🎬 நிகழ்ச்சியில் ஏற்பட்ட சர்ச்சை குறித்து நடிகை நிதி அகர்வால் பதில்
ஐதராபாத்: ஆந்திராவைச் சேர்ந்த நடிகை நிதி அகர்வால், தமிழ் மற்றும் தெலுங்கு திரைப்படங்களில் நடித்து வருகிறார். தமிழில் சிம்பு ஜோடியாக ‘ஈஸ்வரன்’ படத்தில் அறிமுகமான இவர், பின்னர் ரவிமோகன் ஜோடியாக ‘பூமி’, உதயநிதியுடன் ‘கலகத்தலைவன்’ போன்ற படங்களில் நடித்தார். பவன் கல்யாணுடன் ‘ஹரி ஹர வீர மல்லு’ படத்தில் நடித்த இவர், தற்போது பிரபாஸ் ஜோடியாக ‘தி ராஜா சாப்’ படத்தில் நடித்து வருகிறார். விரைவில் வெளியாக உள்ள இந்தப் படத்தின் பாடல்கள் ஒவ்வொன்றாக வெளியிடப்பட்டு வருகின்றன.
இந்த படத்தின் இரண்டாவது பாடல் வெளியீட்டு விழா, ஐதராபாத்தில் உள்ள பெரிய மாலில் நடைபெற்றது. இதில் நிதி அகர்வால், இசையமைப்பாளர் தமன் உள்ளிட்ட படக்குழுவினர் பங்கேற்றனர். ரசிகர்கள் கூட்டம் கட்டுக்கடங்காத அளவுக்கு நிரம்பி வழிந்ததால், நிகழ்ச்சி முடிந்தபின் நடிகை வெளியே வரும்போது கூட்ட நெரிசலில் சிக்கினார். அப்போது சிலர் நடிகையிடம் அத்துமீறி நடந்துகொண்டதாக கூறப்படுகிறது. சம்பவம் தொடர்பான வீடியோ இணையத்தில் வைரலான நிலையில், போலீசார் வழக்கு பதிவு செய்து விசாரணை நடத்தி வருகின்றனர்.
இதற்கிடையில், தெலுங்கு நடிகர் சிவாஜி, பெண்கள் ஆடை அணிவது குறித்து சர்ச்சைக்குரிய கருத்து வெளியிட்டார். “பெண்கள் கண்டபடி உடை அணிந்தால் பிரச்சினை தான். உடலை முழுவதும் மூடும் சேலையில் தான் அழகு உள்ளது. அங்கங்கள் தெரியும்படியான உடைகளில் அழகு தெரியாது” என அவர் கூறியதால், சமூக வலைதளங்களில் கடும் எதிர்ப்பு எழுந்தது. பலரும் அவரது கருத்தை கண்டனம் தெரிவித்தனர்.
இந்த சூழலில், நிகழ்ச்சிக்கு கவர்ச்சியாக வந்ததை பற்றி பரவிய விமர்சனங்களுக்கு நடிகை நிதி அகர்வால் நேரடியாக பதிலளித்துள்ளார். தனது சமூக வலைதளத்தில் பதிவிட்ட அவர், “பாதிக்கப்பட்டவரையே குறை கூறுவது, பிரச்சினையை திசை திருப்புவதாகும்” எனக் குறிப்பிட்டார். ரசிகர்கள் கூட்டத்தில் ஏற்பட்ட அத்துமீறல் சம்பவத்திற்கு தன்னை குறை கூறும் விமர்சனங்கள் அநியாயமானவை என்றும், பிரச்சினையின் அடிப்படை காரணத்தை மறைத்து, பாதிக்கப்பட்டவரை குறை கூறுவது தவறான நடைமுறை என்றும் அவர் வலியுறுத்தினார்.
நிதி அகர்வாலின் இந்த பதில், சமூக வலைதளங்களில் பரவலாக பேசப்பட்டு வருகிறது. பெண்கள் மீது நிகழும் அத்துமீறல்களுக்கு அவர்களுடைய உடை அல்லது தோற்றத்தை காரணமாக்குவது தவறானது என்பதை அவர் வலியுறுத்தியிருப்பது, பலரிடமும் ஆதரவை பெற்றுள்ளது.
