிய இரு தொகுதிகளில் போட்டியிட்டுள்ளார். நாம் தமிழர் கட்சியின் ஒருங்கிணைப்பாளர் சீமான் காரைக்குடி தொகுதியில் போட்டியிட்டுள்ளார்.
தமிழகத்தில் மொத்தம் 5.73 கோடி வாக்காளர்கள் உள்ள நிலையில், சுமார் 4.88 கோடி பேர் வாக்களித்துள்ளனர். இதில் ஆண் வாக்காளர்கள் 2.35 கோடி பேரும், பெண் வாக்காளர்கள் 2.56 கோடி பேரும் அடங்குவர். இந்த தேர்தலில் 85.15 சதவீத வாக்குகள் பதிவாகி, தமிழக தேர்தல் வரலாற்றில் புதிய சாதனை படைக்கப்பட்டுள்ளது.
வாக்கு எண்ணிக்கைக்காக மாநிலம் முழுவதும் பலத்த பாதுகாப்பு போடப்பட்டுள்ளது. சுமார் 1 லட்சம் காவல்துறையினர் பாதுகாப்பு பணியில் ஈடுபடுத்தப்பட்டுள்ளனர். வாக்கு எண்ணும் மையங்கள் அனைத்திலும் மூன்றடுக்கு பாதுகாப்பு, சிசிடிவி கண்காணிப்பு, அடையாள அட்டை சோதனை உள்ளிட்ட கடுமையான நடைமுறைகள் அமலில் உள்ளன.
திமுக கூட்டணி, அதிமுக கூட்டணி, தமிழக வெற்றிக் கழகம் மற்றும் நாம் தமிழர் கட்சி இடையே நான்கு முனைப் போட்டி நிலவுவதால், இந்த தேர்தல் முடிவுகள் தமிழக அரசியலில் மிகப்பெரிய தாக்கத்தை ஏற்படுத்தும் என எதிர்பார்க்கப்படுகிறது. கருத்துக்கணிப்புகள் பலவிதமாக இருந்தாலும், இறுதி தீர்ப்பு இன்று வாக்கு எண்ணிக்கையால் தெரியவர உள்ளது.
