புதுடெல்லி: அமெரிக்கா – ஈரான் இடையேயான பதற்றம் மற்றும் ஹார்முஸ் ஜலசந்தி தொடர்பான அச்சங்கள் நிலவி வரும் சூழலில், இந்திய தேசியக் கொடியுடன் பயணித்த மூன்று கப்பல்கள் பாதுகாப்பாக ஹார்முஸ் ஜலசந்தியை கடந்துள்ளன. இந்த கப்பல்களில் மொத்தமாக 8.6 லட்சம் டன் கச்சா எண்ணெய் ஏற்றப்பட்டிருந்தது.

உலகின் மிக முக்கியமான கடல் வர்த்தக வழித்தடங்களில் ஒன்றாகக் கருதப்படும் ஹார்முஸ் ஜலசந்தி, மத்திய கிழக்கு நாடுகளிலிருந்து உலகின் பல பகுதிகளுக்கு கச்சா எண்ணெய் மற்றும் எரிவாயு கொண்டு செல்லப்படும் முக்கிய பாதையாக உள்ளது. கடந்த சில மாதங்களாக அமெரிக்கா மற்றும் ஈரான் இடையே ஏற்பட்ட மோதல்கள் காரணமாக இந்த பகுதியில் கப்பல் போக்குவரத்து கடுமையாக பாதிக்கப்பட்டது.

பிப்ரவரி மாத இறுதியில் தொடங்கிய அமெரிக்கா – ஈரான் மோதலுக்குப் பிறகு, ஹார்முஸ் ஜலசந்தியில் பாதுகாப்பு குறித்த அச்சங்கள் அதிகரித்தன. இதனால் பல சர்வதேச கப்பல்கள் தங்கள் பயணத்தை தற்காலிகமாக நிறுத்தியிருந்தன. பின்னர் இரு நாடுகளுக்கும் இடையே அமைதி ஒப்பந்தம் எட்டப்பட்டதைத் தொடர்ந்து, குறிப்பிட்ட காலத்திற்கு கப்பல்கள் சுதந்திரமாக பயணிக்கலாம் என்று அறிவிக்கப்பட்டது.

இந்த சூழ்நிலையில், இந்திய தேசியக் கொடியுடன் பயணித்த ‘தேஷ் வைபவ்’, ‘தேஷ் விபார்’ மற்றும் ‘சன்மார் ஹெரால்டு’ ஆகிய மூன்று கப்பல்கள் ஒரே நாளில் ஹார்முஸ் ஜலசந்தியை பாதுகாப்பாக கடந்துள்ளன. இவை அனைத்தும் கச்சா எண்ணெய் ஏற்றிக்கொண்டு இந்தியாவை நோக்கி பயணித்துக் கொண்டிருந்தன.

இந்த மூன்று கப்பல்களிலும் சேர்த்து சுமார் 8.6 லட்சம் டன் கச்சா எண்ணெய் ஏற்றப்பட்டிருந்ததாக தகவல்கள் தெரிவிக்கின்றன. அமெரிக்கா – ஈரான் மோதல் தொடங்கிய பிறகு இந்திய தேசியக் கொடியுடன் ஒரே நாளில் மூன்று கப்பல்கள் ஹார்முஸ் ஜலசந்தியை கடந்தது இதுவே முதல் முறை என்பது குறிப்பிடத்தக்கது.

இதுவரை இந்திய தேசியக் கொடியுடன் 13 கப்பல்களும், வெளிநாடுகளைச் சேர்ந்த 5 கப்பல்களும் இந்த முக்கிய கடல் பாதையை பாதுகாப்பாக கடந்துள்ளதாக தகவல்கள் தெரிவிக்கின்றன.

மத்திய கப்பல் போக்குவரத்துத் துறை அமைச்சர் சர்வானந்த சோனோவல் கூறுகையில், “இந்த மூன்று கப்பல்களிலும் மொத்தம் 94 இந்திய மாலுமிகள் பணியாற்றி வருகின்றனர். இந்திய மாலுமிகளின் பாதுகாப்பு மற்றும் கடல் போக்குவரத்து பாதுகாப்பு ஆகியவற்றுக்கு மத்திய அரசு அதிக முக்கியத்துவம் அளித்து வருகிறது” என்று தெரிவித்தார்.

குறிப்பாக ‘சன்மார் ஹெரால்டு’ கப்பல் கடந்த ஏப்ரல் மாதத்தில் ஹார்முஸ் ஜலசந்தியை கடக்க முயன்றபோது தாக்குதல் அச்சுறுத்தலை சந்தித்து திரும்பிச் சென்றிருந்தது. தற்போது அதே கப்பல் எந்தவித சிக்கலும் இன்றி பாதுகாப்பாக கடந்து வந்திருப்பது முக்கிய முன்னேற்றமாக பார்க்கப்படுகிறது.

இந்த கப்பல்களில் ஒன்று ஒடிசா மாநிலத்தின் பரதீப் துறைமுகத்துக்கும், மற்ற இரண்டு கப்பல்கள் குஜராத் மாநிலத்தின் முக்கிய துறைமுகங்களுக்கும் வரும் நாட்களில் வந்தடையும் என எதிர்பார்க்கப்படுகிறது.

இதற்கிடையில், மேலும் இரண்டு இந்திய கப்பல்கள் ஹார்முஸ் ஜலசந்தியை கடக்க காத்திருப்பதாகவும், இந்தியாவை நோக்கி வர வேண்டிய 31 கப்பல்கள் தற்போது அந்த பகுதியில் உள்ளதாகவும் தகவல்கள் வெளியாகியுள்ளன. அவற்றில் 16 கப்பல்கள் உரங்களை ஏற்றிச் செல்வதால், இந்தியாவின் வேளாண் துறைக்கும் இந்த போக்குவரத்து முக்கியத்துவம் வாய்ந்ததாக கருதப்படுகிறது.

ஹார்முஸ் ஜலசந்தி வழியாக கப்பல்கள் பாதுகாப்பாக பயணிப்பது இந்தியாவின் எரிசக்தி பாதுகாப்புக்கும், கச்சா எண்ணெய் இறக்குமதி நிலைத்தன்மைக்கும் மிக முக்கியமானதாக இருப்பதாக நிபுணர்கள் தெரிவிக்கின்றனர்.