ஹாஜி மஸ்தானின் மகள் ஹசீன் – நீதி கோரி உருக்கமான வேண்டுகோள்
புனே: நிழலுலக தாதா தாவூத் இப்ராகிமின் கூட்டாளியாக செயல்பட்டவர் ஹாஜி மஸ்தான் மிர்சா. தமிழகத்தைச் சேர்ந்த அவர், மும்பைக்கு சென்று ரியல் எஸ்டேட் தொழிலிலும், கடல்சார் கடத்தல் தொழிலிலும் ஈடுபட்டார். தொழிலதிபராகவும், பல தாதாக்களுடன் தொடர்பு கொண்டவராகவும் அறியப்பட்ட ஹாஜி மஸ்தான், பாலிவுட் நடிகர்களுடனும் அடிக்கடி சந்தித்து உரையாடியவர். 1994 ஜூன் மாதத்தில் அவர் மரணம் அடைந்தார்.
அவருடைய மகள் ஹசீன் மஸ்தான் மிர்சா, சிறுவயதில் பல சிக்கல்களை எதிர்கொண்டார். அவரது சம்மதம் இல்லாமல், மாமா மகனுக்கு கட்டாய திருமணம் செய்து வைத்தனர். அந்த நபர் ஏற்கனவே எட்டு முறை திருமணம் செய்திருந்தவர். திருமணத்திற்குப் பிறகு, ஹசீனை தவறாக பயன்படுத்தி, அவருடைய சொத்துக்களையும் பறிமுதல் செய்ததாக அவர் குற்றம் சாட்டுகிறார். இந்த அநீதிகள் காரணமாக, கடுமையான மன உளைச்சலால் ஹசீன் மூன்று முறை தற்கொலைக்கு முயன்றதாகவும் தகவல் வெளியாகியுள்ளது.
இதுபற்றி ஹசீன் கூறும்போது, “என்னை பல வழிகளில் தீங்கிழைத்துள்ளனர். பலாத்காரம், கொலை முயற்சி, சொத்து பறிப்பு என பல அநீதிகளைச் சந்தித்தேன். மாமா மகன் ஒரு சிறுமியை பலாத்காரம் செய்து, மரணம் அடையும்படி விட்டு சென்றார். அப்போது போலீசார் கூட ‘நீ என்ன செய்து கொண்டிருந்தாய்?’ என என்னிடம் கேள்வி எழுப்பினர். அப்போது நான் குழந்தையாக இருந்தேன். வீட்டிலிருந்து வெளியே தூக்கி எறியப்பட்டபோது, ஒருவரும் எனக்கு ஆதரவு அளிக்கவில்லை” என உருக்கமாக தெரிவித்துள்ளார்.
தனக்கு நீதி கிடைக்க வேண்டும் என்ற கோரிக்கையுடன், ஹசீன் மத்திய உள்துறை அமைச்சர் அமித் ஷா மற்றும் பிரதமர் நரேந்திர மோடி ஆகியோரிடம் வேண்டுகோள் வைத்துள்ளார். கடந்த வாரம், வாழ்க்கை போராட்டத்தில் நீதி கோரி, இன்ஸ்டாகிராமில் வீடியோ ஒன்றையும் வெளியிட்டுள்ளார். அதில், தனது நிலைமை குறித்து விரிவாக விளக்கி, அரசின் தலையீட்டை நாடியுள்ளார்.
மேலும், பிரதமர் மோடி கொண்டு வந்த முத்தலாக் சட்டத்தை அவர் பாராட்டியுள்ளார். அதுபோன்ற சட்டங்கள், பெண்கள் எதிர்கொள்ளும் அநீதிகளை உடனடியாகத் தீர்க்கும் வகையில் இருக்க வேண்டும் என்றும் வலியுறுத்தியுள்ளார். “இத்தகைய வழக்குகளில் உடனடி நீதிக்காக கடுமையான சட்டங்கள் தேவை” என அவர் வலியுறுத்தினார்.
அவருடைய உருக்கமான விளக்கத்தில், கடந்த இரண்டு ஆண்டுகளாக தந்தை மறைந்தது தெரியாமல், அடைத்து வைக்கப்பட்டு வாழ்ந்ததாகவும் கூறியுள்ளார். தனது வாழ்க்கை போராட்டத்தில் நீதி கிடைக்க வேண்டும் என்பதே அவரது ஒரே கோரிக்கையாகும்.
