சென்னை: தமிழ் சினிமாவின் முன்னணி குணச்சித்திர நடிகர்களில் ஒருவரான எம்.எஸ். பாஸ்கர், தனது சினிமா வாழ்க்கையின் ஆரம்பகட்டத்தில் சந்தித்த அவமானங்கள், நிராகரிப்புகள் மற்றும் போராட்டங்கள் குறித்து உருக்கமாக பகிர்ந்துள்ளார். தனது வளர்ச்சியை தாமதப்படுத்திய இயக்குநர் ஒருவர் குறித்து பெயர் குறிப்பிடாமல் பேசியுள்ள அவர், சினிமாவில் வெற்றி என்பது எளிதில் யாருக்கும் கிடைப்பதில்லை என தெரிவித்துள்ளார்.
சினிமா உலகில் இன்று மதிப்புமிக்க நடிகராக திகழும் எம்.எஸ். பாஸ்கர், ஒரு காலத்தில் வாய்ப்புக்காக அலைந்த நாட்களை நினைவுகூர்ந்துள்ளார். டப்பிங் கலைஞராக பணியாற்றி வந்த காலத்தில், தனது நண்பரான இணை இயக்குநர் ஒருவர் மூலம் ஒரு படத்தில் நடிக்கும் வாய்ப்பு கிடைத்ததாக அவர் கூறினார்.
அந்த இயக்குநர் ஆரம்பத்தில் தன்னை நடிகராக ஏற்க தயங்கியதாகவும், “டப்பிங் ஆர்ட்டிஸ்ட் தானே, நடிக்க முடியுமா?” என்ற சந்தேகத்துடன் இருந்ததாகவும் அவர் தெரிவித்துள்ளார். எனினும், தனது நண்பரின் வற்புறுத்தலால் வாய்ப்பு வழங்கப்பட்டதாகவும் கூறினார்.
படப்பிடிப்பு தளத்தில் ஒரே டேக்கில் நீண்ட வசனத்தை பேசி முடித்தபோது, அங்கு இருந்த அனைவரும் கைதட்டி பாராட்டியதாக எம்.எஸ். பாஸ்கர் நினைவுகூர்ந்தார். தனது நடிப்பை பார்த்த இயக்குநரே பின்னர், “இந்த கதாபாத்திரத்திற்கு உன்னைத் தவிர வேறு யாரையும் கற்பனை செய்ய முடியவில்லை” என்று பாராட்டியதாக கூறினார்.
அந்த படத்தில் இரண்டு நாட்கள் நடித்ததோடு, பின்னர் அதே இயக்குநரின் மற்றொரு படத்திலும் நடித்ததாக அவர் தெரிவித்தார். ஆனால், தனது நண்பரான இணை இயக்குநருக்கும் அந்த இயக்குநருக்கும் ஏற்பட்ட கருத்து வேறுபாடு காரணமாக, இரண்டு படங்களிலும் இடம்பெற்றிருந்த தனது காட்சிகள் முழுவதுமாக நீக்கப்பட்டதாக கூறினார்.
இந்த தகவலை அறிந்தபோது மிகுந்த மனவேதனை அடைந்ததாகவும், அன்று இரவு முழுவதும் தூங்க முடியாமல் அழுததாகவும் எம்.எஸ். பாஸ்கர் தெரிவித்துள்ளார். மறுநாள் இயக்குநரை நேரில் சந்திக்கச் சென்றபோது, “உங்கள் காட்சிகளை வைக்க முடியவில்லை; அடுத்த படத்தில் வாய்ப்பு தருகிறேன்” என்று கூறிவிட்டு சென்றதாகவும் அவர் நினைவுகூர்ந்தார்.
இதையடுத்து அந்த இயக்குநருடன் தொடர்பைத் துண்டித்ததாகவும், பின்னர் தொலைக்காட்சி தொடர்களில் நடிக்கத் தொடங்கி தொடர்ந்து வாய்ப்புகளை பெற்றதாகவும் கூறினார். பல ஆண்டுகளுக்குப் பிறகு அந்த இயக்குநரை சந்தித்தபோது, “பெரிய நடிகராகிவிட்டீர்கள்” என்று அவர் கூறியதாகவும், அதற்கு “எனக்குரியது எனக்கு வந்து சேர்ந்தது” என்று பதிலளித்ததாகவும் தெரிவித்தார்.
சினிமா உலகில் இதுபோன்ற அனுபவங்கள் ஏராளம் என்றும், பலர் தன்னை அவமானப்படுத்தியிருந்தாலும் அதனால் ஒருபோதும் மனம் தளரவில்லை என்றும் அவர் கூறினார். போராடிப் போராடியே இன்று இந்த நிலையை அடைந்திருப்பதாகவும், தொடர்ந்து உழைப்பதே தனது வெற்றியின் ரகசியம் என்றும் குறிப்பிட்டார்.
மேலும், மற்றொரு இயக்குநர் தமிழை தவறாக உச்சரிக்கச் சொன்ன சம்பவத்தையும் அவர் பகிர்ந்துள்ளார். அந்த வார்த்தையை சரியாக உச்சரிக்க வேண்டும் என்று கூறியபோது, “உங்களுக்கு தமிழ் தெரியுமா?” என்று இயக்குநர் கேள்வி எழுப்பியதாகவும், அதற்கு சங்கத் தமிழில் இருந்து ஒரு பாடலைச் சொல்லி பதிலளித்ததாகவும் தெரிவித்தார்.
இன்று இளம் இயக்குநர்கள் தன்னிடம் வசனங்களை எப்படி பேசலாம் என்று ஆலோசனை கேட்கும் அளவுக்கு மரியாதை கிடைத்திருப்பது மகிழ்ச்சியளிப்பதாகவும், இந்த நிலைக்கு காரணமான இறைவனுக்கும் தன்னை நம்பி வாய்ப்பு வழங்கிய இயக்குநர்களுக்கும் நன்றி தெரிவித்தார்.
சினிமாவில் நிரந்தர நண்பர்களோ, நிரந்தர எதிரிகளோ இல்லை என்றும், திறமையையும் உழைப்பையும் நம்பி முன்னேறினால் வெற்றி நிச்சயம் என்பதையும் தனது வாழ்க்கை அனுபவம் மூலம் எம்.எஸ். பாஸ்கர் மீண்டும் ஒருமுறை எடுத்துரைத்துள்ளார்.
