தூத்துக்குடி மாவட்டத்தில் இருந்து இலங்கைக்கு கடத்த முயன்ற ரூ.1 கோடி மதிப்பிலான கஞ்சா கியூ பிரிவு போலீசாரால் பறிமுதல் செய்யப்பட்ட சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது. கியூ பிரிவு குற்றப்புலனாய்வுத் துறை போலீஸ் இன்ஸ்பெக்டர் விஜய அனிதாவுக்கு கிடைத்த ரகசிய தகவலின் அடிப்படையில், சப்-இன்ஸ்பெக்டர்கள் சுரேஷ், ராமச்சந்திரன், சிறப்பு சப்-இன்ஸ்பெக்டர் ராமர் மற்றும் போலீஸ் குழுவினர் அதிகாலை புதியம்புத்தூர் சிப்காட் அருகே மறைமுக கண்காணிப்பில் ஈடுபட்டனர். தூத்துக்குடி துறைமுகம்–மதுரை தேசிய நெடுஞ்சாலை வழியாக சந்தேகத்திற்கிடமான வாகனங்கள் நகரும் தகவல் கிடைத்ததால், போலீசார் அங்கு கண்காணிப்பை மேலும் தீவிரப்படுத்தினர்.
அந்த நேரத்தில், ஒரு கார் மற்றும் இரண்டு இருசக்கர வாகனங்களில் வந்த நால்வர் பெரிய மூட்டைகளைக் கொண்டு வந்ததை போலீசார் கவனித்தனர். அவர்களை தடுத்து நிறுத்தி விசாரித்தபோது, தூத்துக்குடி மட்டகடை பகுதியைச் சேர்ந்த கென்னடியின் மகன் சுதர்சன் (33) மற்றும் தேவர்காலனி பகுதியைச் சேர்ந்த முட்டை சுரேஷ் உள்ளிட்ட நால்வரும் சுமார் 100 கிலோ எடையுடைய 50 கஞ்சா பொட்டலங்களை எடுத்துச் சென்றது தெரியவந்தது. இந்த கஞ்சா மூட்டைகள் இலங்கைக்கு கடத்தப்படுவதற்காக மற்றொரு கும்பலுக்கு கைமாற்றப்பட இருந்ததாக போலீசார் தெரிவித்தனர்.
போலீசாரைக் கண்டதும் நால்வரும் தப்பிச் செல்ல முயன்றனர். இதில் சுதர்சன் மட்டும் போலீசாரால் மடக்கிப் பிடிக்கப்பட்டார். அவரது பைக் மற்றும் 100 கிலோ கஞ்சா பறிமுதல் செய்யப்பட்டது. மற்ற மூவர் இருட்டில் தப்பிச் சென்றனர். கைது செய்யப்பட்ட சுதர்சனை போலீசார் விசாரித்தபோது, முட்டை சுரேஷ் இந்த கஞ்சா பொட்டலங்களை இலங்கை கடத்தும் கும்பலுக்கு விற்க ஏற்பாடு செய்திருந்தது வெளிச்சத்துக்கு வந்தது.
மேலும், சுதர்சன் மீது ஏற்கனவே ஒரு கொலை வழக்கு, ஒரு போதைப்பொருள் வழக்கு, கொலை முயற்சி வழக்குகள் உட்பட மொத்தம் ஏழு குற்றவழக்குகள் நிலுவையில் இருப்பது விசாரணையில் தெரியவந்தது. கைது செய்யப்பட்ட சுதர்சன், பறிமுதல் செய்யப்பட்ட கஞ்சா மூட்டைகள் மற்றும் பைக் ஆகியவை கியூ பிரிவு அலுவலகத்துக்கு கொண்டு செல்லப்பட்டு மேலதிக விசாரணை நடைபெற்று வருகிறது.
பறிமுதல் செய்யப்பட்ட கஞ்சாவின் மொத்த மதிப்பு ரூ.1 கோடி என போலீசார் தெரிவித்துள்ளனர். தப்பியோடிய மூவரையும் கைது செய்ய வலைவீசி தேடுதல் நடவடிக்கைகள் தீவிரப்படுத்தப்பட்டுள்ளன. இந்த சம்பவம் தூத்துக்குடி மாவட்டத்தில் போதைப்பொருள் கடத்தல் தொடர்பான செயல்பாடுகள் மீண்டும் அதிகரித்து வருவதை சுட்டிக்காட்டுவதாக போலீசார் கூறுகின்றனர்.
