விமர்சனங்கள் எனை பாதிக்காது – மிருணாள் தாகூர் தன்னம்பிக்கை பதில்
திரைப்படத்திலும், வலைத் தொடர்களிலும் தன்னுடைய தனித்துவமான நடிப்பால் ரசிகர்களை கவர்ந்து வரும் நடிகை மிருணாள் தாகூர், சமீபத்தில் சமூக வலைதளங்களில் பரவி வரும் கிசுகிசுக்கள் குறித்து திறந்த மனதுடன் பதிலளித்துள்ளார். தமிழ் சினிமாவில் நடிகர் தனுஷுடன் இணைந்து நடித்ததிலிருந்து, அவரது பெயர் பல்வேறு வதந்திகளுடன் இணைக்கப்பட்டு வருகிறது. தற்போது இந்திய கிரிக்கெட் வீரர் ஸ்ரேயாஸ் அய்யருடன் அவர் நெருக்கமாக இருப்பதாகவும், இருவரும் அடிக்கடி ‘டேட்டிங்’ செல்வதாகவும், ரகசிய சந்திப்புகளில் ஈடுபடுவதாகவும் சமூக வலைதளங்களில் பல பதிவுகள் பரவி வருகின்றன.
இந்த வதந்திகள் குறித்து மிருணாளிடம் நேரடியாக கேள்வி எழுப்பப்பட்டபோது, அவர் மிக அமைதியாகவும், தன்னம்பிக்கையுடனும் பதிலளித்தார். பிரபலங்களின் வாழ்க்கை எப்போதும் பொதுமக்களின் கவனத்திலும், விமர்சனங்களிலும் இருக்கும் என்பதையும், அதனை சமாளிப்பது ஒரு கலை என்றும் அவர் கூறினார். ஆரம்பத்தில் இத்தகைய விமர்சனங்கள் தன்னை மனஅழுத்தத்திற்கு உள்ளாக்கியதாகவும், அதை சமாளிப்பது சிரமமாக இருந்ததாகவும் அவர் ஒப்புக்கொண்டார்.
ஆனால், காலப்போக்கில் விமர்சனங்களை எதிர்கொள்வது எப்படி என்பதை கற்றுக்கொண்டதாகவும், தற்போது எந்தவிதமான கருத்துகளும் தன்னை பாதிக்காது எனவும் அவர் தன்னம்பிக்கையுடன் தெரிவித்தார்.
அவர் கூறியதாவது: “பிரபலங்கள் என்றாலே விமர்சனங்களை சந்தித்து, அதை எதிர்கொண்டு தான் வாழவேண்டும். ஆரம்பத்தில் எனக்கு கடினமாக இருந்தது. இப்போது ‘இவ்வளவுதானே…’ என்று பழகிவிட்டது. விமர்சனங்களை பொருட்படுத்தவே மாட்டேன். எந்த விமர்சனமும் என்னை பாதிக்காது.”
அவரின் இந்த பதில், சமூக வலைதளங்களில் பரவும் வதந்திகளுக்கு நேரடி பதிலாகவும், தனது மனநிலையை வெளிப்படுத்தும் வலுவான அறிக்கையாகவும் பார்க்கப்படுகிறது. பிரபலங்களின் தனிப்பட்ட வாழ்க்கை குறித்து தேவையற்ற ஊகங்கள் பரவுவது புதிய விஷயம் அல்ல. ஆனால், மிருணாள் தாகூர் அதை மனதில் கொள்ளாமல், தனது தொழிலில் கவனம் செலுத்துவதே முக்கியம் என வலியுறுத்தியுள்ளார்.
தற்போது பல மொழிகளில் படங்களில் நடித்து வருகிற மிருணாள், தென்னிந்திய சினிமாவிலும், பாலிவுட்டிலும் முன்னணி நடிகையாக உயர்ந்து வருகிறார். விமர்சனங்களை புறக்கணித்து, தன்னம்பிக்கையுடன் முன்னேறுவதே தனது நோக்கம் என அவர் தெளிவுபடுத்தியுள்ளார்.
