தமிழ்நாட்டின் தேர்தல் முடிவுகள் வெளியான பிறகு அரசியல் களம் மிகுந்த பரபரப்பை அடைந்துள்ளது. நடிகர் விஜய் தலைமையிலான தமிழக வெற்றி கழகம் 108 இடங்களில் வெற்றி பெற்று தனிப்பெரும் கட்சியாக உருவெடுத்திருந்தாலும், ஆட்சியை அமைப்பதற்கும் அதை நிலைநிறுத்துவதற்கும் பல சவால்கள் காத்திருக்கின்றன.
முதல் முறையாக மாநில அரசியலில் இவ்வளவு பெரிய வெற்றியைப் பெற்றுள்ள விஜய்க்கு, இனி தேர்தல் வெற்றியை நிர்வாக வெற்றியாக மாற்ற வேண்டிய பொறுப்பு உருவாகியுள்ளது. மக்கள் எதிர்பார்ப்பு அதிகமாக இருக்கும் நிலையில், அவரின் அடுத்தடுத்த முடிவுகள் தமிழக அரசியலின் போக்கையே தீர்மானிக்கக்கூடும்.
ஆட்சி அமைப்பதற்குத் தேவையான 118 என்ற பெரும்பான்மை இலக்கை எட்ட விஜய் இன்னும் 10 இடங்கள் குறைவாக உள்ளார். இதனால், கூட்டணி அமைப்பது குறித்து தீவிர ஆலோசனைகள் நடைபெற்று வருகின்றன. 5 இடங்களைப் பெற்றுள்ள காங்கிரஸ் கட்சி, தேசிய தலைமையின் முடிவுக்காக காத்திருப்பதாக கூறப்படுகிறது. அதேபோல், 4 இடங்களில் வெற்றி பெற்றுள்ள பாட்டாளி மக்கள் கட்சி மற்றும் சில சிறிய கட்சிகளையும் இணைப்பது குறித்து பேச்சு நடைபெறலாம் என அரசியல் வட்டாரங்கள் தெரிவிக்கின்றன. வெளியில் இருந்து ஆதரவு பெறும் வாய்ப்பும் பேசப்பட்டாலும், அது எளிதானதாக இருக்காது. எனவே, பெரும்பான்மையை உருவாக்குவது விஜய்யின் முதல் பெரிய சவாலாக அமைந்துள்ளது.
மக்களவை அல்லாது, சட்டமன்றத்தில் ஆட்சியமைப்பதற்கான அழைப்பை தனிப்பெரும் கட்சி என்ற அடிப்படையில் ஆளுநர் வழங்க வாய்ப்புள்ளது. ஆனால், ஆட்சிப் பொறுப்பை ஏற்றுக்கொண்ட பிறகு 15 நாட்களுக்குள் சட்டமன்றத்தில் பெரும்பான்மையை நிரூபிக்க வேண்டிய கட்டாயம் ஏற்படும். இந்த காலக்கெடு தான் விஜய்யின் அரசியல் பயணத்தில் மிக முக்கியமான அக்னிப் பரீட்சையாக பார்க்கப்படுகிறது. ஆட்சியைப் பிடிப்பதைவிட அதைத் தக்கவைத்துக்கொள்வதே கடினம் என்ற நிலையில், இந்த முதல் சோதனை அவருக்கு பெரும் அழுத்தமாக இருக்கும்.
அதேநேரம், ஆட்சியை உறுதிப்படுத்தும் வரை தவெக சட்டமன்ற உறுப்பினர்களை பாதுகாப்பாக வைத்திருக்க ரிசார்ட்டுகளில் தங்க வைக்கும் யோசனையும் பேசப்பட்டு வருகிறது. முந்தைய அரசியல் அனுபவங்களில் பார்த்தது போல, உறுப்பினர்களை கலைப்பதற்கும் இழுக்கும் முயற்சிகளுக்கும் இடமளிக்காமல் இருப்பதே இதன் நோக்கமாக இருக்கும். இவ்வகை ஏற்பாடுகள், அரசியல் நிலைத்தன்மையை காக்கும் முயற்சியாக இருந்தாலும், மக்கள் மத்தியில் அது புதிய விவாதத்தையும் ஏற்படுத்தக்கூடும்.
இதனிடையே, கரூர் சம்பவம் தொடர்பான விசாரணையும் விஜய்க்கு எதிர்காலத்தில் தலைவலியாக மாறக்கூடிய வாய்ப்பு இருப்பதாக கூறப்படுகிறது. அதேபோல், நீண்ட காலமாக திராவிடக் கட்சிகளின் நிர்வாக முறைக்கு பழகியிருக்கும் அதிகார அமைப்பை, புதிய அரசியல் சிந்தனையுடன் இயங்க வைப்பதும் எளிதான காரியம் அல்ல. நிர்வாகத்தில் மாற்றத்தை கொண்டு வர வேண்டும் என்றால், கட்சித் தலைவர் மட்டுமல்லாது, முழு நிர்வாக இயந்திரமும் ஒத்துழைக்க வேண்டியிருக்கும்.
மிக முக்கியமாக, தேர்தல் நேரத்தில் அறிவிக்கப்பட்ட வாக்குறுதிகளை நிறைவேற்ற வேண்டிய பொறுப்பும் விஜய்க்கு உள்ளது. எரிவாயு சிலிண்டர், தங்க உதவி போன்ற மக்கள் நலத் திட்டங்களைச் செயல்படுத்துவது குறித்து நிதிநிலை பெரும் தடையாக இருக்கும் என கூறப்படுகிறது. ஏற்கனவே கடன் சுமை அதிகமாக உள்ள மாநிலத்தின் பொருளாதார நிலையை சமநிலைப்படுத்தி, வாக்குறுதிகளையும் நிறைவேற்ற வேண்டிய நிலையில், விஜய் தலைமையிலான அரசு கடும் சவால்களை எதிர்கொள்ள வேண்டியுள்ளது. தேர்தல் வெற்றியை நிர்வாக வெற்றியாக மாற்ற முடியுமா என்பதே இனி அனைவரின் கவனமும் ஆக உள்ளது.
